Novy prajekt ad Samsung pad nazvaju «Upcycling» nieŭzabavie dazvolić usim achvotnym ustalavać hnutkuju i adkrytuju apieracyjnuju sistemu na svaim starym telefonie, kab dać im novaje žyćcio ŭ jakaści rekanfihuravanaha devajsa z novymi mahčymaściami vykarystańnia.
Zvyčki karystalnikaŭ smartfonaŭ nastolki ž raznastajnyja, nakolki adroźnivajucca ichnyja ŭładalniki. Kamuści chapaje adnaho telefonu na try-čatyry hady, a chtości nie moža admović sabie u tym, kab abnaŭlacca da fłahmanskaj madeli štohod. Staryja ž telefony najčaściej vandrujuć u šafu albo ŭ šufladku — i lažać tam hadami.
Tymčasam sioniašni dvuch-trochhadovy smartfon heta mahutnaja elektronnaja pryłada ź vialikimi vyličalnymi mahčymaściami. I hety resurs pavinien vykarystoŭvacca zamiest taho, kab zvyčajna marnavacca — paviedamlaje Motherboard Vice. Dobraja navina ŭ tym, što Samsung stvaryŭ «Upcycling» — inicyjatyvu, jakaja maje pieratvaryć staryja smartfony ŭ niešta novieńkaje.
Voś, naprykład, hetaja stancyja dla majninhu bitkojnaŭ vyrablenaja z 40 starych Galaxy S5 — madeli vypuščanaj u 2014 hodzie. Jana pracuje na novaj apieracyjnaj sistemie admysłova raspracavanaj Samsung dla prajektu. Pavodle zajavy pradstaŭnikoŭ firmy, vosiem takich telefonaŭ zabiaśpiečvajuć u try razy bolšuju enierhaefiektyŭnaść majninhu za adzin mahutny desktop pry paraŭnalnaj vyličalnaj mahutnaści.
Samsung pakazaŭ prykłady vykarystańnia starych telefonaŭ na kastryčnickaj kanfierencyi svaich raspracoŭščykaŭ u San-Francyska. Aproč majninhavaj viežy, tam možna było ŭbačyć kantroler dla manitorynhu i kiravańnia chatnim akvaryjumam na bazie Galaxy S3, a taksama sistemu raspaznavańnia tvaraŭ dla ŭvachodu ŭ dom ź cikavym dyzajnam u vyhladzie savy.
Firma źbirajecca vykłaści ŭsio nieabchodnaje prahramnaje zabieśpiačeńnie dla rekanfihuracyi starych madelaŭ na admysłovaj placoŭcy ŭ internecie. Jano budzie biaspłatnym. Tudy ž karystalniki zmohuć zahružać stvoranyja imi prajekty i sposaby novaha vykarystańnia svaich devajsaŭ. Pakul što na staroncy možna pabačyć, što było zroblena dahetul na pačatkovym etapie prajektu.
Padtrymka pieraprafilavańnia svaich pryład z boku vytvorcy heta niečuvanaja inicyjatyva ŭ industryi vysokich technałohij. Takija kampanii, jak, naprykład, Apple pajšli całkam inšym šlacham. Pavodle śpiecyjalistaŭ-servisantaŭ, kožnaje nastupnaje pakaleńnie jabłyčnych devajsaŭ našmat mienš ramontazdatnaje za papiaredniaje.
U bolšaści vypadkaŭ vytvorcy addajuć pieravahu takomu scenaru, kab ludzi prosta kuplali novyja pryłady, zamiest taho, kab ramantavać svaje staryja. Heta fiłasofija, jakaja dobraja dla finansaŭ kancernaŭ, ale drennaja dla navakolnaha asiarodździa — bo lik vykinutych u śmietnicu telefonaŭ na śviecie idzie štohod na dziasiatki miljonaŭ. Samsung ža vyrašyŭ ryzyknuć u imia dobraj spravy.
Mahčyma, premijaj za hetuju ryzyku staniecca vialikaja hrupa viernych klijentaŭ, jakija na dadatak buduć rabić značny inavacyjny ŭniosak u pracu firmy — z vykarystańniem jaje ŭłasnaj technałahičnaj płatformy. Zastałosia tolki dačakacca abiacanaj «nieŭzabavie» publikacyi novaj adkrytaj apieracyjnaj sistemy dla rekanfihuracyi starych telefonaŭ.
Kamientary