Łukašenka pra Danbas: Treba Hospada prasić, kab tam NATA było, a nie hetyja nacmieny sa strelbaj

Alaksandr Łukašenka čarhovy raz zaklikaŭ varahujučyja baki da vyrašeńnia kanfliktu na ŭschodzie Ukrainy. Adpaviednyja zajavy kiraŭnik dziaržavy zrabiŭ siońnia na sustrečy z pradstaŭnikami rasijskich ŚMI, piša BiełTA

«Ja nie chaču, kab staryja hinuli na Danbasie. Ja viedaju, što tam adbyvajecca, lepš, čym tyja, chto siadzić tut, i lepš, čym navat kiraŭnictva Rasii. Ja viedaju, što adbyvajecca. Za što hinuć dzieci i staryja, žančyny? Bo mužyki tam vajujuć dzieści… Chaj stralajuć adzin u adnaho, kali mazhoŭ niama. Ale dzieci čaho hinuć, jany ŭ čym vinavatyja? — skazaŭ kiraŭnik dziaržavy. — Voś z čaho zychodzić maja pazicyja. I ci nam — słavianam — vajavać tut.

My ž na adzin tvar, my adny i tyja ž ludzi. I ja viedaju ŭkraincaŭ. Ja tam słužyŭ, ja tam pracavaŭ, da mianie ludzi z zachadu (Ukrainy) pryjazdžali, pracavali. Jany nie vorahi, jany nie takija drennyja, jak vy časam kažacie na kanałach. Daŭno para spynić heta, užo nichto nie hladzić».

Alaksandr Łukašenka ličyć, što treba adnaŭlać narmalnyja adnosiny, i heta mahčyma. «Ale čym dalej — tym horš. Ja vam skažu svaju pazicyju: usie bajacca, što tam (va Ukrainie) budzie NATO. Ja niadaŭna Uładzimiru Uładzimiraviču skazaŭ: słuchaj, my z taboj chutka Hospada budziem prasić, kab tam było NATA, a nie admarožanyja nacmieny sa strelbaj. Voś da čaho my možam davieści», — adznačyŭ jon

Kiraŭnik biełaruskaj dziaržavy nie vyklučyŭ, što paśla ŭ takich «nacmienaŭ» moža źjavicca i rakietnaja zbroja.

«Vas nie ździŭlaje, što ŭ hety momant ZŠA vychodziać z damovy ab abmiežavańni rakiet małoj i siaredniaj dalokaści. A ciapier ujavicie na chvilinku, što ŭ mianie pad Homielem buduć stajać rakiety ź jadziernymi bojehałoŭkami, a ŭ vas pad Rastovam. Jak? My što, hetaha chacieli? Tamu pakul nie pozna, treba bašku ŭ ruki ŭziać i nie kryčać hvałtam, a niešta zrabić, kab heta spynić», — zajaviŭ biełaruski kiraŭnik.

Jon adznačyŭ, što biez udziełu ZŠA nijakaja Jeŭropa, Mierkiel abo Makron prablemu nie vyrašać. «Ale my ŭ troch (Rasija, Ukraina i Biełaruś) vyrašyć možam. Jak heta zrabić? Treba sieści i padumać, ale dla hetaha treba admovicca ad napadak. Moža dzie-niebudź štości za dužki vyvieści, dzie-niebudź što-niebudź daravać na hetym etapie. Słuchajcie, niemcam ža daravali — 30 miljonaŭ zahinuli — amal zabylisia. Dziakuj bohu, hetaha jašče ŭ našych adnosinach niama. Dyk davajcie rabić kroki ŭ hetym kirunku», — zaklikaŭ Alaksandr Łukašenka.

Kiraŭnik dziaržavy nahadaŭ, što raniej prapanoŭvaŭ kankretny ŭdzieł va ŭrehulavańni kanfliktu, u tym liku zabieśpiačeńni biaśpieki na miažy, arhanizacyi vybaraŭ u adpaviednaści ź minskimi pahadnieńniami. Adnak ni ŭkrainski bok, ni rasijski na heta nie pajšli.

• 0
• 0
• 0
• 0
• 0
• 0
• 0
• 0