Čempijonka śvietu pa skačkach u vyšyniu siarod junijoraŭ viadzie sacsietki pa-biełarusku: «I doma razmaŭlaju. Heta patryjatyčna»
Dniami ŭ finskim Tampiere adbyŭsia čempijanat śvietu pa lohkaj atletycy siarod junijoraŭ.
U skačkach u vyšyniu z nacyjanalnym rekordam (1,92 mietry) pieramahła biełaruska Karyna Taranda.
Dziaŭčyna rodam z Baranavič, joj 19 hadoŭ.
My taksama źviarnuli na jaje ŭvahu tamu, što Karyna viadzie svaje sacyjalnyja sietki — Ukantakcie i instahram — pa-biełarusku.
«U svaim žyćci ja namahajusia vykarystoŭvać biełaruskuju movu, bo mnie zdajecca, što jana źnikaje. Ja liču, što vieści sacyjalnyja sietki pa-biełarusku — heta patryjatyčna. Na mianie padpisvajucca ludzi ź inšych krain, im adrazu zrazumieła, što u nas jość svaja mova. Bo niekatoryja ličać, što tut ruskaja panuje, a svajoj niama», — kaža dziaŭčyna.
Kali ŭ jaje naradziłasia hetaje razumieńnie?
«A zaŭsiody jano było. U Baranavičach ja razmaŭlała, u babuli… Heta potym, kali pačała jeździć u Minsk, to ŭžo bolš pa-rusku pačała. Ale kali dadomu pryjazdžaju, to ŭ asnoŭnym havaru pa-biełarusku. A ŭ Minsku kali pačynaješ havaryć, to ludzi abaročvajucca. Štości niazvykłaje, dziŭnaje, dla ich. Ja z chłopcam svaim taksama razmaŭlaju, kali nastroj dobry. I z maci — jana ŭ MNS pracuje. Kali ŭžo niechta ŭ hości prychodzić i pa-rusku havoryć, to my padładžvajemsia», — raskazała Karyna.
Na pytańnie, ci nie varta pierastać padładžvacca i prajavić volu, dziaŭčyna kaža, što pieršyja kroki ŭžo zrobleny:
«Ja imknusia da hetaha. Z trenieram na treniroŭkach časam havorym. Čytaju litaraturu, — zapeŭnivaje čempijonka śvietu. — Miesca biełaruskaj movy ŭ krainie niespraviadlivaje. Ja suprać takoha. Moža padacca, što z takim padychodam jana całkam źniknie i praz 50 hod zastaniecca tolki ŭ knihach. Niama papularyzacyi, škoły biełaruskaj niama».
Dziaŭčyna taksama kaža, što ŭ jaje płanach na žyćcio — najpierš realizavacca ŭ sporcie, a ŭžo potym — siamja.
«Ja vučusia ŭ BDUFK na reabilitołaha. Vidać, kali sa sportam skonču, to hetym i budu zajmacca», — padsumavała Karyna.
Ciapier čytajuć
ZŠA pieradali Łukašenku najnoŭšyja amierykanskija leki dla pachudańnia10
Kamientary