Prejhierman patrabuje ad «Biełsata» vybačeńniaŭ za nieabjektyŭnaje aśviatleńnie «Minskaha dyjałohu»

Arhanizatary forumu «Minski dyjałoh» patrabujuć ad kiraŭnictva telekanała «Biełsat» aficyjnych vybačeńniaŭ «za nieabjektyŭnaje i niesumlennaje aśviatleńnie mierapryjemstva». U advarotnym vypadku pahražajuć «spynić lubuju supracu z telekanałam «Biełsat», a žurnalisty telekanała bolš nie atrymajuć akredytacyju ni na adno naša mierapryjemstva». Pra heta havorycca ŭ aficyjnym liście za podpisam kiraŭnika ekśpiertnaj inicyjatyvy «Minski dyjałoh» Jaŭhiena Prejhiermana na imia kiraŭnicy «Biełsata» Ahnieški Ramašeŭskaj-Huzy.

Arhanizataram forumu źjaŭlajecca ekśpiertnaja inicyjatyva «Minski dyjałoh».

«Pa stanie na 11 červienia na telekanale vyjšła bolš za 10 materyjałaŭ, jakija aśviatlali pracu forumu ci vykarystoŭvali zapisanyja na forumie intervju ź jaho ŭdzielnikami. Prytym niekatoryja z hetych materyjałaŭ nie dajuć spasyłki na forum. …Ahułam pry aznajamleńni z pryśviečanymi forumu materyjałami «Biełsat» ciažka nie zaŭvažyć tendencyjoznaść redakcyjnaj palityki», — havorycca ŭ liście da Ahnieški Ramašeŭskaj-Huzy.

«My pakidajem spadzieŭ, što ŭzhadanyja i inšyja materyjały adlustroŭvajuć nieprafiesijanalizm i tendencyjoznaść asobnych žurnalistaŭ i redaktaraŭ «Biełsat», ale nie pazicyju kiraŭnictva telekanała. Tamu my źviartajemsia da Vas z prapanovaj zrabić aficyjnuju zajavu z prabačeńniami na adras arhanizataraŭ i partnioraŭ Forumu «Minskaha dyjałohu» za nieabjektyŭnaje i niesumlennaje aśviatleńnie mierapryjemsta.

Kali da 25 červienia 2018 h. u efiry i na sajcie telekanała «Biełsat» takaja zajava nie budzie zroblena, my budziem ličyć, što kiraŭnictva telekanała aficyjna padpisvajecca pad usimi słovami svaich žurnalistaŭ.

U takim vypadku «Minski dyjałoh» sa svajho boku budzie vymušany całkam spynić lubuju supracu z telekanałam «Biełsat», a žurnalisty telekanała bolš nie atrymajuć akredytacyju ni na adno naša mierapryjemstva».

Hety list byŭ adpraŭleny na adrasy adnaho z supracoŭnikaŭ telekanała «Biełsat» i Biełaruskaj asacyjacyi žurnalistaŭ.

Alaksiej Minčonak, aficyjny pradstaŭnik Belsat TV u Biełarusi, miarkuje, što arhanizatary Forumu pieršapačatkova byli niehatyŭna nastrojenyja da žurnalistaŭ «Biełsata»:

«Spadar Prejhierman, vidać, vyrašyŭ, što lepšaja stratehija abarony — heta napad. My dahetul nie atrymali ad jaho tłumačeńniaŭ u suviazi z admovaju ŭ akredytacyi žurnalistaŭ «Biełsatu» dla pracy na «Minskim dyjałohu». Kiraŭnik Forumu śćviaržaje, što napiaredadni mierapryjemstva jon nakiravaŭ kanału list, u jakim dazvoliŭ akredytavać našych žurnalistaŭ dla pracy na «Mienskim dyjałohu», a taksama kaža, što arhanizatary prykłali ŭsie namahańni, kab našyja kalehi mahli paŭnavartasna pracavać u hateli «Mariott».

Pa-pieršaje, ni ja, pradstaŭnik «Biełsatu» u Biełarusi, ni chto-kolviek z dyrekcyi kanału, hetaha lista nie atrymlivali. Pa-druhoje, rašeńnie pra akredytacyju našych žurnalistaŭ na «Minski dyjałoh» było pryniataje Jaŭhienam Prejhiermanam tolki paśla ŭmiašańnia ŭ spravu namieśnika staršyni BAŽ Barysa Hareckaha dy pradstaŭnikoŭ dypłamatyčnaha korpusu. Da hetaha, za dzień da skančeńnia pracedury akredytacyi ŭ pracy na forumie nam było admoŭlena biez tłumačeńnia pryčynaŭ. Na maje šmatlikija telefanavańni Jaŭhien Prejhierman nie adkazvaŭ, inšyja pradstaŭniki dyrekcyi «Mienskaha dyjałohu» dapamahčy ŭ raźviazańni prablemy nie zmahli», — piša Minčonak. 

«Spadarynia dyrektar prasiła pieradać, što adkaz na svoj list Jaŭhien Prejhierman atrymaje ŭ akreśleny im termin. Dadam taksama, što z apisanymi zakidami da našych žurnalistaŭ my nie zhadžajemsia», — kaža Minčonak.

23—25 maja 2018 h. adbyŭsia pieršy Forum «Minskaha dyjałohu», jaki sabraŭ u biełaruskaj stalicy kala 500 udzielnikaŭ z 59 krain. Siarod ich — pradstaŭniki analityčnych centraŭ i akademičnych ustanoŭ z krain ES, Rasii, ZŠA, krain «Uschodniaha partniorstva», Kitaja dy inšych krain.

• 0
• 0
• 0
• 0
• 0
• 0
• 0
• 0