Navat pry najhoršym varyjancie dla Biełarusi, źviazanym z realizacyjaj u naftavaj śfiery ŭ Rasii padatkovaha manieŭru, u ekanomicy krainy ničoha nie abryniecca. Pra heta siońnia zajaviŭ Alaksandr Łukašenka, zasłuchoŭvajučy dakład ab kančatkovych varyjantach prajektaŭ Padatkovaha kodeksa i zakona ab biudžecie, piša BiełTA.
Kiraŭnik dziaržavy adznačyŭ, što prysutničaje mnostva roznych punktaŭ hledžańnia i mierkavańniaŭ paśla taho, jak na ŭradavym uzroŭni nie ŭdałosia damovicca pa pytańni padatkovaha manieŭru Rasii. Alaksandr Łukašenka padkreśliŭ, što ŭ vyniku hetych źmianieńniaŭ, jakija mohuć adbycca, dla Biełarusi ŭ čarhovy raz u JEAES i Sajuznaj dziaržavie paharšajucca ŭmovy funkcyjanavańnia ekanomiki.
«Mianie naściarožvaje, što biełarusy zachvalavalisia. Ja chaču prosta skazać: chvalavacca absalutna niama pryčyn. Heta naša prablema — kiraŭnictva krainy, — jakuju my pavinny vyrašyć.
Navat pry horšym varyjancie ničoha nie abryniecca. A što tyčycca 2019 hoda, to ŭvohule razmoŭ niama. Tamu treba spakojna žyć i pracavać, — zajaviŭ biełaruski kiraŭnik. — Kali my nie damovimsia, to hety padatkovy manieŭr na nas navałam budzie iści pastupova z 2019 pa 2024 hod. U 2019 hodzie, kali što, to my možam stracić kala $ 400-500 młn. Tak, heta prystojnyja hrošy, ale nie katastrofa dla krainy».
«I naohuł nijakaj katastrofy nie budzie. Prosta my budziem vymušanyja pierafarmatavać u niejkaj stupieni našu ŭnutranuju, źniešniuju palityku. I asabliva ŭsie, što źviazana ź finansami», — padkreśliŭ Alaksandr Łukašenka.
Kiraŭnik dziaržavy jašče raz adznačyŭ, što nijakaj naściarožanaści ŭ ludziej być nie moža. «My budziem raźvivacca ŭ što b tam ni stała ŭ tym napramku, u jakim my vyznačym tut — u suvierennaj niezaležnaj Biełarusi. Tamu i biudžet, a heta vialikija hrošy — miljardy dalaraŭ i rubloŭ — my pavinny vielmi dakładna raźmierkavać, kab hetyja srodki patrapili tudy, kudy treba. Tamu, chto ŭ hetym maje patrebu», - skazaŭ Łukašenka.
Alaksandr Łukašenka zaklikaŭ žycharoŭ Biełarusi spakojna pracavać, pieražyvać za svaju siamju, dziaciej, asabliva napiaredadni navahodnich śviataŭ.
Kamientary