Manieŭranyja hrupy zmohuć prykryvać hranicu z Rasijaj biez stvareńnia pahraničnaj infrastruktury: vyniki sustrečy Łukašenki z Łapo

Alaksandr Łukašenka 4 lutaha sustreŭsia z kiraŭnikom Pahraničnaha kamiteta Anatolem Łapo. Prysutničali taksama kiraŭnik Rady biaśpieki Stanisłaŭ Zaś i pamočnik pa biaśpiecy Viktar Łukašenka. 

Pavialičyć

Na sustrečy Łukašenka zaćvierdziŭ rašeńnie na achovu dziaržhranicy orhanami pahraničnaj słužby ŭ 2019 hodzie

Asnoŭny momant, jaki źviartaje na siabie ŭvahu, heta toje, što budzie pavialičana kolkaść pahraničnikaŭ. 

«Z ulikam pavieličeńnia niehatyŭnych faktaraŭ, źviazany ź niezakonnaj mihracyjaj, narkatrafikam, kantrabandaj (asabliva zbroi), pierad Dziaržpahrankamitetam pastaŭlena zadača pavialičyć da nieabchodnaha štatnuju kolkaść. Biesprecedentny krok, ale nacyjanalnaja biaśpieka — najvažniejšy faktar», — cytuje Łukašenku BIEŁTA. 

Taksama Łukašenka zapatrabavaŭ pryniać vyčarpalnyja zachady pa pavieličeńni i stvareńni novych padradzialeńniach hranicy. 

«Asabliva toje, pra što my z vami damaŭlalisia — uznaŭleńnie ci ŭzmacnieńnie manieŭranych hrup. Heta tyja hrupy, jakija znachodziacca zaŭsiody ŭ reziervie kiraŭnikoŭ pahraničnych atradaŭ i ŭ ličanyja chviliny vysoŭvajucca ŭ kirunku imaviernaha ruchu praciŭnika, kali tam abvastreńnie situacyi», — praciahvie cytatu aficyjnaje ahienctva. 

Takim čynam, možna vyłučyć prynamsi dva važnyja — ź liku publična zroblenych — miesiedžy.

Pieršy ŭ tym, što budzie madernizavacca instytut pahraničnaj słužby. Možna padumać, što havorka idzie nie tolki pra stvareńnie novych padraździaleńniaŭ, jakija nie źjaŭlalisia ŭžo vielmi daŭno, ale i pra rekanstrukcyju, naprykład, punktaŭ propusku. Jakija budavalisia jašče za savieckim časam, adpaviedna — i nahruzki na ich raźličanyja byli zhodna z tymi nahruzkami, kali mała chto vyjazdžaŭ i mała chto pryjazdžaŭ, paraŭnoŭvajučy ź siońniašnim dniom. 

Možna mierkavać, što ŭdała skončyŭsia ekśpierymient pa navučańni mytnikaŭ u Instytucie pahraničnaj słužby, i tamu vyrašana pierakłaści na ich častku funkcyj pahraničnikaŭ u prapusknych punktach, a vyzvalenyja resursy nakiravać na zastavy. 

Druhi ž istotny momant u tym, što, jak vyhladaje, manieŭranyja padraździaleńni zmohuć dziejničać pobač z rasijskaj hranicaj navat biez stvareńnia admysłovaj pahraničnaj infrastruktury.

Havorka idzie pra mabilnyja hrupy, jakija Łukašenka prapanuje «adnavić», jak u SSSR. Ich funkcyjaj u SSSR było vysunucca ŭ rajon mierkavanaha praryvu hranicy i ŭtrymlivać jaho da padychodu vojska. 

Viadoma, u sučasnych biełaruskich realijach u ich buduć pieravažna inšyja zadačy — ahučvajecca niebiaśpieka narkatrafiku, kantrabandy zbroi i hetak dalej.

Z hranicami Rasii sudakranajucca dva pahraničnyja atrady — Połacki i Homielski. Pakul nie ahučvajecca, dzie kankretna buduć bazavacca ŭzmocnienyja manieŭranyja hrupy, ale možna padumać, što Homielskaja i Połackaja zony bieź ich nie zastanucca.

Stvareńnie paŭnavartasnaj hranicy ŭ dadzieny momant małaimavierna pa niekalkich pryčynach, pieršaja ź jakich — palityčnaja. Nu i, zrešty, heta prosta doraha: uziać pad achovu amal 1300 kiłamietraŭ hranicy vymahaje kałasalnych hrašovych vydatkaŭ. 

• 0
• 0
• 0
• 0
• 0
• 0
• 0
• 0