Pa spravie ab vybuchu na stancyi łondanskaha mietro «Parsans-hryn» aryštavanyja jašče try čałavieki, paviedamlaje brytanskaja palicyja. Takim čynam, usiaho pad aryštam znachodziacca piać čałaviek, piša VVS.
Usie try aryšty byli zroblenyja ŭ horadzie Ńjupart na poŭdni Uelsa. Dvoje mužčyn va ŭzroście 48 i 30 hadoŭ byli aryštavanyja ŭ sieradu, jašče adzin 25-hadovy mužčyna byŭ aryštavany napiaredadni ŭviečary.
«Ciapier pad aryštam znachodziacca piać čałaviek, pieratrusy pravodziacca pa čatyroch adrasach. My ličym, što pieratrusy mohuć zaniać niekalki dzion», — skazaŭ kiraŭnik antyterarystyčnaha padraździaleńnia łondanskaj palicyi Dyn Chiejdon.
U subotu pa spravie ab vybuchu byli aryštavanyja dvoje mužčyn: adnaho, jakomu 18 hadoŭ, aryštavali ŭ porcie Duŭr, druhoha, 21-hadovaha, uziali pad aryšt na zachadzie Łondana.
Pavodle papiaredniaj infarmacyi, 18-hadovy junak žyŭ u domie pažyłoj pary Pieniełopy i Ronalda Džons u horadzie Sanbiery-on-Temz. Na praciahu 40 hadoŭ jany stali pryjomnymi baćkami bolš za 300 dziaciej, uklučajučy vaśmiarych biežancaŭ.
Taksama viadoma, što va ŭzroście 15 hadoŭ junak pryjechaŭ u Brytaniju ź Iraka paśla śmierci svaich baćkoŭ.
Pavodle infarmacyi Bi-bi-si, jašče da aryštu ab im pastupali paviedamleńni ŭ prahramu pa baraćbie z ekstremizmam. Adnak pakul niama źviestak ab tym, chto pieradaŭ uładam infarmacyju pra jaho i ŭ čym jana zaklučałasia.
21-hadovy mužčyna, jak miarkujecca, źjaŭlajecca vychadcam ź Siryi pa imi Jachja Faruk. Paviedamlajecca, što jon pracavaŭ u hryl-bary Aladdins u łondanskim rajonie Chaŭnsłoŭ i raniej taksama žyŭ u domie Džonsaŭ, budučy pryjomnym dziciem.
Ciapier čytajuć
Jak u halečy śpivałasia radnia Łukašenki? Małaviadomyja fakty49
Kamientary