A jašče ŭ jaho žyvuć try katy.
U Łukašenki žyvuć try katy i niekalki sabak, a sam jon vielmi lubić žyvioł i pryrodu. Pra heta pres-sakratar Natalla Ejsmant raspaviała ŭ efiry viačerniaha šou «Makajonka, 9» na telekanale «Biełaruś 1», piša Tut.by.
Natalla Ejsmant pakazała zdymak z asabistaha archiva kiraŭnika krainy — na im Alaksandr Łukašenka abdymaje sabaku.
«U hetym kadry ŭvieś kiraŭnik dziaržavy. Jon praŭda lubić pryrodu, usio žyvoje. Hetyja kadry zroblenyja ŭ Aleksandryi. I tut vidać, što heta absalutna naturalny, nie pastanovačny kadr. Heta niejki sabaka, nie prezidencki, jaki padbieh i paciahnuŭsia da prezidenta. Jon byŭ vielmi łaskavy i spahadlivy», — raspaviała Ejsmant.
Jana taksama paviedamiła, što ŭ Łukašenki doma žyvuć try katy, ale adzin ź ich — Niema, užo staŭ publičnaj piersonaj.
«My nie raz jaho zdymali navat u našych repartažach, kali prezident zaprašaje da siabie dadomu svaich kalehaŭ, ź jakimi asabliva blizkija i ciopłyja adnosiny. Tam vy možacie zaŭvažyć takoha vielmi kałarytnaha rudaha kata. Jaho zavuć Niema. Dva astatnija chavajucca, a hety kot lezie ŭ kadr», — raspaviała pres-sakratar kiraŭnika dziaržavy.
Raniej sam Łukašenka raspaviadaŭ, što ŭ jaho ŭ rezidencyi žyvuć nie tolki katy.
«U mianie vielmi šmat žyvioł. Strausy — troje, indakački, kački, 25 husianiataŭ — da novaha hoda daru ludziam, kury kitajskija, kury zvyčajnyja niasuški, indyki — štuk 10. Trusoŭ było 70, zaraz razdaŭ ludziam, pakinuŭ tolki tych, jakich stryhuć, bo zabivać trusa dla mianie heta niemahčyma (nie daj Boh, kab dzieci ŭbačyli). Zastałosia, moža, trusaŭ dvaccać. 10 karoŭ, 10 koz, 15 aviečak i 7 abo 8 koniej, 4 sabaki - łabrador, aŭčarka i dźvie łajki. Usie padoranyja», - raspaviadaŭ Łukašenka.
Kamientary