Siłaviki razahnali sustreču anarchistaŭ pad Krupkami: aktyvistaŭ prymusili lažać tvaram u ziamlu šeść hadzinaŭ pad daždžom
Śpiecyjalny atrad chutkaha reahavańnia (SOBR) z vykarystańniem zbroi razahnaŭ sustreču anarchistaŭ pad Krupkami. Anarchistaŭ pakłali tvaram u ziamlu, častku prymusili stajać na kaleniach. Hetak ich trymali amal šeść hadzinaŭ pad daždžom, piša belsat.eu.
Kala 20 anarchistaŭ u subotu, 30 červienia, sabralisia na pryrodzie pad Krupkami.
«Dzieści paśla abiedu ź lesu vybiehli ludzi sa zbrojaj, pačali stralać u pavietra, zahadali ŭsim lehčy tvaram u ziamlu. Potym źjavilisia ludzi ŭ cyvilnym (vierahodna, supracoŭniki Hałoŭnaha ŭpraŭleńnia pa baraćbie z arhanizavanaj złačynaściu i karupcyjaj, — zaŭv.). Usie byli ŭ maskach. Nichto nie pradstaŭlaŭsia, nie tłumačyŭ, što adbyvajecca», — raspaviadaje vidavočca hetych padziejaŭ Maryna Dubina.
Śpiecnazaŭcaŭ było kala 15 čałaviek, jašče čałaviek 25 było ŭ cyvilnym, kaža jana.
Siłaviki abšukvali anarchistaŭ, nadhladali namioty. Potym pa čarzie prymušali ŭdzielnikaŭ sustrečy nazyvać na videakamieru svaje imiony i davać tłumačeńni.
«Častka ludziej lažali tvaram u ziamlu, častku prymusili stajać na kaleniach z rukami za hałavuju, — kaža Dubina, — Heta praciahvałasia z pałovy čaćviortaj prykładna da 22.00. Uvieś hety čas išoŭ doždž. Dziaŭčynak nie puskali ŭ prybiralniu, bo siłaviki kazali, što ŭ ich niama supracoŭnikaŭ-žančyn, kab ich supravodzić. Nie davali ni pić, ni jeści. Na pytańnie, što tut adbyvajecca, supracoŭniki ŭ maskach kazali: «Nu vy ž sami ŭsio razumiejecie, što vam tłumačyć».
Tolki ŭviečary, na pačatku 11-j, ludziam dazvolili ŭstać i siłaviki źjechali. Na dvuch anarchistaŭ pry hetym było składzieny administratyŭnyja pratakoły: za niezakonnaje vydaleńnie raślinnaści i ab ekstremisckich materyjałach. «Skazali, što nibyta chtości śsiek niejkaje dreva — chacia nichto hetaha nie bačyŭ. Nu i litaraturu kanfiskavali», — dadaje jana.
«Ja liču, što heta biaźmiežža z boku milicyi i śpiecnaza. Heta absalutna biespadstaŭny cisk, biespadstaŭnaje spynieńnie luboj dziejnaści navat prosta sustrečaŭ. Heta prosta biesčałaviečnaje abychodžańnie: šeść hadzinaŭ lažać na ziamli pad daždžom, kali ty nie viedaješ, ci zatrymany, i što adbyvajecca, i pry hetym ty musiš padparadkoŭvacca hetym ludziam, bo jany sa zbrojaj», — adznačaje Maryna Dubina.
Pravaabaroncy adznačajuć, što pieraśled ludziej tolki za ich anarchičnyja pierakanańni staŭ zvyčajnaj spravaju ŭ Biełarusi. Pry hetym rehularna ŭ presie źjaŭlajecca infarmacyja ab tym, što adnosna anarchistaŭ šyroka vykarystoŭvajucca niepracesualnyja mietady pracy — u tym liku hvałt i psichałahičny cisk.
Kamientary