Anatol Labiedźka: Chaj Kanapackaja achviaruje na partyjnyja spravy 10% ad svajho deputackaha zarobku

Były staršynia Abjadnanaj hramadzianskaj partyi Anatol Labiedźka prakamientavaŭ «Narodnaj Voli» adstaŭku novaha kiraŭnika AHP Vasila Palakova i raspavioŭ pra prablemy i pierśpiektyvy partyi.

Pavialičyć

Nahadajem, što Vasil Palakoŭ byŭ abrany kiraŭnikom AHP 8 lipienia, źmianiŭšy ŭ hetym kreśle Anatola Labiedźku. Ale adpracavaŭ na hetaj pasadzie ŭsiaho dva z pałovaj miesiacy.

U minułuju niadzielu Palakoŭ źviarnuŭsia da Palitsavieta partyi z zajavaj ab składańni paŭnamoctvaŭ kiraŭnika arhanizacyi. Adstaŭka była pryniata. Vykanaŭcam abaviazkaŭ staršyni partyi staŭ Mikałaj Kazłoŭ.

— Vasil Palakoŭ zajaviŭ, što nie ŭjaŭlaŭ abjom prablem, jakija stajać pierad partyjaj…

— Najpierš treba razumieć, što ja i Vasil Palakoŭ — heta adna kamanda, — kaža Anatol Labiedźka. — Inakš jon nie byŭ by maim namieśnikam na praciahu niekalkich hadoŭ. Mikałaj Kazłoŭ i Vasil Palakoŭ — heta taksama adna kamanda. Kali b heta było nie tak, to Palakoŭ nie prapanoŭvaŭ by Kazłovu stać jaho namieśnikam. A voś, naprykład, u niekatorych intervju siabra AHP i deputat Pałaty pradstaŭnikoŭ Hanna Kanapackaja sprabuje pakazać, što ŭ partyi adbyvajecca niejkaja kułuarnaja baraćba.

Paŭtarusia, i Kazłoŭ, i Palakoŭ, i Labiedźka adnosiacca da adnoj frakcyi kaštoŭnaściej, i heta adna kamanda. Što vielmi istotna.

— Prablemy, ź jakimi sutyknuŭsia Palakoŭ, akazalisia dla jaho składanymi i nievyrašalnymi?

— Kali my kažam pra prablemy, to heta prablemy nie tolki AHP, a ŭvohule prablema kiravańnia luboj sapraŭdy apazicyjnaj strukturaj. Kali vy znachodziciesia ŭ arhanizacyi, jakaja nie ŭvachodzić u miežy tatalnaha kanfarmizmu z uładaj, to, naturalna, u vas buduć prablemy. Da vas naŭprost nie pryjduć u kabiniet biznesmieny, kab padtrymać vašu strukturu, nie buduć patokam iści ludzi i nieści materyjalnyja resursy, bo heta nie adkryvaje dla ich nijakich mahčymaściej dla vydatnaj karjery ci finansavych bonusaŭ.

Heta adna z samych vialikich prablem. Vielmi ciažka znajści resursy dla padtrymańnia toj infrastuktury, jakaja jość. Kali niechta hetaha nie ŭjaŭlaje, to heta čałaviek, jaki daloki ad palityki.

Što datyčycca AHP, to my zastajomsia najbujniejšaj palityčnaj arhanizacyjaj, kali hladzieć z punktu hledžańnia infrastruktury i kolkasnaha składu. Naturalna, heta patrabuje dadatkovych vysiłkaŭ ad kiraŭnictva partyi. Za 18 hadoŭ stałasia tak, što ludzi pryzvyčailisia da peŭnaha režymu pracy z Anatolem Labiedźkam. Ty prychodziš na pracu i nie zadaješ sabie pytańnie, jakim čynam hetaja infrastruktura padtrymlivajecca. A kali sam sutykaješsia z vyrašeńniem pytańniaŭ (dzie brać hrošy na apłatu ofisaŭ i hedak dalej), to pačynajucca dadatkovyja prablemy. Akramia hetaha, jość jašče i dziejnaść partyi, na heta taksama patrebna resursy, bo za kožnym mierapryjemstvam pavinna być i arhanizacyjnaja praca, i peŭny biudžet.

— Ale vierniemsia da sychodu Vasila Palakova…

— Treba adznačyć, što Vasil byŭ vielmi dobry namieśnik staršyni partyi. Jon — dobry mieniedžar, intelihientny i pazityŭny čałaviek. I kali b u nas była situacyja, jak u Litvie ci ŭ Polščy, to byŭ by tam dobrym staršynioj partyi. Čałaviek bliskuča vykonvaŭ abaviazki namieśnika, ale być staršynioj partyi ŭ Biełarusi — heta inšaje. Inšyja patrabavańni. I heta stała dla Palakova prablemaj.

I absalutnaja chłuśnia, kali taja ž Kanapackaja kaža, što niechta niešta nie pieradaŭ Vasilu Palakovu. Vidavočna, što heta kamień u moj aharod. Ale kali ja sychodziŭ, to ŭsio było pieradadziena: i kantakty našych partnioraŭ, ź jakimi pracavaŭ, i kamunikacyi. Ja pakinuŭ haspadarku ź finansavym plusam i, bolš za toje, na niekalki miesiacaŭ pa niekatorych kirunkach uziaŭ na siabie dadatkovyja abaviazalnictvy, kab źmiena kiraŭnictva nie była balučaj. Naprykład, pakinuŭ za saboj pytańnie apłaty centralnych ofisaŭ. I tut nie było niejkaj situacyi, kab novaje kiraŭnictva zastałosia sam-nasam z prablemami. Ale razam z tym ja nie mahu adnačasova dobra vykonvać dźvie rečy — praciahvać vyrašać prablemy AHP i pracavać u novaj arhanizacyi.

Niekatoryja pačali ŭžo zajmacca kanśpirałohijaj i kazać, što ŭsie hetyja źmieny ŭ AHP — niejkaja šmatchadoŭka Labiedźki, jaki byccam by choča iznoŭ viarnucca ŭ partyju. Ale ja ŭžo dla siabie ŭsio vyrašyŭ. Kali skazaŭ, što nie budu bałatavacca na pasadu staršyni AHP, to, značycca, nie budu. Kali kažu, što ŭ mianie na najbližejšyja dva hady jość užo raśpisany kalandar pracy, to tak i jość. I ŭ hetym kalendary niama punkta — viartańnie ŭ Abjadnanuju hramadzianskuju partyju. Na dva hady ja ŭziaŭ inšy vialiki kavałak pracy, jaki nie vielmi źviazany z palitykaj. I treba zrabić pracu jakasna i dobra. U toj ža čas ja adčuvaju, što niejki čas usio roŭna pryjdziecca źviartać uvahu na AHP. Ale pry hetym kažu tak: «Ja nie Dzied Maroz, kab štomiesiac prychodzić z padarunkami».

— Na vaš pohlad, Mikałaj Kazłoŭ paciahnie voz partyjnaj pracy?

— Va ŭsialakim razie, u jaho jość vialikaje žadańnie pracavać. Hanna Kanapackaja (kali ŭžo i dalej analizavać jaje intervju) nazvała Kazłova čałaviekam biez charyzmy, ale heta niapraŭda. U Mikoły, moža być, nie chapaje dośviedu arhanizacyjnaj pracy, ale jon dastatkova charyzmatyčny čałaviek, jaki moža vakoł siabie abjadnoŭvać ludziej. Heta jaho plus. Pabačym, nakolki jon hetym skarystajecca.

Zaraz mnohija ŭ partyi pačynajuć škadavać Vasila Palakova. Ale ž jon byŭ abrany jašče ŭ lipieni. I nichto z hetych ludziej (a ich nie tak šmat) nie pryjšoŭ da Vasila i nie zapytaŭ: «Čym my možam tabie dapamahčy?» A Kazłoŭ z samaha pačatku pastaviŭ u ofisie prazrystuju skryniu i kidaŭ tudy 10 pracentaŭ svajho štomiesiačnaha dachodu. Dyk niachaj by i Kanapackaja kidała ŭ tuju skryniu na partyjnyja spravy 10 pracentaŭ ad svajho deputackaha zarobku. Prabačcie, ale heta taja situacyja, kali ŭ jaje lepš atrymlivajecca ŭśmichacca, čym adkryvać rot.

Uvohule, dumaju, što Palakoŭ zastaniecca pracavać ź Mikałajem Kazłovym. Kali ž niechta choča pazityŭnych pieramienaŭ u partyi, to jany mohuć dakazać heta na praktycy, a nie na słovach. U partyi dastatkova vysoka padniata płanka i nie chaciełasia b, kab jana była źnižana.

• 0
• 0
• 0
• 0
• 0
• 0
• 0
• 0