U Tajłandzie ŭvachodzić u modu adbielvańnie čelesa i połavych hubaŭ. Navošta?
U Tajłandzie nabiraje papularnaść adbielvańnie čelesaŭ, i hetaja navamodnaja tendencyja vyklikaje šmat u kaho ščyraje ździŭleńnie. Adbielvańnie skury daŭno ŭvajšło ŭ modu ŭ krainach Azii, dzie smuhlavaść asacyjujecca ź fizičnaj pracaj na adkrytym pavietry i, adpaviedna, z halečaj. Ale adbielvańnie čelesa — heta niešta novaje.
Što kiruje ludźmi, jakija iduć na takuju praceduru?
«Ja chacieŭ bolš upeŭniena adčuvać siabie ŭ płaŭkach», — skazaŭ Tajskaj słužbie Bi-bi-si pacyjent, što niadaŭna prajšoŭ praceduru adbielvańnia. 30-hadovy mužčyna raspavioŭ, što pieršy etap (a ich usiaho piać) jon prajšoŭ dva miesiacy tamu, i z tych časoŭ zaŭvažaje źmieny ŭ kolery svaich hienitalijaŭ.
Poŭny kurs aśviatleńnia čelesa kaštuje 650 dalaraŭ.
U svajoj rekłamie na fejsbuku klinika, jakaja akazvaje hetyja pasłuhi, tłumačyć, što jaje śpiecyjalisty z dapamohaj łaziera źnižajuć kolkaść pihmienta miełaninu ŭ epidermisie pacyjenta, što i pryvodzić da aśviatleńnia skury.
Za dva dni hety post sa zdymkami i ilustracyjami, jakija pakazvajuć praces, sabraŭ bolš za 19 tysiač repostaŭ. Kamientary roznyja: ad nieprymańnia i krytyki da ździŭleńnia i žartaŭ. Mnohija pytajucca: navošta?
Adna dziaŭčyna napisała, što nie razumieje, čamu tak burna abmiarkoŭvajecca koler, bo joj zaŭsiody zdavałasia, što jon nie maje značeńnia.
Dyrektar pa markietynhu Lelux Hospital raspavioŭ Bi-bi-si, što čatyry miesiacy tamu klinika pačała pravodzić taksama adbielvańnie žanočych hienitalij.
Štomiesiac siudy źviartajucca 20—30 mužčyn i žančyn. Niekatoryja pryjazdžajuć z Mjanmy, Kambodžy i Hankonhu.
Ministerstva achovy zdaroŭja Tajłanda zaklikaje ludziej zachoŭvać zdarovy sens i pamiatać pra pabočnyja efiekty: zapaleńni, šnary i bol.
Da taho ž, jak śćviardžajuć miedyki, efiekt aśviatleńnia z časam źniknie. Naturalny koler skury vierniecca, ale praź pieražytaje ŭździejańnie pihmient moža raźmierkavacca niaroŭna, brydkimi plamami.
«Łaziernaje adbielvańnie čelesa nikomu nie treba, heta daremnaja trata hrošaj i ryzyka atrymać bolš niehatyŭnych, čym čakanych vynikaŭ», — zajaviŭ ministr achovy zdaroŭja Tajłanda Tonhčaj Kiratychutajakorn.
U apošnija dziesiacihodździ adbielvańnie skury stała vielmi papularnym u krainach Paŭdniova-Uschodniaj Azii. U Lelux Hospital kažuć, što bolš za pałovu ich pacyjentaŭ źviartajucca mienavita pa heta.
U zhadanym rehijonie bolš śvietłaja skura aznačaje, što čałaviek nie naležyć da rabočaha kłasu i nie pracuje ŭ poli.
Na rynku isnuje mnostva kaśmietyčnych srodkaŭ dla adbielvańnia skury, rekłama jakich u rozny čas pravakavała skandały i burnyja abmierkavańni ŭ hramadstvie. Pry hetym u apošni čas prablema dyskryminacyi pa kolery skury ŭ Tajłandzie ŭžo nie takaja vostraja, jak raniej.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary