Pravasłaŭnaja carkva Ukrainy daravała pieramožcu prezidenckich vybaraŭ Uładzimiru Zialenskamu žart pra «termas». Pra heta zajaviŭ hanarovy patryjarch PCU Fiłaret u intervju Radyjo Svaboda.
«Viadoma, nielha nazyvać tomas, za jaki my zmahalisia bolš za 25 hadoŭ, «termasam». Zialenski ŭžo paprasiŭ prabačeńnia za heta. Heta abraźliva dla Carkvy — tomas, jaki maje dla nas vialikaje značeńnie, nazyvać jaho «termasam»», — adznačyŭ hanarovy patryjarch PCU.
«Ale my darujem novaabranamu prezidentu za hetyja słovy i nie kryŭdzimsia», — dadaŭ Fiłaret.
Jon taksama prakamientavaŭ słovy z vystupleńnia Zialenskaha padčas debataŭ ab tym, što tomas — «heta pieramoha pierš za ŭsio Fiłareta, jaki zmahaŭsia za ŭkrainskuju carkvu» jašče da taho, jak Piatro Parašenka staŭ prezidentam.
«Kali b nie było Kijeŭskaha patryjarchatu, jaki ja stvaryŭ razam z narodam pravasłaŭnym, z archirejami, z duchavienstvam, to ci mahła b havorka iści pra tomas, kali b carkvy nie było? Jasna, što nie. I tamu zasłuha ŭ tym, što my atrymali tomas, pierš za ŭsio tych, chto pabudavaŭ Carkvu.
Ale nie treba prymianšać i značeńnie prezidenta. Tamu što Carkva była, i prezidenty papiarednija źviartalisia da Usialenskaha patryjarcha, ale tomasa nie było. Tamu viadoma, što jość zasłuha i prezidenta Parašenki», — skazaŭ Fiłaret.
Jak piša «Ukrainskaja praŭda», raniej u jakaści akciora pieramožca prezidenckich vybaraŭ Uładzimir Zialenski žartavaŭ adnosna tomasa ab aŭtakiefalii Pravasłaŭnaj carkvy Ukrainy, nazvaŭšy jaho «termasam». Za hety žart jaho nieadnarazova paprakali, u tym liku, patryjarch Fiłaret i dziejučy prezident Piatro Parašenka.
Kamientary