Чэмпіёнка свету па скачках у вышыню сярод юніёраў вядзе сацсеткі па-беларуску: «І дома размаўляю. Гэта патрыятычна»
Днямі ў фінскім Тамперэ адбыўся чэмпіянат свету па лёгкай атлетыцы сярод юніёраў.
У скачках у вышыню з нацыянальным рэкордам (1,92 метры) перамагла беларуска Карына Таранда.
Дзяўчына родам з Баранавіч, ёй 19 гадоў.
Мы таксама звярнулі на яе ўвагу таму, што Карына вядзе свае сацыяльныя сеткі — Укантакце і інстаграм — па-беларуску.
«У сваім жыцці я намагаюся выкарыстоўваць беларускую мову, бо мне здаецца, што яна знікае. Я лічу, што весці сацыяльныя сеткі па-беларуску — гэта патрыятычна. На мяне падпісваюцца людзі з іншых краін, ім адразу зразумела, што у нас ёсць свая мова. Бо некаторыя лічаць, што тут руская пануе, а сваёй няма», — кажа дзяўчына.
Калі ў яе нарадзілася гэтае разуменне?
«А заўсёды яно было. У Баранавічах я размаўляла, у бабулі… Гэта потым, калі пачала ездзіць у Мінск, то ўжо больш па-руску пачала. Але калі дадому прыязджаю, то ў асноўным гавару па-беларуску. А ў Мінску калі пачынаеш гаварыць, то людзі абарочваюцца. Штосьці нязвыклае, дзіўнае, для іх. Я з хлопцам сваім таксама размаўляю, калі настрой добры. І з маці — яна ў МНС працуе. Калі ўжо нехта ў госці прыходзіць і па-руску гаворыць, то мы падладжваемся», — расказала Карына.
На пытанне, ці не варта перастаць падладжвацца і праявіць волю, дзяўчына кажа, што першыя крокі ўжо зроблены:
«Я імкнуся да гэтага. З трэнерам на трэніроўках часам гаворым. Чытаю літаратуру, — запэўнівае чэмпіёнка свету. — Месца беларускай мовы ў краіне несправядлівае. Я супраць такога. Можа падацца, што з такім падыходам яна цалкам знікне і праз 50 год застанецца толькі ў кнігах. Няма папулярызацыі, школы беларускай няма».
Дзяўчына таксама кажа, што ў яе планах на жыццё — найперш рэалізавацца ў спорце, а ўжо потым — сям'я.
«Я вучуся ў БДУФК на рэабілітолага. Відаць, калі са спортам скончу, то гэтым і буду займацца», — падсумавала Карына.
Цяпер чытаюць
Затрыманы ў Польшчы беларускі таксіст-шпіён быў сябрам «Паспалітага рушэння»14
Затрыманы ў Польшчы беларускі таксіст-шпіён быў сябрам «Паспалітага рушэння»
Расійскія і лукашэнкаўскія спецслужбы на фоне залёту дронаў у Польшчу правялі інфаатаку. Яе зладжанасць дае падставы думаць, што залёт быў спланаваны1212
Каментары