Biełaruskich deputataŭ vykarystali dla prasoŭvańnia dumki, što abjadnańnie z Rasijaj niepaźbiežnaje
Na zaklik hubiernatara Branskaj vobłaści ŭ hetym horadzie dniami prachodzić «Kanfierencyja municypalnych deputataŭ z sumiežnych rehijonaŭ Rasijskaj Fiederacyi i Respubliki Biełaruś».
Ź Biełarusi zaprasili tolki pradstaŭnikoŭ łajalnych da ŭłady partyj, kštałtu ŁDPB i Respublikanskaj partyi pracy i spraviadlivaści, a taksama deputataŭ z rajsavietaŭ i harsavietaŭ abłasnych haradoŭ.
Prahrama zvykłaja dla padobnych forumaŭ: abmierkavańnie prablemnych momantaŭ u handli, biznesie i hetak dalej.
Ale rasijskaja presa padaje infarmacyju pra sustreču ŭ śpiecyfičnym klučy. Tak, hazieta «Brianskij rabočij» pad zahałoŭkam «U Bransku havaryli ab imknieńni da abjadnańnia bratnich dziaržaŭ» paviedamlaje nastupnaje:
«Vynikam kanfierencyi municypalnych deputataŭ z sumiežnych rehijonaŭ Biełarusi i Rasii stała rezalucyja. […] U joj znajšłosia miesca i zadačy-maksimum: pierachodu ad farmata svabodnaha sajuza dźviuch niezaležnych krain, jaki my majem na dadzieny momant, da Sajuznaj dziaržavy ŭ adzinočnym liku, z usimi źniešnimi i strukturnymi atrybutami, ułaścivymi suvierennaj dziaržavie. Takim čynam, zamacavana hałoŭnaja ideja — imknieńnie da abjadnańnia cikava i rasijskamu, i biełaruskamu boku».
Hetuju ž dumku raźvivaje sajt urada Branskaj vobłaści, dzie cytujecca staršynia kamisii parłamienckaha schodu Biełarusi i Rasii, rasijski sienatar Siarhiej Kałašnikaŭ: «Kanfierencyja śviedčyć, što na ŭzroŭni naroda, na ŭzroŭni šarahovych ludziej, jość vializnaja praha da abjadnańnia ŭ ramkach Sajuznaj dziaržavy.
Jašče adzin važny momant — na siońnia pryniataja rezalucyja, i heta pasył i dla nas, i dla mianie jak staršyni kamisii parłamienckaha schodu, kab vynieści hetyja pytańni na dziaržaŭnaje abmierkavańnie», — skazaŭ Kałašnikaŭ.
Źviartaje na siabie ŭvahu i toje, što Kałašnikaŭ robić revieransy ŭ bok asnoŭnaha śpikiera i viadučaha kanfierencyi — radykalnaha rasijskaha palityka Siarhieja Baburyna, jaki niadaŭna ŭtvaryŭ biełaruska-rasijski palityčny ruch.
Čytajcie: Arhanizatar «Ruskich maršaŭ» stvaryŭ u Biełarusi palityčny ruch: jaho padtrymali pravasłaŭnaja carkva i «Rumoł»
Rola biełaruskich haściej u składańni rezalucyi była dekaratyŭnaja. Biełaruskija ŭdzielniki, da jakich my dazvanilisia, śćviardžajuć, što punktaŭ ab abjadnańni ŭ adnu krainu tam nie było.
«Nijakich takich rezalucyj ja nie padpisvaŭ, ničoha takoha, — zapeŭniŭ «Našu Nivu» staršynia Čavuskaha savieta deputataŭ Anatol Maciulin. — Tam havaryłasia pra toje, što treba spryjać raźvićciu adnosin, palapšać ich, adaptavać zakony. Ab admovie ad suvierenitetu havorki nie było».
Toje samaje śćviardžaje i Aleh Hajdukievič, jaki pasyłaŭ delehataŭ u Bransk ad svajoj partyi.
«Našyja pradstaŭniki nie mahli pahadzicca z takim tekstam! Heta niemahčyma. Tekst vystupu ad nas uzhadniaŭsia asabista sa mnoj, tam havorka była pra inšaje. Zaprašeńnie na hetuju kanfierencyju nam pryjšło ad hubiernatara Branskaj vobłaści», — kaža Hajdukievič.
Vasil Zadniaprany, lidar RPPS, taksama skazaŭ nam, što takuju farmuloŭku vynikaŭ kanfierencyi bačyć pieršy raz.
Takim čynam, vyhladaje, što biełaruskich deputataŭ źvieźli ŭ Bransk akurat dla taho, kab vykarystać ich prysutnaść.
Źviartaje ŭvahu, što rasijskija arhanizatary kanfierencyi zaprasili na jaje kiraŭnika arhanizacyi «Rumoł» Siarhieja Łušča, chacia jon nie deputat i nie zajmaje ŭ Biełarusi aficyjnych pasad.
Słovy Siarhieja Łušča ab «drajvierach intehracyi» cytujuć branskija vydańni, a taksama sajt rehijanalnaha ŭrada.
Kamientary