Pomnik vykanany ŭ vyhladzie bronzavaha arkuša papiery, zacisnutaha ŭ kamiani. Aŭtary miemaryjała: skulptar Kanstancin Sielichanaŭ i architektar Alaksiej Halakoŭ.
Cyrymonija adkryćcia pomnika prajšła ŭ niadzielu, 29 krasavika, na Paŭnočnych mohiłkach pad Minskam.
— Ideja, jakaja lažyć u asnovie pomnika, dobra charaktaryzuje ŭnutranuju sutnaść Paŭła. Heta baraćba ź sistemaj. Sistemaj, ź jakoj Pavieł zmahaŭsia za praŭdu, za demakratyčnaje hramadstva, za svabodnuju, praŭdzivuju presu.
Jahonaj puciavodnaj zorkaj zaŭsiody byli biblejskija słovy «Siła nie ŭ sile, siła ŭ praŭdzie». Hetyja słovy i vybityja na kamiani. Hranitny pomnik i bronzavy list žurnalisckaj papiery, jaki prabivajecca praz takuju ž ciažkuju, jak heta hłyba, sistemu, — skazała padčas cyrymonii maci Paŭła Ludmiła Šaramiet.
Padčas adkryćcia miemaryjała prysutničali siabry i rodnyja Paŭła Šaramieta, a taksama kalehi-žurnalisty.
— Kali kazać biez pafasu, to Pavieł byŭ vielmi kamunikabielnym i kantaktnym čałaviekam. Paśla hetaha zabojstva my stracili cikavaha, vielmi blizkaha siabra. Stracili čałavieka, ź jakim pracavali razam i zaŭsiody mahli kamunikavać u Kijevie, Maskvie ci Vilni. Kali ŭ Biełarusi adbyvalisia niejkija važnyja padziei, u internecie zaŭsiody źjaŭlalisia aktualnyja i trapnyja artykuły Paŭła. Voś heta, na žal, my stracili razam z zabojstvam Paŭła.
Ale nie źnikła toje, što rabiŭ Šaramiet. Sajt, jaki jon zasnavaŭ i jaki redahavaŭ doŭhi čas, pracuje i źjaŭlajecca važnaj častkaj biełaruskaj miedyjaprastory. Tamu ja rady, što sprava Paŭła Šaramieta pa-raniejšamu žyvie, — skazaŭ staršynia Biełaruskaj asacyjacyi žurnalistaŭ Andrej Bastuniec.
Ciapier čytajuć
Mackievič: Cichanoŭskuju źniać, zamianić, pieraabrać nielha. Nie mučajciesia. Nielha — i ŭsio47
Kamientary