Libierałka, patryjotka i pieršaja žančyna, jakaja ŭznačalić urad Estonii. Cikavyja fakty pra Kaju Kałas

1. Kai Kałas 41 hod. Maje dźvie adukacyi — jurydyčnuju i ekanamičnuju. Peŭny čas pracavała pamočnicaj režysiora teatru. Była deputatkaju Jeŭraparłamientu i parłamientu Estonii — Ryjhikohu.

2. Baćka Kai Kałas — były estonski premjer i były vice-prezident Jeŭrakamisii Sijm Kałas. Mienavita jon i zasnavaŭ Partyju reformaŭ, jakoj kiruje ciapier dačka. Maci ŭ šaścimiesiačnym uzroście była departavanaja ŭ Sibir i žyła tam da dziesiaci hadoŭ. Pradzied Kałas byŭ pieršym kiraŭnikom estonskaj palicyi i stvaralnikam dobraachvotnaj paramilitarnaj arhanizacyi Kajtselijt.

3. Vostraja na jazyk. Vyklikała ŭ krainie skandał, nazvaŭšy byłoha premjera Jury Ratasa palitbrojleram, jaki «na kožnym viasielli jon žanich i niabožčyk na kožnym pachavańni». Prynieści prabačeńni Ratasu jaje prasiła sama prezidentka, ale Kałas hetaha nie zrabiła.

4. Ekanamičnaja i ideałahičnaja libierałka. Ličyć, što «dziaržava nie pavinna zajmacca pradprymalnictvam tam, dzie hetym mohuć zajmacca pradprymalniki». Pierad vybarami jana paabiacała, što ŭ vypadku prychodu da ŭłady nie budzie čapać nieabkładany padatkam prybytak da 500 jeŭra, admienić biaspłatny transpart u pravincyi i nie pahodzicca z kampiensacyjaj škody dla cerkvaŭ, naniesienaj padčas vajny i akupacyi. Kałas vystupaje taksama z prapanovaj admovicca ad biaspłatnaj adukacyi.

5. Ekanamičnuju palityku jana abiacaje budavać takim čynam, kab Estonija ŭ budučyni mahła dać rady biez datacyjaŭ Jeŭrasajuza. Adziny šlach dla maleńkaj krainy, na jaje dumku — heta ekanomika, zasnavanaja na viedach.

6. Płanuje skaračać kolkaść čynoŭnikaŭ. Abiacaje praciahnuć inicyjavanuju joju kampaniju ŭviadzieńnia ŭ dziaržavie nulavoj biurakratyi.

7. Kałas paabiacała, što siarednija zarobki nastaŭnikaŭ na praciahu čatyroch hadoŭ vyrastuć da 2000 eŭraŭ za miesiac. Piensijanieram jaje partyja abiacaje rost piensij na 200 jeŭra za miesiac na praciahu čatyroch hadoŭ, a taksama ŭvieści padatkovyja lhoty dla pracujučych piensijanieraŭ.

8. Maje taksama ćviorduju pazicyju nakont adukacyi na estonskaj movie. Abiacaje ŭvieści adzinuju sistemu adukacyi na estonskaj, bo, pavodle Kałas, intehracyju hramadstva moža paskoryć tolki pieravod na estonskuju movu ŭsioj sistemy adukacyi, pačynajučy ź dziciačaha sadka.

9. Budučaja premjerka zajaŭlała, što estonskaja mova i kultura majuć patrebu ŭ bieražlivaj abaronie z pryčyny maleńkaha pamieru krainy. Jaje partyja nia maje namieru admaŭlacca ad patrabavańniaŭ vałodańnia estonskaj movaj dla achvotnych atrymać hramadzianstva Estonii.

10. Zamužam. Maje traich dziaciej.

• 0
• 0
• 0
• 0
• 0
• 0
• 0
• 0