Łukašenka: Častka funkcyj musić pierajści ad prezidenta inšym halinam ułady. Ale nie ciapier
U ścienach Biełteleradyjokampanii prachodzić sustreča kiraŭnika krainy z žurnalistami dziaržaŭnych ŚMI. Nivodnaha pradstaŭnika niezaležnych ŚMI nie paklikali.
12:59
Čynoŭnika, jaki nie razmaŭlaje sa ŚMI, my zamienim, skazaŭ siońnia Łukašenka.
«Ja nie viedaju, jak heta vy budziecie rabić, ale kali ja pačuju abo ŭ internecie pračytaju, što čynoŭnik nie razmaŭlaje z žurnalistam i nie daje tuju infarmacyju, jakuju pavinien, i pierš za ŭsio asnoŭnym našym žurnalistam i ŚMI, robicie nieadkładna prapanovy pra jaho zamienu. Bo druhi raz budzie vielmi baluča dla jaho», — papiaredziŭ Łukašenka Administracyju prezidenta i Mininfarmacyi.
Kiraŭniki viedamstvaŭ pavinny publična ahučvać svaje pazicyi i kamientavać važnyja padziei, skazaŭ jon.
12:42
«Samym žorstkim čynam patrabuju: zrabicie telebačańnie lepš».
«Kab karcinka była i padača materyjału. Kab žurnalist skazaŭ dźvie prapanovy i kab u kropku. Ja chaču hladzieć tolki svaje kanały. Ja zanadta nacyjanalistyčny ŭ hetym płanie», — skazaŭ kiraŭnik dziaržavy.
12:35
Taksama Łukašenka źviarnuŭsia da niadaŭniaha zdareńnia ŭ Salihorsku, kali z-za ŭzharańnia ŭ padvale balnicy evakujavali 299 čałaviek. Pa słovach kiraŭnika dziaržavy, chutkaja reakcyja na zdareńnie źviazana ŭ tym liku ź niadaŭniaj trahiedyjaj u HC «Zimovaja višnia» ŭ Kiemieravie. «Kiemierava nas skałanuła, — adznačyŭ Łukašenka. — Trysta čałaviek evakujavali za imhnieńnie».
Pry hetym jon nahadaŭ ab žorstkaj adkaznaści za parušeńni ŭ harantavańni biaśpieki ŭ masavych miescach. Jon zapatrabavaŭ razabracca ŭ pryčynach zdareńnia ŭ Salihorskaj balnicy.
12:30
Łukašenka taksama siońnia raspavioŭ pra svaju dyjetu.
«Try jajki ranicaj, u abied — miasa, uviečary — ryba, kolki chočaš. Ćviordaja dyjeta, białkovaja», — skazaŭ jon.
Pamiž asnoŭnymi pryjomami ježy ŭ kiraŭnika dziaržavy jość i nievialikija pierakusy. U toj ža čas, źviarnuŭ uvahu Łukašenka, razam z pravilnym charčavańniem važna zajmacca sportam — kala dźviuch hadzin u dzień.
Što tyčycca samich praduktaŭ, kiraŭnik dziaržavy adznačyŭ, što siłkujecca tymi ž, što i ŭsie biełarusy. «Ja jem toje, što jaścio i vy, tolki ŭ zusim małych kolkaściach», — skazaŭ Alaksandr Łukašenka.
Pry hetym jon lubić paraŭnoŭvać, jak adzin i toj ža pradukt vyrablajuć na roznych pradpryjemstvach krainy.
Kuplaje jon pradukcyju ŭ zvyčajnych kramach, časam i na Kamaroŭskim rynku. «Ščaślivy, što ŭ nas u Biełarusi absalutna biaśpiečnaje charčavańnie», — zajaviŭ jon.
12:10
Biełarusam jašče treba budzie zrazumieć rolu BNR, skazaŭ Łukašenka.
Kiraŭnik dziaržavy adznačyŭ, što jak historyk pa adukacyi źviartaŭsia da hetaj temy, vyvučaŭ isnujučyja mierkavańni. Łukašenka pryjšoŭ da vysnovy, što ŭ Biełarusi pakul nie razumiejuć, što takoje BNR i jakuju rolu jana adyhrała.
12:06
Uročyšča ŭ Kurapatach pavinna być pryviedziena ŭ paradak jak maha bolš apieratyŭna.
Pytańnie pra Kurapaty na adras kiraŭnika dziaržavy pastupiła ad čytačoŭ. Łukašenka adznačyŭ, što hod ci paŭtara tamu daručyŭ svajoj Administracyi razabracca z hetym pytańniem.
«Čas skančać hetuju vałtuźniu na kaściach. Vy zaciahnuli pradstaŭleńnie prezidentu makieta hetaha ŭročyšča. Pakładzicie mnie na stoł dakumienty, kab ja moh zaćvierdzić i my stvaryli tam miesca dla dušy. Treba bolš apieratyŭna skončyć heta, pryvieści ŭ paradak hety les, uročyšča, pastavić samy prosty pomnik, ci kaplicu, ci jašče niešta — my prymiem rašeńnie. Kab čałaviek, jaki spačuvaje siemjam i pakutuje, što zahinuli ludzi, pryjšoŭ tudy, prynios kvietki», - skazaŭ Alaksandr Łukašenka.
11:59
Łukašenka taksama zajaviŭ, što prablema darmajedaŭ jość nie tolki ŭ Biełarusi, ale i inšych krainach
Jon adznačyŭ, što z rašeńniem padobnaj prablemy sutykajucca i ŭ inšych dziaržavach, da prykładu, u Rasii. Łukašenka padkreśliŭ, što asnoŭnaja sutnaść dekreta №1 u tym, kab ludzi pracavali i apłačvali pradastaŭlenyja dziaržavaj pasłuhi, u tym liku achovy zdaroŭja, ŽKH.
11:51
Biez pracy nie budzie nijakaha sacyjalna-ekanamičnaha raźvićcia krainy i nijakija rynkavyja miechanizmy nie vyratujuć, skazaŭ Łukašenka.
Jon adznačyŭ pravilnaść taho, što ŭ svoj čas kraina nie pajšła pa šlachu šokavych reformaŭ i pieraŭtvareńniaŭ.
Łukašenka padkreśliŭ značnaść taho faktu, što šmat chto ŭ Biełarusi sapraŭdy hanarycca svajoj krainaj. «I my nie bałbatnioj stvaryli niezaležnuju Biełaruś, a realna. Z nami ličacca!» — skazaŭ biełaruski kiraŭnik.
11:38
Kamientujučy pierśpiektyvy ŭniasieńnia źmianieńniaŭ u Kanstytucyju, Łukašenka adznačyŭ, što, ź jaho punktu hledžańnia, častka funkcyj pavinna pierajści ad prezidenta inšym halinam ułady. Pry hetym jon ličyć, što momant dla źmieny Kanstytucyi jašče nie nastupiŭ.
11:28
Kažučy pra zadačy, jakija siońnia stajać pierad ŚMI, kiraŭnik dziaržavy adznačyŭ, što častka ź ich adlustravana ŭ novym zakonie ab ŚMI. U pryvatnaści razmova idzie ab raźvićci ajčynnaha kantentu na telebačańni. Pry hetym sam zakon, padkreśliŭ Łukašenka, zaklikany «abaranić našych ludziej ad patoku niepravieranaj, iłžyvaj, destruktyŭnaj infarmacyi»
11:24
«Nie viedaju, jak u vas, ale ŭ mianie šalonaja nastalhija. Daŭno ja ŭ vas nie byŭ (u Biełteleradyjokampanii). U byłyja časy ja vielmi časta byvaŭ tut. Napeŭna, heta dobraje pačućcio. Tamu davajcie damovimsia, što ja nie na pres-kanfierencyju pryjšoŭ. A u nas tut adbudziecca sumlennaja i ščyraja razmova, — skazaŭ kiraŭnik krainy. — My ŭsie robim adnu spravu. Tamu dla mianie vielmi važna, kab adbyłasia ščyraja razmova. vy ž nie tolki žurnalisty, ale vy — hramadzianie. Śviadomyja, adukavanyja, infarmavanyja hramadzianie Biełarusi».
***
11:10
Alaksandr Łukašenka vysoka aceńvaje rolu ŚMI ŭ sučasnym śviecie, dzie na pieršy płan vychodziać nie ŭzbrojenyja sutyknieńni, a infarmacyjnyja vojny. Pra heta jon zajaviŭ siońnia na sustrečy z kiraŭnikami i kalektyvami bujniejšych dziaržaŭnych ŚMI, paviedamiaje BiełTA.
«Srodki masavaj infarmacyi adnym udaram mohuć padmiać tak, što stanovicca strašna», - skazaŭ kiraŭnik dziaržavy.
Kamientary