Niezvyčajnaja i prostaja rybnaja zakuska: ščecinski paprykaš
Kali čuješ słova «paprykaš», pieršym čynam dumaješ pra vienhierskuju kuchniu, pra stravy ź vialikaj kolkaściu miasa i piercu. Ale siońnia razmova pojdzie pra zusim inšy paprykaš, jaki maje svajo pachodžańnie z polskaha horada Ščecin. Recept hetaj rybnaj zakuski byŭ raspracavany ŭ 60-ch hadach na adnym z rybnych pradpryjemstvaŭ horada i tak palubiŭsia ludziam (asabliva studentam i turystam), što ŭ chutkim časie pałovu pradukcyi pradpryjemstva składaŭ tolki paprykaš.
Jaho navat ekspartavali ŭ 32 krainy pa ŭsim śviecie. A ŭ 2010 ščecinski paprykaš atrymaŭ status tradycyjnaha praduktu Polščy.
Siońnia nie prablema znajści rybnyja zakuski na paličkach u kramie, ale ja raju pryhatavać taki paštet samomu. Takim čynam, vy zmožacie dadać śpiecyi na svoj hust i dakładna budziecie ŭpeŭnienyja ŭ jakaści praduktu. Smačna jeści!
Na 3 słoiki:
- 250 hr. biełaj ryby (chiek, mintaj, traska);
- 250 hr. vendžanaj skumbryi;
- 1 vialikaja cybulina;
- 2 zubčyki časnaku;
- 2 morkviny;
- 2 łaŭrovyja listy;
- niekalki ziarniatak duchmianaha piercu;
- 1 słoik kansiervavanych tamataŭ;
- 100 hr. rysu;
- 2 st. ł. tamatnaj pasty;
- 2 st. ł. vostraha kietčupu;
- sol, pierac, papryka;
- alej dla smažańnia.
Padrychtoŭka:
Rys varym da hatoŭnaści. Cybulu i časnok drobna narazajem. Morkvu trom na tarcy.
Śviežuju rybu pa maksimumie čyścim ad kostak, smažym na alei da załacistahu koleru.
Vendžanuju rybu taksama čyścim i abirajem ad kostak.
Hatavańnie:
Na patelni smažym cybulu da prazrystaści, dadajom časnok, morkvu i śpiecyi (łaŭrovy list i duchmiany pierac). Praź niekalki minut dadajom tamaty (lepiej, kali jany buduć narezanyja na kavałački ci možna zdrabnić tamaty błendaram). Nastupny krok — dadajom rybu i tušym, pakul ryba nie pačnie raspadacca na maleńkija kavałki (prykładna 15—20 chvilin). Apošnimi inhredyjentami dadajom rys, tamatnuju pastu i kietčup, prypraŭlajem pa smaku sollu, piercam i paprykaj. Možna dadać trošačku cukru, kali adčuvajecie, što treba zbałansavać smak.
Paprykaš raskładvajem pa sterylizavanych słoikach, zakryvajem nakryŭkaj. Pasteryzujem u rondali z vadoj pry tempieratury 90 hradusaŭ prykładna 15 chvilin.
Kaniečnie, možacie pryhatavać mienšuju porcyju i adrazu jaje jeści, biez pasteryzacyi.
Kamientary