Dziasiatki tysiač dreŭ i kustoŭ, vysadžanych uzdoŭž tras uvosieni, zahinuli
Uvosieni 2017 hoda Natalla Kačanava na naradzie ŭ Minharvykankamie dała kamandu zaniacca «estetyzacyjaj haradskoha asiarodździa» stalicy. U pryvatnaści, čynoŭnica zapatrabavała, kab azielanili Minskuju kalcavuju aŭtadarohu.
Skazali — zrabili. Užo 9 listapada minskija dziaržaŭnyja ŚMI rapartavali, što ŭzdoŭž MKADa vysadzili 14,6 tysiač drevaŭ i 95 tysiač kustarnikaŭ i pasadki praciahvajucca. Sapraŭdy, praca išła non-stop da samych marazoŭ, pakul nie zamiorzła ziamla.
«Śpiecyjalisty vysadžvali ŭstojlivyja da antrapahiennych nahruzak parody dreŭ, u pryvatnaści, jasień. Što tyčycca kustoŭ, to, pa nazirańniach navukoŭcaŭ, jany ŭ cełym vałodajuć dobraj žyćcieŭstojlivaściu. Usio heta dazvalaje spadziavacca na toje, što nastupnaj viasnoj zialonaje ŭbrańnie MKADa budzie bahaciejšym i jarčejšym», — pisali «Minsk-Novosti».
Niahledziačy na chałady, na subotniki pavyhaniali deputataŭ i čynoŭnikaŭ. U doždž jany ŭkopvali sadžancy na MKADzie. Sadžali toj ža jasień i šarapadobnyja vierby.
Adnak zimy sadžancy, asabliva chvajovyja, nie pieražyli. Tak vyhladajuć drevy ŭzdoŭž MKADa ŭ mai 2018 hoda.
Ubranstva sapraŭdy ŭražvaje. Voś tolki nie tak, jak płanavałasia.
«Tam sadžali toj vosieńniu ŭsie i ŭsio zapar, bo źvierchu dali kamandu», — raskazaŭ «Našaj Nivie» surazmoŭca, jaki pracuje ŭ hadavalniku «Minskzielanbuda».
Pa słovach rabotnika, kali zakuplać u ich hadavalniku, to dla «Minskzielanbuda» isnuje nievialikaja źnižka. Takim čynam, košt adnaho sadžanca jasienia vychodzić kala 13 rubloŭ. Sadžaniec šarapadobnaj viarby — tyja ž 13. Adzin kust kaštuje ŭ rajonie 3 rubloŭ.
Takim čynam, možna padličyć, kolki hrošaj u litaralnym sensie vykinuli na darohu.
Dakładnaja kolkaść sadžancaŭ nieviadomaja. Ale sadžancy tych 15 tysiač drevaŭ i 100 tysiač kustoŭ, jakija byli vysadžanyja tolki ŭ Minsku da 9 listapada, kaštavali nie mienš za 495 tysiač rubloŭ adpaviedna. Plus raschody na apłatu pracy rabočych. Ahulnaja ž kolkaść pasadžanych dreŭ była našmat bolšaja.
Čamu tak stałasia? Śpiecyjalisty skazali «Našaj Nivie», što pryčyny mahli być roznyja. Pa-pieršaje, umovy nadvorja hetaj zimy nie spryjali ŭkaranieńniu: byŭ biaśśniežny pieryjad z mocnymi marazami. Pa-druhoje, mnohija drevy kiepska pieranosiać uździejańnie soli, jakoj pasypajuć darohi i jakaja raźlatajecca i raściakajecca na ŭzbočyny. Ale hałoŭnaje, što, imavierna, była parušanaja i technałohija pasadki: kusty i drevy sadzili zapozna i niapravilna.
Na fotach vidać, što mnohija drevy sadzili ŭ jamki, aby-jak vykapanyja ekskavataram, u hlinu, biez padsypki ŭradlivaj hleby.
Za vysadku adkazvali zielenhasy adpaviednych rajonaŭ, na terytoryi jakich znachodziacca dadzienyja ŭčastki daroh.
Atrymać kamientar u «Minskzielanbudzie» nie atrymałasia. Pa słovach sakratarki, «ciapier haračy čas, usio načalstva na pasadkach».
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ18
Kamientary