Ciažarnuju minčanku mohuć pazbavić vypłat praz UHD u pryvatnym centry

U Iny 20 tydzień ciažarnaści. Na ŭlik u žanočuju kansultacyju 16-j haradskoj palikliniki Minska jana stała, jak maje być, da 12-a tydnia. Pavodle jaje słoŭ, usie analizy zdavała svoječasova, da lekaraŭ prychodziła taksama ŭ termin.

Akušer-hiniekołah płanava nakiravała Inu na UHD pieršaha trymiestra ciažarnaści ŭ RNPC «Maci i dzicia». Joj pryznačyli čas na 24 kastryčnika.

«Ja siabie nie vielmi dobra adčuvała, u mianie byŭ tonus (skaračeńnie matki raniej za mierkavany termin rodaŭ), chvalavałasia, i, jak lubuju žančynu, mianie cikaviła, jak iduć spravy. Nie mahła dačakacca UHD u RNPC i zrabiła jaho płatna 22 kastryčnika ŭ pryvatnym miedcentry. Pry hetym tam mnie dali nakiravańnie na analiz na markiery (dla vyznačeńnia hrupy ryzyki pa chramasomnych zachvorvańniach) u RNPC «Maci i dzicia». Ja ŭsio zdała, ale nie viedała, što buduć takija nastupstvy.

U paliklinicy skazali, što UHD nie padychodzić praz toje, što ja jaho zrabiła ŭ pryvatnym miedcentry. Bolš taho, skazali, što mianie mohuć pazbavić dapamohi dla žančyn, jakija stali na ŭlik pa ciažarnaści da 12 tydniaŭ. Ale navošta mnie pierarablać UHD, kali ŭ pryvatnaha miedcentra jość licenzija na pracu, tam dobraje abstalavańnie, tym bolš kroŭ na markiery ja ŭ lubym vypadku zdavała ŭ RNPC?» — zadajecca pytańniem Ina.

Pa słovach Iny, UHD u pryvatnym miedcentry joj rabili na abstalavańni ekśpiertnaha kłasa, u zaklučeńni doktara ŭkazanyja ŭsie abaviazkovyja momanty: kolkaść pładoŭ, žyćciadziejnaść embryjona, chvascova-ciemianny pamier, taŭščynia kaŭnieravaj prastory, najaŭnaść nasavoj kostki, asablivaści anamalii płodu, matki, płacenty i hetak dalej.

Pa kamentar pravoŭ na dapamohu Ina źviarnułasia ŭ Kamitet pa achovie zdaroŭja Minharvykankama. U adkazie z kamiteta skazana, što situacyju rehuluje zahad Ministerstva achovy zdaroŭja № 83 ad 30.01.2012 hoda «Ab udaskanaleńni arhanizacyi praviadzieńnia prenatalnych i ultrahukavych daśledavańniaŭ pa vyjaŭleńni parokaŭ raźvićcia i chramasomnaj patałohii ŭ płodzie ŭ Respublicy Biełaruś». Zhodna ź im, ultrahukavy skryninh pa nakiravańni akušeraŭ-hiniekołahaŭ žančyny ź Minska pavinny prachodzić u RNPC «Maci i dzicia», mižrajonnych ultrahukavych prenatalnych centrach Minska (radzilnia №2 i 1-ja haradskaja kliničnaja balnica).

«Zaklučeńni inšych miedycynskich centraŭ nie prymajucca», — adznačajecca ŭ adkazie.

Kamitet pa achovie zdaroŭja ŭ adkazie źviarnuŭ uvahu, što pytańni vydačy ci niavydačy dapamohi — u kampietencyi Fondu sacyjalnaj abarony nasielnictva.

U fondzie patłumačyli, što kali žančynie ŭ kansultacyi nie vydaduć miedycynskaje zaklučeńnie ab tym, što jana stała na ŭlik svoječasova i vykonvała ŭsie zahady lekara, to prava na adnarazovuju dapamohu dla tych, chto staŭ na ŭlik da 12-a tydnia ciažarnaści, u jaje nie budzie. Hetaje pytańnie rehuluje punkt 1 artykuła 10 zakona «Ab dziaržaŭnych dapamohach siemjam, jakija vychoŭvajuć dziaciej». Takaja dapamoha raŭnaja 100% najbolšaj vieličyni biudžetu pražytačnaha minimumu, dziejsnaha na datu naradžeńnia dziciaci. Naprykład, siońnia heta 197 rubloŭ 81 kapiejka.

Ina ličyć nieabhruntavanym toje, što jaje mohuć pazbavić dapamohi. Na jaje dumku, u zahadzie Ministerstva achovy zdaroŭja niama pramoj zabarony prymać zaklučeńni pryvatnych miedcentraŭ, u jakich jość dazvoł i licenzija na pracu, choć tam i pieraličanyja ŭstanovy achovy zdaroŭja, dzie pavinny pravodzicca UHD.

«Zahad Ministerstva achovy zdaroŭja ja zrazumieła tak, što lekary pavinny nakiravać na UHD u hetyja ŭstanovy achovy zdaroŭja, ale zrabić ja mahu i ŭ inšym miescy. Kali b pra toje, što praz UHD pryvatnaha miedcentra možna pazbavicca dapamohi papiaredžvali adrazu, ciažarnyja hetaha b nie rabili. Ź inšaha boku, ja ž mahu zdać kroŭ u pryvatnym centry, i hetyja analizy prymuć. Pry hetym na niekatoryja analizy z našaj palikliniki nakiroŭvajuć u inšuju», — adznačaje Ina.

• 0
• 0
• 0
• 0
• 0
• 0
• 0
• 0