23-hadovy vykanaŭca Pavał Kozič atrymaŭ hałoŭny pryz za kampazicyju «Tramvaj», jakuju napisaŭ sumiesna ź Cichanam Bukrabam na słovy Antona Rudaka, paviedamlaje tuzinfm.by.
Pavał Kozič (23 hady) i Cichan Bukraba (26 hadoŭ) vučacca ŭ Biełaruskim dziaržaŭnym universytecie kultury i mastactva. Pavał — mienčuk, Cichan — z Homielu. Z muzyčnych kirunkaŭ addajuć pieravahu džazu i soŭłu. Jany niekalki hadoŭ pracujuć razam u kaver-bendach, ale majuć i ŭłasnyja napracoŭki. Jak kažuć sami muzyki, konkurs «Zaśpiavaj» padšturchnuŭ ich da stvareńnia aŭtarskaha prajektu. Debiutam akurat i stała pieśnia «Tramvaj» paeta Antona Rudaka, muzyku da jakoj jany stvaryli razam. Bolej pra trek.
Mienavita praca Paŭła Koziča i Cichana Bukraby była adznačanaja žury konkursu hałoŭnym pryzam. (Žury konkursu). Dziakujučy konkursu, muzyki zapisali finalnuju versiju svajoj pieśni. U jakaści pryzu jany atrymali jašče 1500 BYN na realizacyju svaich dalejšych tvorčych zadumaŭ.
Akrom taho, na ŭznaharodžańni «Zaśpiavaj-5», jakoje prajšło ŭ mienskim klubie «Berlin», byli adznačanyja dva finalisty konkursu — elektronny prajekt Maximalism ź pieśniaju «Frahmenty» na słovy Hanny Komar i Raman Vołaźnieŭ ź pieśniaju na słovy Mikity Najdzionava «Salonyja sny».
Konkurs «Zaśpiavaj» pravodziać internet-partał TuzinFM i fond «Viartańnie» z 2014 hodu. Jahonaja meta adkryć dla maładych muzykaŭ śviet biełaruskaj sučasnaj paezii i paspryjać tamu, kab dobryja vieršy stali pieśniami. Pieramožcami ŭ naminacyi «Śpiavanaja paezija» stanavilisia Vital Varanko, Naviband, Paulinn, Helious. Usie pieśni laŭreataŭ i pieramožcaŭ možna pasłuchać u płej-liście.
Kamientary