Eduard Palčys apublikavaŭ skrynšot SMS-«zaprašeńnia» ŭ milicyju — vyklikajuć tamu, što jon źbiraŭ podpisy ŭ padtrymku biełaruskaj movy i biełaruskamoŭnaj adukacyi, piša Radyjo Svaboda.
Suprać Palčysa raspačali administracyjny praces za parušeńnie paradku arhanizacyi masavaha mierapryjemstva, pryčym paŭtornaje, za što pahražaje štraf ad 20 da 50 bazavych vieličyniaŭ (490—1225 rubloŭ) abo administracyjny aryšt. Niadaŭna jaho zavočna aštrafavali na 735 rubloŭ za pachod u barberšop «Čekist».
Raniej u Biełarusi nia raz štrafavali źbiralnikaŭ podpisaŭ — naprykład, za bieł-čyrvona-bieły ściah abo za adstaŭku ministra abarony.
Palčys aburajecca tym, što zbor podpisaŭ moža rasceńvacca jak niesankcyjanavanaje mierapryjemstva (tym bolš razam ź im podpisy źbiraŭ tolki jašče adzin čałaviek).
«Kali brać Kanstytucyju, heta [prava źbirać podpisy] navat nie abmiarkoŭvajecca, — razvažaje Palčys. — Ale zrazumieła, što ŭ nas lubiać padładžvać zakony pad toje, «jak treba», tamu ŭ nas na schod navat 10 čałaviek treba brać dazvoł. Ale pavodle Kanstytucyi jość prava. Tym bolš pytać u niekaha dazvoł, kab źbirać u Biełarusi podpisy za Biełaruski nacyjanalny ŭniversytet, — heta niejak niedarečna».
Zbor podpisaŭ za biełaruskuju movu inicyjavaŭ lider «Maładoha frontu» Źmicier Daškievič. Jon pieradaŭ u Ministerstva adukacyi bolš za 2 tysiačy podpisaŭ.
Kamientary