Praparščyk zahinułaha sałdata: «Ja nie zatrymany. Byŭ u adpačynku, ničoha nie viedaju»
Nabiraje abaroty tema śmierci sałdata Sašy Koržyča ŭ Piečach.
Čytajcie pra dzikunski vypadak: «Vychodź, padła». Uskryvajucca strašnyja padrabiaznaści śmierci sałdata i situacyi ŭ Piečach uvohule. Vina — na «šakałach»
U paviedamleńniach ŚMI pačała źjaŭlacca infarmacyja, što praparščyk i siaržanty Koržyča zatrymanyja, ale hetaja infarmacyja nie zusim dakładnaja: na haŭptvachcie znachodziacca tolki dva siaržanty, praparščyk nie zatrymany.
Heta jon sam paćvierdziŭ «Našaj Nivie».
Praparščyk Koržyča, pra jakoha kažuć, što jon zabraŭ u sałdata bankaŭskuju kartku i karystaŭsia joj, — heta ŭradženiec adnoj ź viosak pad Brasłavam, Artur Virbał, 1993 hoda naradžeńnia.
Chłopiec sam adsłužyŭ u Piečach terminovuju słužbu, a z 2015 hoda staŭ praparščykam.
Ad abiedu jon na dopycie ŭ Śledčym kamitecie, asabliva ničoha nie kamientuje.
«Samahubstva… Ja nie viedaju, ja ž u adpačynku byŭ», — skazaŭ jon nam.
My adrazu ž zadali pytańnie pra bankaŭskuju kartku.
«Nu nie pa telefonie ž heta abmiarkoŭvać… Ja ciapier sam na dopycie. Siaržanty na haŭptvachcie, mianie nie zatrymlivali», — dadaŭ jon.
Z Redakcyjaj taksama źviazałasia žonka Virbała. Jana śćviardžaje, što prosta nie vieryć u mahčymaść usiaho raniej apisanaha ŭ ŚMI. Maŭlaŭ, jon dobry i spahadlivy čałaviek.
Razam jany nie žyvuć, ale znachodziacca ŭ šlubie.
Baćka praparščyka žyvie ŭ vioscy, maci — u Minsku. Sam jon žyvie pa miescy słužby, u adnym ź internataŭ Barysava.
Nahadajem pieradhistoryju. Niadaŭna ŭ barysaŭskich Piečach, dzie prachodziać vučobu sałdaty terminovaj słužby, znajšli paviešanym maładoha chłopca — 21-hadovaha Sašu Koržyča. Jon słužyŭ u 3 škole, 3 rocie, 2 uzvodzie.
Da słužby ŭ armii Koržyč byŭ paśpiachovym chłopcam. Jon dobra zarablaŭ jak aŭtamiechanik, u jaho było šmat siabroŭ, jon vioŭ aktyŭny ład žyćcia.
Maci i siabry sałdata Koržyča śćviardžajuć, što ŭ čaści isnuje sistema paboraŭ i ździekaŭ z maładych sałdat, jakaja i pryviała da trahiedyi.
***
Na telehram-kanał «Našaj Nivy» možna padpisacca tut.
Ciapier čytajuć
Pamiłavany 15 palitviaźniaŭ, u tym liku dźvie siamiejnyja pary2
Pamiłavany 15 palitviaźniaŭ, u tym liku dźvie siamiejnyja pary
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary