U Minsk prybyvaje delehacyja BDIPČ ABSIE na čale z dyrektaram biuro Janiezam Lanarčyčam.
22 studzienia ŭ Minsk z dvuchdzionnym vizitam prybyvaje delehacyja Biuro pa demakratyčnych instytutach i pravach čałavieka (BDIPČ) ABSIE na čale ź jaho dyrektaram Janiezam Lanarčyčam.
Jak paviedamlaje pres‑słužba BDIPČ ABSIE, hałoŭnaja meta vizitu —
abmierkavańnie rekamiendacyj pa palapšeńni biełaruskaha vybarčaha zakanadaŭstva,uklučanych u vynikovuju spravazdaču ABSIE ab parłamienckich vybarach, jakija prajšli ŭ Biełarusi ŭ vieraśni 2008 hoda.
Płanujecca, što Ja.Lanarčyč praviadzie pieramovy ź ministram zamiežnych spraŭ Siarhiejem Martynavym, kiraŭnikom Administracyi prezidenta Uładzimiram Makiejem, staršynioj Centralnaj kamisii pa vybarach i praviadzieńni respublikanskich refierendumaŭ Lidzijaj Jarmošynaj i inšymi vysokapastaŭlenymi biełaruskimi čynoŭnikami.
Dyrektar BDIPČ ABSIE taksama maje namier sustrecca z pradstaŭnikami palityčnych partyj i hramadzianskaj supolnaści.
Jak paviedamlałasia raniej, aficyjnaje zaprašeńnie naviedać krainu dla dyjałohu pa pytańniach udaskanaleńnia vybarčaha zakanadaŭstva i jaho pravaprymianialnaj praktyki MZS Biełarusi nakiravała kiraŭnictvu BDIPČ ABSIE ŭ śniežni.
****
U vynikovym dakładzie BDIPČ ab praviadzieńni parłamienckaj vybarčaj kampanii ŭ Biełarusi havorycca, što
niahledziačy na «niekatoryja palapšeńni», vybary nie adpaviadali standartam ABSIE.
Na dumku ekśpiertaŭ, biełaruskaje vybarčaje zakanadaŭstva nie daje mahčymaści dla «sapraŭdnaj palityčnaj kankurencyi i roŭnaha staŭleńnia da kandydataŭ z boku ŭładaŭ», «pieraškadžaje praviadzieńniu vybaraŭ» u adpaviednaści z demakratyčnymi standartami. Vybarčy kodeks Biełarusi «nie zabiaśpiečvaje prazrystaha miechanizmu zachavanaści skryniaŭ ź biuleteniami paśla pačatku daterminovaha hałasavańnia, a taksama miechanizmu abarony samoha biuletenia».
U dakładzie adznačajecca, što bolšaści apazicyjnych kandydataŭ było admoŭlena ŭ rehistracyi «z‑za niaznačnych parušeńniaŭ farmalnych patrabavańniaŭ».
Usio heta, na dumku BDIPČ, «stvaraje mahčymaści dla falsifikacyj».
Abjadnanyja demakratyčnyja siły Biełarusi nakiravali ŭ BDIPČ ABSIE svaje prapanovy ab źmienie vybarčaha zakanadaŭstva krainy.
Ciapier čytajuć
Śviatłana Cichanoŭskaja zaviała treds. Što joj pišuć biełarusy?7
Kamientary