Minharvykankam: «Biełaruskaja mova ŭ novym sadku budzie vyvučacca płatna». Minadukacyi: «Što?! Jakaja biazhłuździca!»
U dziciačym sadku № 18, jaki adkryjecca ŭ vieraśni ŭ rajonie Labiažy, płanujuć adkryvać hrupy pa vyvučeńni tureckaj movy, a biełaruskuju movu mahčyma, pačnuć vyvučać pahłyblena.
«Rajonnaje ŭpraŭleńnie pa adukacyi ščylna supracoŭničaje z tureckim pasolstvam. Jany nam daduć piedahoha. Achvotnych trapić u takuju hrupu, jak vyjaviłasia, šmat, — padzialiłasia płanami zahadčyca sadka Alena Łasievič, pišuć «Minsk-naviny». — Akramia taho, płanujem bolš pahłyblena vyvučać biełaruskuju movu. Dla takich dzietak navat paścielnuju bializnu vybrali z nacyjanalnaj simvolikaj».
«Naša Niva» patelefanavała ŭ staličny kamitet adukacyi, kab raspytać, ci značyć heta, što ŭ sadku buduć pracavać biełaruskamoŭnyja hrupy.
«Dadatkovaja adukacyja budzie ažyćciaŭlacca pa zapycie baćkoŭ. Siońnia vyvučajecca popyt na toje, jakuju movu dzicia choča vyvučać dadatkova.
Kali zajavaŭ ad baćkoŭ dla farmiravańnia hrupy dastatkova, to ŭpraŭleńniem adukacyi pryznačajecca vykładčyk, jaki budzie vykładać biełaruskuju, tureckuju, anhlijskuju abo inšyja movy. Takaja pasłuha płatnaja, bo dadatkovaje vyvučeńnie movy ličacca pazabiudžetnaj pasłuhaj»,
— adkazała namieśnica načalnika adździeła vychavaŭčaj i ideałahičnaj raboty kamiteta pa adukacyi Minharvykankama Nadzieja Vialikaja.
To bok biełaruskaja mova budzie vyvučacca ŭ biełaruskich sadkach płatna?!
U Ministerstva adukacyi takomu kamientaru staličnych čynoŭnikaŭ ździvilisia:
«Što? Biełaruskaja mova nie moža pryraŭniacca da vyvučeńnia tureckaj ci anhlijskaj, heta biazhłuździca, — tłumačyć namieśnica načalnika hałoŭnaha ŭpraŭleńnia pa ahulnaj siaredniaj, daškolnaj i śpiecyjalnaj adukacyi Ministerstva adukacyi Albina Davidovič. — Usie navučalnyja prahramy napisanyja ŭ tym liku i na biełaruskaj movie, i vyvučeńnie biełaruskaj movy jak dziaržaŭnaj praduhledžanaje prahramami i typavym vučebnym płanam».
Bolš za toje, pierad novym navučalnym hodam my paprasili kamitety pa adukacyi ŭsich rajonaŭ uklučyć u dakumienty, jakija zapaŭniajuć baćki pra pastupleńni ŭ dziciačy sadok, słupok z abaviazkovym udakładnieńniem, na jakoj movie choča navučacca dzicia.
«Ale kali baćki vybirajuć biełaruskuju movu, hadziny vyvučeńnia ruskaj movy taksama ŭ płanach taksama praduhledžanyja. Jak i naadvarot. Ci buduć u sadku №18 pracavać całkam biełaruskamoŭnyja hrupy, ja adkazać nie mahu. Sadok tolki adčyniajecca, usio budzie zaležać ad kolkaści zajaŭ ad baćkoŭ».
Što tyčycca vyvučeńnia tureckaj movy, Albina Davidovič adkazała:
«Kodeksam ab adukacyi praduhledžanaje navučańnie na movie nacyjanalnaj mienšaści, ale ŭ Minsku siońnia pracuje tolki adna takaja hrupa, dzie navučańnie viadziecca na litoŭskaj movie. Zapyt na navučańnie na tureckaj movie my nie atrymlivali, tamu pakul nie viedaju, jakim čynam budzie ažyćciaŭlacca vykładańnie tureckaj movy ŭ hetym sadku».
Ciapier čytajuć
«Dyjalekt padazrony». Śpiavak Siaroha pryjšoŭ na rasijskaje realici i sabraŭ usich chejtaraŭ1
Kamientary