#Respublika100. Staršynia Rady BNR prapanavała adznačyć Dzień Voli ŭračystymi sustrečami, kancertami, imprezami
Staršynia Rady BNR Ivonka Surviła źviarnułasia ź listom z nahody pačatka jubilejnaha dla Biełarusi 1918 hoda
«U 2017 hodzie Kanada śviatkavała svaje stopiacidziasiatyja ŭhodki. I jak pryjemna było bačyć, što nia tolki ŭłady, ale i kožny horad, kožnaje miastečka, kožnaja vioska adznačali hety jubilej. Ludzi ŭdzielničali ŭ aficyjnych imprezach, ale taksama staralisia z hetaj nahody ździejśnić niejkija jubilejnyja prajekty, adśviatkavać jubilej asabista, kožny pa-svojmu.
Dyk voś, źviartajusia da vas siońnia z zaklikam: davajcie i my, usie my, u Biełarusi i ŭ zamiežžy, adznačym naš Jubilej — sto hadoŭ adnoŭlenaha isnavańnia našaj dziaržavy. Pačatak byŭ nialohki, va ŭmovach vajny na našaj ziamli miž čužymi nam imperyjami, va ŭmovach dahavoraŭ miž imi, u jakich my nia brali ŭdziełu. Ale našyja prodki ŭsio ž zdoleli abviaścić śvietu, što biełaruski narod žyvie i žadaje być niezaležnym, paŭnavartasnym haspadarom svaje ziamli.
Dziakujučy advazie i vytryvałaści našych prodkaŭ, niezaležnaść Biełarusi była abvieščanaja, pryznanaja susiedziami, i navat balšaviki nia zdoleli znoŭ zrabić z nas rasiejskuju huberniju.
Usie my viedajem, što biez BNR nie było b BSSR i siońnia nie isnavała b niezaležnaja dziaržava — Respublika Biełaruś», adznačajecca ŭ zvarocie.
«U hetyja sotyja uhodki BNR, zaklikaju kožnaha z Vas, maje darahija surodzičy, adznačyć padziei 1918 hodu na našaj ziamli hetak, jak adznačajuć takija śviaty hramadzianie volnych krainaŭ.
Abo ŭračystymi sustrečami, pryśviečanymi BNR, kancertami, hutarkami, imprezami.
U zamiežžy, dyk ja absalutna ŭpeŭnienaja, što prynamsi 25 Sakavika adśviatkujuć uračysta i z radaściu. Zabudziemsia ŭ hety dzień na toje, što jašče nie narmalna ŭ našym krai, bo vierym, što dačakajemsia i my taje volnaj, biełaruskaj Biełarusi, pra jakuju ŭsie marym», — padkreśliła Ivonka Surviła.
Rada BNR — simvaličnaje pradstaŭnictva Biełaruskaj Narodnaj Respubliki ŭ vyhnańni z 1920 h. Adnoŭlena z 1947 h. Kiraŭnikami Rady BNR paśla vajny byli Mikoła Abramčyk, Vincent Žuk-Hryškievič, Jazep Sažyč. Z 1997 hoda — Ivonka Surviła, što žyvie ŭ Atavie.
Ciapier čytajuć
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy18
Kamientary