«Situacyja na Karejskim paŭvostravie dasiahnuła krytyčnaj adznaki, i jadziernaja vajna moža pačacca ŭ luby momant», — z takim papiaredžańniem vystupiŭ namieśnik pastajannaha pradstaŭnika KNDR u AAN Kim In Ren na pasiadžeńni Hienieralnaj Asamblei suśvietnaj arhanizacyi u aŭtorak, paviedamlaje DW.
Dypłamat śćviardžaŭ, što ni adna inšaja kraina hetak doŭhi čas nie padviarhałasia «nastolki ekstremalnaj i niepasrednaj jadziernaj pahrozie z boku ZŠA», jak KNDR, i tamu Pchieńjan maje poŭnaje prava na samaabaronu. U hetaj suviazi jon nahadaŭ ab tym, što ŭsia kantynientalnaja častka ZŠA znachodzicca ŭ miežach dasiažnaści ahniavoj mocy Paŭnočnaj Karei.
Pa słovach Kim In Rena, jaho kraina pryncypova padtrymlivaje ideju poŭnaj likvidacyi jadziernaj zbroi. Adnak va ŭmovach, kali KNDR padviarhajecca pahrozie z boku ZŠA, jana nie moža padpisać dahavor ab zabaronie jadziernaj zbroi. Pchieńjan ličyć, što ŭ intaresach jadziernaha razzbrajeńnia «krainy, jakija vałodajuć najbujniejšymi jadziernymi arsienałami, pavinny pieršymi ich likvidavać, admovicca ad ahresiŭnych daktryn, u tym liku zasnavanych na naniasieńni previentyŭnaha ŭdaru, a taksama vyvieźci jadziernuju zbroju, raźmieščanuju za miežami ich ułasnaj terytoryi».
Namieśnik dziaržsakratara ZŠA Džon Salivan u adkaz na papiaredžańnie Kim In Rena zajaviŭ, što jaho kraina nie vyklučaje pramych pieramovaŭ z KNDR. «My, viadoma, nie vyklučajem mahčymaści pramych pieramovaŭ z Paŭnočnaj Karejaj. U spravie ŭrehulavańnia prablemy, vyklikanaj KNDR, naša ŭvaha sfakusavanaja na dypłamatyi, adnak na vypadak pravału dypłamatyi my i našy sajuźniki ŭ Japonii, Paŭdniovaj Karei i inšych krainach pavinny być hatovyja da samaha horšaha», — skazaŭ jon u chodzie vizitu ŭ Tokio.
Raniej dziaržsakratar ZŠA Reks Tylersan u intervju telekampanii CNN taksama zajaviŭ, što ZŠA prykładajuć dypłamatyčnyja namahańni z metaj urehulavańnia kanfliktu vakoł rakietna-jadziernaj prahramy Paŭnočnaj Karei. Jon dadaŭ, adnak, što «hetyja dypłamatyčnyja namahańni buduć praciahvacca da taho času, pakul nie ŭpadzie pieršaja bomba».
Kamientary