Baćki dziaŭčynki, jakaja zahinuła na sielhaspracach pad Maładziečna, atrymajuć 50 tysiač kampiensacyi
Jak paviedamiŭ «Našaj Nivie» homielski pravaabaronca Leanid Sudalenka, sud u Maładziečnie abaviazaŭ siońnia spahnać hrašovuju kampiensacyju z SVK «Uschod-Ahra» (35 tysiač rubloŭ) i siaredniaj škoły numar 11 Maładziečna (15 tysiač rubloŭ) maralnaj škody na karyść baćkoŭ za śmierć ich dački-vaśmikłaśnicy na kałhasnym poli pad kołami hruzavika z bulbaju.
29 vieraśnia pazaminułaha hoda padčas vykanańnia sielskahaspadarčych rabot zahinuła vučanica 8-ha kłasa siaredniaj škoły № 11 Maładziečna 13-hadovaja Viktoryja Papčenia — na jaje najechaŭ hruzavik z bulbaj, jaki ruchaŭsia zadnim chodam.
Siońniašni prysud nie ŭstupiŭ u zakonnuju siłu i moža być abskardžany ciaham dziesiaci dzion. Pakul nieviadoma, ci škoła i sielhaspradpryjemstva buduć jaho abskardžvać.
U dačynieńni da kiroŭcy raspačali kryminalnuju spravu i ŭ kancy śniežnia pazaminułaha hoda sud Maładziečanskaha rajona vynies prysud: 22-hadovamu Paŭłu Cybinu dali 3 hady abmiežavańnia voli ŭ papraŭčaj ustanovie adkrytaha typu.
Andrej Stryžak, pradstaŭnik niezaležnaha prafsajuza REP, jaki dapamahaŭ baćkam dziaŭčynki zmahacca ŭ sudach i składaŭ dla ich pazoŭnyja zajavy, skazaŭ paśla zakančeńnia pracesu:
«Dla našaha prafsajuza była pryncypovaj pazicyja: płacić pavinny mienavita jurydyčnyja asoby, a nie nastaŭnica ci kiroŭca, jakija ŭžo panieśli pakarańnie. Uskosnym vynikam spravy Papčeni, jakaja doŭžycca ŭžo 15 miesiacaŭ, stała faktyčnaja zabarona vykarystańnia dziaciej u tak zvanych «bitvach za ŭradžaj». Bolš za toje: adździeły adukacyi ciapier rassyłajuć svaje zapyty ab adpraŭcy na sielhasraboty z paznakaj «Akramia dziaciej». Hety praces byŭ dla nas stratehičnaj ciažbaj: havorka nie tolki ab trahiedyi kankretnaj siamji, a pra toje, kab takija trahiedyi nie paŭtaralisia, a praktyka prymusovaj pracy była vykaraniena ŭ Biełarusi».
Kamientary