Dyrektar BDIPČ ABSE Janez Lenarčyč abmiarkoŭvaŭ z pradstaŭnikami ŭładaŭ i apazicyi pierśpiektyvy reformy biełaruskaj vybarčaj sistemy.
Zaviaršajecca vizit u Biełaruś dyrektara Biuro ABSIE pa demakratyčnych instytutach i pravach čałavieka Janeza Lenarčyča. Jon abmiarkoŭvaŭ z pradstaŭnikami ŭładaŭ i apazicyi pierśpiektyvy reformy biełaruskaj vybarčaj sistemy.
U pieršy dzień vizitu Janez Lenarčyč pravioŭ pieramovy z kiraŭnikom Administracyi prezidenta Ŭładzimiram Makiejem. Jak paviedamlaje radyjo «Svaboda», baki vykazalisia «za praktyčnaje ŭzajemadziejańnie». Radyjo infarmuje taksama, što pra hatoŭnaść «da dyjałohu ŭ pytańniach udaskanaleńnia praktyki padrychtoŭki i praviadzieńnia vybaraŭ, a taksama, pry patrebie, udaskanaleńnia vybarčaha zakanadaŭstva» zajaviła i kiraŭnictva Centrvybarkamu. Pavodle sakratara Centralnaj kamisii pa vybarach Mikałaja Łazavika, Lenarčyč vykazaŭ razumieńnie, što nie ŭsie prapanovy BDIPČ ABSIE buduć poŭnaściu pryniatyja biełaruskim bokam.
U čaćvier uviečary pradstaŭniki ŭładaŭ i apazicyi byli zaprošanyja na pryjom z udziełam delehacyi BDIPČ.
A ŭ piatnicu adbyłasia sustreča Lenarčyča ź liderami apazicyi. Sustreča doŭžyłasia paŭtary hadziny.
Lenarčyč paviedamiŭ prysutnym, što jość niekatoryja prykmiety najaŭnaści žadańnia i voli biełaruskich uładaŭ mianiać vybarčaje zakanadaŭstva. Ale jamu padajecca, što ŭłady nie prychilniki radykalnych i chutkich źmienaŭ.
Heta moža aznačać, što ŭłady pa‑raniejšamu prapanujuć kaśmietyčnyja źmieny — kštałtu źmieny kolkaści dzion daterminovaha hałasavańnia. Adnak nie dapuskajuć takich źmienaŭ, jakija b pryviali da viartańnia dziaržaŭnaha ładu da pryncypu padziełu ŭładaŭ na vykanaŭčuju, zakanadaŭčuju i sudovuju.
Prapanujem Vašaj uvazie fotarepartaž Julii Daraškievič z sustrečy Lenarčyča z apazicyjaj.
Kamientary