Unikalnaja situacyja: minčuka pratrymali 10 miesiacaŭ u SIZA, ale ŭsio ž pryznali niedatyčnym da zabojstva

Hetaja historyja pačałasia dzieviać hadoŭ tamu. U pasiołku Pryvolny pad Minskam na pracy zastrelili Uładzimira Kuźniacova, jon achoŭvaŭ nočču aŭtamabili. Napiaredadni jaho firma zarabiła 40 tysiač dalaraŭ, hrošy byli ŭ siejfie. Śledčyja doŭha nie mahli znajści vinavatych. U 2018-m abvinavačvańnie pradjavili dvaim byłym supracoŭnikam — Ivanu Pałanieviču i Maksimu Dyšleviču. Na toj momant Pałanievič užo pamior. Dyšlevič u sudzie zajaviŭ, što na śledstvie jaho prymusili ahavaryć i siabie, i kalehu. 12 lutaha Minski abłasny sud vynies apraŭdalny prysud, jaho abskardziła prakuratura. A ŭčora Viarchoŭny sud apraŭdaŭ abodvuch fihurantaŭ, i heta vialikaja redkaść dla Biełarusi, bo kolkaść apraŭdalnych prysudaŭ u nas usiaho 0,2%. Pra spravu piša TUT.BY. 

Pavialičyć

Hienieralnaja prakuratura nie pahadziłasia z apraŭdalnym prysudam. Maksim Dyšlevič, jaho rodnyja i advakat znoŭ pryjšli ŭ sud, na hety raz u Viarchoŭny, kab dakazać: jon nievinavaty. Pobač — maci pamierłaha Ivana Pałanieviča. Heta jana nie pahadziłasia, kab jaje syna pryznali paśmiarotna vinavatym, i dabiłasia, kab rasśledavańnie pa spravie było adnoŭlenaje.

Rabotnika zabili, ale siejf tak i nie zmahli adkryć

Uładzimir Kuźniacoŭ pracavaŭ u firmie svajho syna «HłobałAŭtaSici», zajmalisia pieraprodažam aŭto. I choć baćka naminalna byŭ dyrektaram, usie finansavyja pytańni vyrašaŭ jaho namieśnik. 15 kastryčnika 2010 hoda, kali i adbyłosia zabojstva, Kuźniacoŭ pradaŭ «Folksvahien-Tuareh» za 38 tysiač dalaraŭ, jašče 2 tysiačy atrymaŭ u jakaści zakładu ad inšaha klijenta. Hrošy pakłaŭ u siejf u svaim pracoŭnym kabiniecie. Zvyčajna vyručku na firmie nie pakidali, staralisia pakłaści na rachunak u banku, ale ŭ toj viečar piatnicy vyrašyli, što nie paśpiejuć pieravieści hrošy. Kavaloŭ-starejšy ŭ tuju noč zastaŭsia za vartaŭnika — na stajancy pieryjadyčna raźbivali aŭto na prodaž, tamu pracaŭniki pa čarzie dziažuryli na firmie.

Pa viersii śledstva, u dźvie hadziny nočy Uładzimira Kuźniacova zabili strełam u hałavu. Ź jaho kabinieta vynieśli siejf z hrašyma, sprabavali jaho adkryć, ale tak i nie zmahli padabrać kod, a tamu vykinuli siejf pa darozie. Zabitaha zaharnuli ŭ pled i pakinuli na terytoryi pradpryjemstva. Ranicaj trup vyjaviŭ namieśnik Kuźniacova, jon i patelefanavaŭ u milicyju.

Pa spravie dapytvali i dziejnych, i byłych supracoŭnikaŭ firmy: adrazu paśla zabojstva ŭ 2010-m, potym u 2013-m i, narešcie, u 2018 hodzie-m. Abvinavačvańni ŭ vyniku pradjavili Ivanu Pałanieviču, jaki na momant zabojstva ŭžo nie pracavaŭ u «HłobałAŭtaSici», jon zasnavaŭ svaju firmu, taksama pa pieraprodažy aŭto. Druhi fihurant pa spravie — Maksim Dyšlevič, jon taksama byŭ były supracoŭnik firmy Kuźniacova i na momant zabojstva ŭžo pracavaŭ u kampanii Pałanieviča.

Pa viersii śledstva, Ivan Pałanievič viedaŭ, što Kuźniacoŭ-starejšy 15 kastryčnika 2010 vyhadna pradaŭ mašynu i što ŭnačy jon budzie dziažuryć na firmie, dzie lažać hrošy. Razam z Dyšlevičam jon pryjechaŭ u pasiołak Pryvolny, zastreliŭ Kuźniacova i, pahražajučy strelbaj Dyšleviču, jaki ŭ momant zabojstva siadzieŭ u mašynie, prymusiŭ taho dapamahčy jamu vynieści z budynka siejf z vyručkaj. Dyšlevič byŭ vymušany padparadkavacca. Matyŭ złačynstva — atrymać hrošy.

U vyniku Pałanieviča abvinavacili ŭ razboi (č. 3 art. 207 KK) i zabojstvie, źviazanym z razbojem (p. 12 č. 2 art. 139 KK), — heta «rasstrelny» artykuł. Dyšleviču pradjavili abvinavačvańni taksama ŭ razboi i dapamahańni ŭ zabojstvie, praŭda, apošniaje abvinavačvańnie potym źniali.

Asablivaść hetaj spravy ŭ tym, što Ivan Pałanievič praz paŭhoda paśla taho, jak zabili Kuźniacova, sam pamior — u traŭni 2011-ha. U suviazi z hetym śledstva chacieła spynić kryminalnuju spravu, ale maci Ivana vyrašyła damahčysia spraviadlivaści, kab jaje syna apraŭdali paśmiarotna. I śledstva pa spravie było adnoŭlenaje.

Jakija dokazy pa «rasstrelnym» artykule pradjaviła śledstva?

Spravu vioŭ śledčy pa asabliva važnych spravach upraŭleńnia SK pa Minsku Valdemar Bazilaŭskas. Abvinavačvańnie hruntujecca na piaci klučavych tezisach.

- U Pałanieviča i Dyšleviča nie było alibi na momant zabojstva Kuźniacova.

- Na paśviedčańni zabitaha byŭ znojdzieny śled palca Ivana Pałanieviča.

- Pałanievič viedaŭ, što Kuźniacoŭ u toj dzień vyhadna pradaŭ aŭto.

- Na siejfie znojdzienyja ślady epiteliju Dyšleviča.

- Dyšlevič na śledstvie pryznaŭ vinu i raskazaŭ, jak Pałanievič zabiŭ Kuźniacova.

Taksama ŭ jakaści arhumienta dziaržabvinavaŭca Alena Kiežun ukazała, što psichałahičnaja i psichołaha-linhvistyčnaja ekśpiertyza pakazała, što Dyšlevič pry dopytach naŭmysna skažaŭ i ŭtojvaŭ infarmacyju pa spravie.

Čamu sud apraŭdaŭ fihurantaŭ spravy?

Minski abłasny sud uvažliva vyvučyŭ arhumienty abvinavačańnia i abarony i pryjšoŭ da vysnovy, što vina Maksima Dyšleviča i niabožčyka Ivana Pałanieviča nie dakazana. I voś čamu.

- Zbroja tak i nie była vyjaŭlena.

- Pry pieratrusie doma ŭ abvinavačanych nie znajšli ni adnaho pradmieta, jaki b ukazvaŭ, što jany majuć dačynieńnie da ździajśnieńnia złačynstva.

- Na paśviedčańni, dzie znajšli adbitki Pałanieviča, byli vyjaŭlenyja adbitki i inšych supracoŭnikaŭ — byłych i ciapierašnich — firmy. Toje ž i pa vyjaŭlenych adbitkach Dyšleviča: na siejfie znajšli ślady i supracoŭnikaŭ kampanii, i niavyśvietlenych asob.

— Na pokryvie, u jakoje byŭ zachutany trup, a taksama na palčatkach znojdzienyja ślady «niavyśvietlenych asob», adnak ekśpierty adnaznačna śćviardžajuć, što hetyja ślady nie naležać ni Pałanieviču, ni Dyšleviču.

- Alibi było ŭ abodvuch fihurantaŭ. Advakat Dyšleviča Alaksiej Andryjevič nastajaŭ, kab zapatrabavali i vyvučyli telefonnyja złučeńni i miescaznachodžańni jaho padabaronnaha. U tuju noč Maksim ź siabrami spačatku byŭ u rajonie načnoha kłuba, potym pajechaŭ da dziaŭčyny dadomu. Heta paćvierdzili jak jaho znajomyja, tak i nieznajomyja jamu ludzi. Ivan Pałanievič u noč zabojstva byŭ razam sa svajoj dziaŭčynaj. Vyvučeńnie dadzienych jaho telefona pakazvaje, što jon byŭ u rajonie praśpiekta Niezaležnaści, a nie pasiołka Pryvolny. Abodva fihuranty daviedalisia pra złačynstva na nastupny dzień ad byłych kaleh pa telefonie.

- 13 śviedak u sudzie zajavili, što na ich cisnuli padčas śledstva. Tak, śviedka Burnosaŭ raspavioŭ, što jaho prymušali ahavaryć Ivana Pałanieviča, pracavali ŭ režymie «dobry i zły śledčy»: to pahražali, to davali «dobryja parady». Śviedka Udovica ž, namieśnik zabitaha, taksama zajaviŭ u sudzie, što jaho schilali dać pakazańni suprać «patrebnaha» śledstvu čałavieka, nahadvali, što jamu ŭžo niamała hadoŭ, što jon moža nikoli nie ŭbačyć svaju siamju, kazali, što jość pakazańni, što heta jon zabiŭ čałavieka.

- Maksim Dyšlevič u sudzie vinu nie pryznaŭ. Jon raspavioŭ, što padčas śledstva na jaho cisnuli, prymušali ahavaryć Pałanieviča, maŭlaŭ, jon užo miortvy, jamu ničoha nie budzie, a spravu prosta zakryjuć. Učora ŭ Viarchoŭnym sudzie abvinavačvany ŭdakładniŭ:

— Jany (pravaachoŭniki. — Zaŭvaha red.) viedali, što mianie tam nie było, im treba było, kab ja abhavaryŭ Pałanieviča, kab zakryć spravu. Tamu što treba ž raskryć zabojstva, a praściej za ŭsio zvalić usio na jaho, jon ža zahinuŭ ŭžo. Na mianie cisnuli. U mianie žonka była ciažarnaja tady, supracoŭnik milicyi K. pahražaŭ, što jaje buduć vyklikać na dopyty i daviaduć da vykidka. Jašče mianie abiacali pasadzić u pres-chatu, dzie pakazańni ź mianie buduć vybivać siłaj. U kamiery, dzie ja načavaŭ, było vosiem čałaviek, ja — dziaviaty, spaŭ na padłozie. «Smatračy» ŭvieś čas mianie pierakonvaŭ, što treba rabić toje, što ad mianie patrabujuć, inakš ź mianie realna vybjuć pakazańni i ja prosta ŭ kamiery ŭsio padpišu. A jašče ŭ kamiery kazali, što ja zmahu ŭ luby momant admovicca ad svaich pakazańniaŭ i mnie za heta ničoha nie budzie. Kali ja davaŭ pakazańni suprać Pałanieviča, advakata nie było (tady ŭ Dyšleviča byŭ inšy abaronca, nie Andryjevič. — Zaŭvaha red.), jon čamuści spaźniŭsia, pryjechaŭ, kali pałova dopytu ŭžo była zapisanaja.

Sudździa ŭdakładniŭ, čamu Dyšlevič nie sprabavaŭ abskardzić niezakonnyja dziejańni supracoŭnika milicyi.

— Ja bajaŭsia, kali budu damahacca praŭdy, budzie jašče horš. Mnie ž kazali: albo ty daješ pakazańni na Pałanieviča, albo ciabie vinavacim u zabojstvie i pasadzim na 20 hadoŭ.

Kab Dyšlevič byŭ bolš padatlivymi, pravaachoŭniki, pavodle jaho słoŭ, paabiacali jamu minimalnaje pakarańnie:

— Skazali, maksimum pryciahnuć za niedaniasieńnie ab złačynstvie (maksimalnaje pakarańnie, zhodna z KK, — da dvuch hadoŭ pazbaŭleńnia voli. — Zaŭvaha red.).

U pakazańniach Dyšleviča, jakija jon daŭ na etapie papiaredniaha śledstva, masa supiarečnaściaŭ: jon ukazaŭ, što bačyŭ trup u budynku firmy, adnak vysnovy ekśpiertaŭ kažuć pra toje, što cieła zabitaha tam znachodzicca nie mahło; śledčym zajaŭlaŭ, što zajšoŭ na terytoryju praz adkrytyja varoty, jakija na samaj spravie byli začynienyja na naviasny zamok; ukazvaŭ, što bačyŭ kroŭ na ścianie, ale ślady kryvi pa fakcie byli ŭ inšym miescy; kazaŭ, što pryjechaŭ z Pałanievičam na ​​«Maździe SCH7», adnak było vyśvietlena, što takoj mašynaj Ivan nikoli nie kiravaŭ; na dopytach uspaminaŭ, što trymaŭ siejf źnizu, choć jaho ślady byli vyjaŭlenyja ŭ inšym miescy.

Kuźniacoŭ byŭ zabity z palaŭničaj zbroi, adnak ni Dyšlevič, ni Pałanievič da palavańnia cikavaści nikoli nie prajaŭlali, ni ŭ adnaho, ni ŭ druhoha zarehistravanaj zbroi nie było, jak i ŭ ich svajakoŭ.

Rodnyja buduć damahacca, kab pravaachoŭnikaŭ pryciahnuli da adkaznaści

Syn zabitaha ŭ sudzie zajaŭlaŭ, što nie vieryć, što złačynstva ździejśnili jaho byłyja supracoŭniki.

Pavialičyć

— Ja naohuł nie razumieju, jak sprava z takimi «dokazami» mahła dajści da suda, — zajaviła ŭ Viarchoŭnym sudzie maci Ivana Pałanieviča. — Majho syna pryznali vinavatym u zabojstvie na padstavie pakazańniaŭ Dyšleviča, jakija vyklikajuć sumnievy, i ŭskosnych dokazaŭ — adbitkaŭ palcaŭ na paśviedčańni, a tam ža byli adbitki i inšych rabotnikaŭ. U Minskim abłasnym sudzie vielmi staranna vyvučyli spravu, vynieśli spraviadlivy, apraŭdalny prysud.

Pakul išło pasiadžeńnie ŭ Viarchoŭnym sudzie, mama Maksima Dyšleviča nie mahła strymać śloz. Było bačna, jak jana pieražyvaje za syna. Pra toje, što jaho prymušajuć ahavaryć kalehu i siabie, Maksim raspavioŭ rodnym jašče ŭ 2013 hodzie.

Viarchoŭny sud pakinuŭ u sile apraŭdalny prysud. I rodnyja Maksima Dyšleviča nie zmahli strymać śloz užo ad radaści. Takoje ŭ Biełarusi zdarajecca sapraŭdy vielmi redka. Ale heta jašče nie kaniec. Maksim budzie damahacca kampiensacyi za praviedzienyja 10 miesiacaŭ u SIZA. Kali ŭ jaho atrymajecca heta zrabić, hrošy jamu vypłaciać ź biudžetu. Sudovyja vydatki i srodki, zatračanyja na praviadzieńnie ekśpiertyz, taksama buduć kampiensavanyja ź biudžetu — kala 3 tysiač rubloŭ.

Rodnyja i Maksima, i Ivana płanujuć damahacca, kab byli pakaranyja pravaachoŭniki, jakija daviali spravu da suda.

— Mnohija nie vieryli, što my zmožam damahčysia spraviadlivaści, — kažuć jany. — Ale važna, kab vinavatyja adkazali pa zakonie. Bo sapraŭdny zabojca pa-raniejšamu na voli. Prajšło dzieviać hadoŭ, a jaho nichto nie znajšoŭ.

Apraŭdalny prysud ustupiŭ u siłu. Ciapier pravaachoŭniki pavinny adnavić rasśledavańnie pa spravie i znajści złačyncaŭ.

• 0
• 0
• 0
• 0
• 0
• 0
• 0
• 0