Biełarusy achviaravali na piacitomnik Aleksijevič u 5 razoŭ bolš, čym treba
Bolšuju častku pieraličyŭ Biełhazprambank.
Kraŭdfandynhavaja kampanija pa zbory srodkaŭ na piaciknižža Śviatłany Aleksijevič pryniesła ŭ 5 razoŭ bolš hrošaj, čym było nieabchodna. Metaj kampanii była suma ŭ 40 tysiač rubloŭ, ale pa stanie na 12 krasavika sabrana ŭžo 216 tysiač rubloŭ. Da kanca zboru srodkaŭ zastajecca 8 dzion.
Bolšuju častku sumy — 150 tysiač rubloŭ — pieraličyŭ Biełhazprambank.
Inicyjataram i asnoŭnym ruchavikom kraŭdfandynhavaj kampanii stała kniharnia «Łohvinaŭ». Pa słovach vydaŭca Ihara Łohvinava, u chutkim časie jany płanujuć pačać drukavać knihi:
«My płanujem nadrukavać pa 5 tysiačaŭ asobnikaŭ. Ciapier vybirajem typahrafiju, jakaja budzie heta rabić, — raspaviadaje Łohvinaŭ. — Knihi abaviazkova trapiać u biełaruskija biblijateki. Zajmacca ich rassyłkaj budzie Biełhazprambank. Jon «zabiare» nadrukavany nakład i zładzić tury-prezientacyi pa ŭsich abłaściach Biełarusi».
Prajekt «Hałasy Utopii», jaki składajecca ź piaci knih Śviatłany Aleksijevič, budzie ŭpieršyniu vydadzieny na biełaruskaj movie biez cenzarskich pravak. Kampanija pa zbory srodkaŭ stała samaj maštabnaj u historyi biełaruskaha kraŭdfandynhu.
Kamientary