Ukrainski deputat, jaki apiekavaŭsia biełarusami-dobraachvotnikami, tryumfalna pieraabraŭsia ŭ Radu

Partyja prezidenta Uładzimira Zialenskaha tryumfuje: jana zabiraje absalutnuju bolšaść deputackich miescaŭ i zmoža sfarmiravać urad biez kaalicyi i biez patreby abapiracca na «samavysuvancaŭ» — niezaležnych kandydataŭ.

U mažarytarnych akruhach kandydaty ad «Słuhi narodu» vyjhrajuć 128 z 199 miescaŭ, a ŭsiaho prezidenckaja partyja atrymaje 251 z 424 mandataŭ.

Pavodle partyjnych śpisaŭ abirajecca 225 deputataŭ, jašče 199 praz mažarytarnuju sistemu. 26 deputackich miescaŭ zastajucca vakantnyja: heta akruhi akupavanych Kryma i ŭschodniaha Danbasa.

A jašče prachodzić u parłamient ź viadomych u Biełarusi ludziej?

Na Vałyni pieramahaje Ihar Huź, jaki apiekavaŭsia biełarusami-dobraachvotnikami z taktyčnaj hrupy «Biełaruś» i atrada «Pahonia». Huź, pavodle papiarednich vynikaŭ, nabiraje 59% hałasoŭ. Heta tryumfalny vynik — adzin z samych vysokich vynikaŭ pa ŭsioj Ukrainie. Huź pačynaŭ palityčnuju karjeru z nacyjanalistačnaj moładzievaj supołki «Nacyjanalny aljans», a ŭ 2014 hodzie abraŭsia ŭ parłamient ad Narodnaha Frontu Arsienia Jacaniuka. Sioleta jon išoŭ u Viarchoŭnuju Radu jak samavyłučeniec. Va ŭmovach, kali ŭ parłamiencie prysutnaść nacyjanalistaŭ budzie minimalnaja, Huź moža stać hołasam pravych sił u Radzie. Jahonaja papularnaść u akruzie tłumačycca karpatlivaj pracaj z vybarcami. Huź šmat rabiŭ na nizavym uzroŭni dla haradoŭ i viosak i za svaju kadencyju abjechaŭ usie nasielenyja punkty akruhi.

U Kijevie sprabavaŭ abracca ŭ Radu były pasoł Ukrainy ŭ Biełarusi Raman Biaśśmiertny. Jon idzie 4-m z 30 kandydataŭ, a nabiraje kala 12% hałasoŭ. Va ŭsich akruhach Kijeva pieramahajuć kandydaty ad «Słuhi narodu».

12% nabiraje ŭ inšaj akruzie Kijeva i viadomy ŭkrainski žurnalist Siarhiej Leščanka. Heta 3-je miesca ŭ akruzie. U minułuju Radu jon abraŭsia pa śpisie Błoka Piatra Parašenki, ale z časam staŭ jaho zaciatym krytykam i hetym razam bałatavaŭsia jak niezaležny kandydat. Inšy žurnalist, Mustafa Najem, u Radu hetym razam nie išoŭ.

Pakinuć deputackija kresły kolišni kiraŭnik «Pravaha siektara» Dmytro Jaraš i kamandzir «Azova» Andrej Bilecki. Jany bałatavalisia pa śpisie «Svabody», jaki nabiraje 2,3% hałasoŭ i nie adolvaje 5-pracentavy barjer. Ad «Svabody» pakul prachodzić tolki adzin deputat-mažarytarnik.

Nastupnyja vybary, jakija pa hrafiku majuć prajści ŭ 2024 hodzie, majuć adbycca całkam pa partyjnych śpisach. Hetaha daŭno dabivałasia hramadzianskaja supolnaść Ukrainy, kab pazbycca biznesoŭcaŭ-mažarytarnikaŭ, jakija mieli praźmierny ŭpłyŭ na ŭkrainskuju palityku.

U vybarčym śpisie «Jeŭrapiejskaj salidarnaści» ŭ Radu prachodziać dva lidary krymskich tatar — naroda, jaki nie pryniaŭ anieksii Kryma Rasijaj i zachoŭvaje viernaść Ukrainie. Heta Mustafa Džemileŭ i Achtem Čyjhoz.

«Słuha naroda» zajmaje centrysckija pazicyi na ŭkrainskaj palityčnaj scenie. Dźvie najbolš prajeŭrapiejskija i pranacyjanalnyja siły — heta «Jeŭrapiejskaja salidarnaść» i «Hołas».

* * *

Udakładnieńnie. U raniejšaj viersii artykuła taktyčnaja hrupa pamyłkova była nazvanaja «Pahonia», a atrad nie ŭzhadvaŭsia.

• 0
• 0
• 0
• 0
• 0
• 0
• 0
• 0