Centr pa daśledavańni karupcyi i arhanizavanaj złačynnaści (OCCRP) apublikavaŭ novyja dakumienty z «Panamskaha archiva», źviazanyja ź jurydyčnaj kampanijaj Mossack Fonseca, jakija achoplivajuć pieryjad 2016—2017 hadoŭ. Pa dadzienych žurnalistaŭ, firma pieršapačatkova nie viedała i nie mahła identyfikavać amal 75% sapraŭdnych uładalnikaŭ afšornych kampanij. Piša vydańnie «Nastojaŝieje vriemia».
Adeski mer-rasiejec
Hienadź Truchanaŭ, mer Adesy, jaki znachodzicca pad karupcyjnym rasśledavańniem, usio ž taki maje rasijskaje hramadzianstva, vynikaje z novaj uciečki. Žurnalisty-daśledčyki ŭ archivach vyjavili kopiju jaho rasijskaha pašparta. Zhodna z ukrainskim zakanadaŭstvam, mieć druhoje hramadzianstva zabaroniena.
Hadami Truchanaŭ admaŭlaŭ najaŭnaść u siabie rasijskaha pašparta, što paćviardžała i Maskva, i Kijeŭ. Niahledziačy na toje, što ŭkrainskija žurnalisty znachodzili źviestki Truchanava ŭ bazach rasijskaj Fiederalnaj padatkovaj słužby, SBU nijakich paćvierdžańniaŭ najaŭnaści ŭ mera Adesy druhoha hramadzianstva tak i nie znajšła. U 2016 hodzie rasijski konsuł Valeryj Katunkin aficyjna zajaŭlaŭ, što ŭ Truchanava niama rasijskaha hramadzianstva.
Pa dadzienych ukrainskich žurnalistaŭ, Truchanaŭ atrymaŭ pašpart jašče ŭ 2011 hodzie. U kopii, apublikavanaj OCCRP, termin dziejańnia pašparta ŭkazany z 26 červienia 2003 hady pa 26 červienia 2008 hoda.
Bolš za toje, z novaj uciečki vynikaje, što ź siamjoj Truchanava źviazany jak minimum dźvie afšornyja kampanii. Imi vałodaje jaho dačka Kaciaryna, zarehistravanaja pa adrasie ŭ maskoŭskaj kvatery, jakoj, u svaju čarhu, z 2003 hoda vałodaje maci adeskaha mera. Ale hetuju nieruchomaść Truchanaŭ ni razu nie dekłaravaŭ, a, zhodna z aficyjnaj dekłaracyjaj, jaho maci žyvie ź im. Na prośby žurnalistaŭ u kamientary Truchanaŭ nie adkazaŭ.
Afšory Miesi
Zhodna z novaj uciečkaj, arhiencinski futbalist Lijanel Miesi i jaho baćka ŭchilalisia ad vypłaty padatkaŭ praz panamskuju kampaniju.
Niahledziačy na toje, što jašče ŭ 2016 hodzie Miesi zajaviŭ žurnalistam, što jaho kampanija Mega Star Enterprises Inc. «naohuł nieaktyŭnaja», novaja ŭciečka dakumientaŭ ukazvaje na toje, što biznes znakamitaha futbalista ŭsio-tki viadzie dziejnaść. Pa dadzienych adnaho z supracoŭnikaŭ Mossack Fonseca, ich uruhvajski ofis vałodaje paćviardžeńniem.
U lutym 2017 hoda jurysty nakiravali arhiencinskim uładam dakład ab «padazronaj aktyŭnaści» biznesu Miesi.
Źniščanaja pierapiska dla arhiencinskaha prezidenta
OCCRP va ŭnutranaj pierapiscy supracoŭnikaŭ pamiž panamskim i ŭruhvajskim ofisami daviedałasia ab płanach supracoŭnikaŭ padrabić dakumienty, źviazanyja z afšornymi kampanijami ciapierašniaha prezidenta Arhienciny Maŭrysia Marki na Bahamach.
Supracoŭniki chacieli zadniaj dataj padpisać dakumient ab ułaśniku, kab schavać toje, što Mossack Fonseca nie viedała, što ich klijent — arhiencinski prezident. Tym nie mienš supracoŭniki admovilisia ad idei, tamu što jana «zanadta ryzykoŭnaja».
Jak vyśvietlili žurnalisty, Mossack Fonseca taksama nie viedała pra suviazi siamji Marki z BF Corporation, jakaja viadzie dziejnaść ź niamieckimi bankami afšornaj kampanijaj, jakoj vałodali dvoje bratoŭ Marki. Za dzień da abrańnia Marki ŭ 2015 h. kampanija pieraviała ŭsie svaje aktyvy ŭ šviejcarski bank i paprasiła bank Hiermanii «źniščyć usiu pierapisku».
Prysmaki Kazachstana, kanadskija lasy i ŭrad Małajzii
Z novych dakumientaŭ vynikaje, što dačka prezidenta Kazachstana i staršynia Kamiteta pa mižnarodnych adnosinach, abaronie i biaśpiecy Sienata krainy Daryha Nazarbajeva z 2007 hoda adnaasobna vałodaje kampanijaj Asterry Holdings Ltd. na Brytanskich Virhinski vyspach. Mienavita hetaja kampanija praz łancužok inšych vałodaje častkaj aktyvaŭ kandytarskaha biznesu Kazachstana, śćviardžajuć žurnalisty. Na zapyty kamientara Nazarbajeva nie adkazała.
OCCRP taksama vyjaviła, što adna z kampanij, zarehistravanych na Brytanskich Virhinski vyspach, naležyć bratu byłoha premjer-ministra Małajzii Nadžybu Razaku. Zaraz u dačynieńni da Razaka viadziecca rasśledavańnie — za čas jaho kiravańnia ź dziaržaŭnaha inviestycyjnaha fondu źnikli niekalki miljardaŭ dalaraŭ. U pryvatnaści, prakuratura rasśleduje incydent, kali z rachunkaŭ fondu byli pieraviedzienyja $10,6 młn na bankaŭski rachunak Razaka.
Siarod novych dakumientaŭ žurnalisty taksama vyjavili šerah kampanij, jakija naležać naščadkam znakamitaha francuzskaha juvielira Pjera Karćje. Pa dadzienych OCCRP, siamja Karćje praz panamskija afšornyja kampanii vałodała ŭčastkam lesu ŭ Kanadzie i niekalkimi rachunkami ŭ šviejcarskich bankach. Ni spadčyńniki, ni ich finansavyja daradcy nie pahadzilisia dać kamientar žurnalistam.
81‑hadovuju maci aŭtaryteta Skitova z «Babulinaj krynki» kinuli ŭ SIZA KDB, kab jon narešcie zahavaryŭ8
Kamientary