Donald Tramp płanuje značna pašyryć paŭnamoctvy tak zvanaj Rady miru, jakuju pieršapačatkova prapanoŭvałasia stvaryć dla adnaŭleńnia siektara Haza. Ciapier, pavodle źviestak amierykanskich čynoŭnikaŭ, hety orhan pavinien stać hłabalnym i faktyčna zamianić saboj Radu biaśpieki AAN. Pra heta Tramp maje namier abviaścić na Suśvietnym ekanamičnym forumie ŭ Davosie, dzie čakajecca samaja pradstaŭničaja delehacyja ZŠA za ŭsiu historyju mierapryjemstva, piša Axios sa spasyłkaj na vysokapastaŭlenaha amierykanskaha čynoŭnika.
Zapłanavana, što ŭ čaćvier adbudziecca aficyjnaje abviaščeńnie Rady miru i padpisańnie jaje statuta. Zhodna z dakumientam, kiraŭnikom novaj struktury stanie sam Tramp, i tolki jon budzie mieć prava vieta na ŭsie rašeńni. Taki farmat vyklikaŭ niezadavolenaść u Jeŭropie: tam padkreślivajuć, što padčas papiarednich damoŭlenaściaŭ, u tym liku na sustrečy ŭ Šarm-el-Šejchu paśla spynieńnia vajny ŭ Hazie, pra taki orhan havorka nie išła.
Jak adznačajuć daradcy Trampa, jaho ŭpeŭnienaść u siłavoj palitycy ŭzmacniłasia paśla paśpiachovaj apieracyi suprać vieniesuelskaha lidara Nikałasa Madura. Pry hetym u Biełym domie śćviardžajuć, što prezident nie imkniecca da suśvietnaha panavańnia: hałoŭnym pryjarytetam dla jaho zastajucca intaresy ZŠA, jakija, na jaho dumku, usio adno zastajucca viadučaj dziaržavaj śvietu.
U statucie Rady miru havorycca pra stvareńnie hnutkaha i efiektyŭnaha mižnarodnaha miechanizmu dla ŭrehulavańnia kanfliktaŭ, biez zhadvańnia AAN ci Hazy. Dakumient zaklikaje farmavać kaalicyju krain, hatovych da praktyčnych i chutkich dziejańniaŭ, i krytykuje najaŭnyja padychody, jakija, na dumku aŭtaraŭ, tolki zamacoŭvajuć kryzis, a nie vyrašajuć jaho.
Šerah krain užo admoviŭsia dałučycca da inicyjatyvy. Francyja zajaviła, što nie budzie ŭdzielničać u Radzie, dzie pastajannyja členy pavinny ŭnieści pa miljardzie dalaraŭ. Pavodle ŚMI, Vialikabrytanija, Hiermanija, Niderłandy, Šviecyja i Kanada taksama nie płanujuć dałučacca i buduć ihnaravać cyrymoniju padpisańnia. Niehatyŭna da idei pastaviŭsia i Izrail. U toj ža čas hatoŭnaść udzielničać vykazali Arhiencina, Maroka, Katar i Indaniezija. Usiaho Tramp zaprasiŭ u Radu 58 lidaraŭ dziaržaŭ.
Na fonie sprečak pamiž ZŠA i Jeŭropaj vakoł Hrenłandyi i inicyjatyvy z Radaj miru ŭkrainskaja tematyka na Davoskim forumie, imavierna, adydzie na druhi płan. Ukrainski bok paviedamiŭ, što padpisańnie płana adnaŭleńnia i ekanamičnaha raźvićcia Ukrainy było adkładziena. U Vašynhtonie heta tłumačać tym, što dakumient jašče patrabuje dapracoŭki, i istotnych praryvaŭ pakul nie čakajecca, chacia sustrečy Trampa z Uładzimiram Zialenskim i jeŭrapiejskimi lidarami ŭsio ž zapłanavanyja.
Pavodle słoŭ ukrainskich čynoŭnikaŭ, jeŭrapiejskim delehacyjam u apošni momant daviałosia pierahladać svaju pazicyju i rychtavacca da abmierkavańnia ŭžo nie Ukrainy, a pytańniaŭ, źviazanych z Hrenłandyjaj.
Tramp admianiŭ padpisańnie ŭ Davosie padpisańnie pahadnieńnia ab pavajennym adnaŭleńni Ukrainy na 800 miljardaŭ dalaraŭ
Zialenski prakamientavaŭ zaprašeńnie Ukrainy ŭ Radu miru razam ź Biełaruśsiu i Rasijaj
Tramp zaprasiŭ u Radu pa Hazie 50 krain, u tym liku Rasiju, Ukrainu, Kitaj, Polšču i Biełaruś
Makron adchilić zaprašeńnie Trampa ŭvajści ŭ skład Rady miru
Džon Koŭł: U kančatkovym vyniku meta vieści biznes ź Biełaruśsiu, viarnuć jaje ŭ mižnarodnuju supolnaść
Kamientary
Amiń !