Čečenski padletak 46 chvilin prasiŭ prabačeńnia ŭ efiry za krytyčnyja kamienty ŭ internecie

Pa Hroźnienskim telebačańni pakazali padletka, jaki płakaŭ. Jon pisaŭ krytyčnyja kamientary pra ŭładu.

Siužet, u jakim 16-hadovy Mahamied Achmataŭ ślozna prosić prabačeńnia, doŭžycca 46 chvilin. Chłopčyk raspaviadaje, što pavieryŭ tym, chto žyvie ŭ Jeŭropie i Siryi, i pisaŭ pra toje, čaho niama. Muftyj Čačni adčytvaje Achmatava z cełym stosam razdrukavanych kamientaroŭ, maci i dziadźka kažuć, što nie ŭsačyli, Ramzan Kadyraŭ patrabuje ŭzmacnić pracu ŭ sacsietkach.

«Mała chto pavieryŭ by, što śmieły pravaborac u žyćci vyhladaje voś tak», — kaža zakadravy hołas, paśla čaho pakazvajuć padletka, jaki rydaje. «Ja vielmi raskajvajusia, mianie padmanuli ŭ internecie. Ja pasprabuju, kab bolš takoha nie paŭtarałasia. Ja prašu prabačeńnia va ŭsiaho čačenskaha naroda», — kaža skroź ślozy Achmataŭ. «Heta i jość naš internet-prapaviednik», — reziumuje karespandent.

U sacsietkach Achmataŭ abvinavačvaŭ ułady Čačni ŭ vieraadstupnictvie i ŭ karupcyi: «Ja skradu ŭ vas miljardy i taksama padaru vam 50 kvater», — piša padletak u adnym z kamientaroŭ.

Za dva dni da taho, jak Achmatava pakazali pa čečenskim telebačańni, padletka zhadaŭ Ramzan Kadyraŭ. U čas sustrečy ź ministram druku Kadyraŭ raspavioŭ, što Achmataŭ nazyvaŭ jaho (Kadyrava) kafiram (niaviernym), murtadam (vieraadstupnikam) i inšymi słovami.

«Učora znajšli, pryviali, dumaŭ, što nie znojdziem u «Instahramie», — kaža pra padletka kiraŭnik Čačni. — Pry razhladzie akazałasia, što siamja ledź zvodzić kancy z kancami, baćki niama, niaščasnaja maci».

Pa słovach aŭtara siužetu, Achmatava znajšli z dapamohaj pravaachoŭnych orhanaŭ. Pra toje, što čakaje padletka paśla vykryćcia, u siužecie nie skazana.

U siužecie supracoŭnik čačenskaha Centra pa prafiłaktycy ekstremizmu, siedziačy śpinaj da kamiery, kaža, što viedamstva pastajanna sočyć za ludźmi, jakija zajmajucca ekstremisckaj i terarystyčnaj dziejnaściu.

Advakat Anton Žaraŭ u razmovie ź Bi-bi-si skazaŭ, što kryminalny kodeks nie zabaraniaje płakać pierad kamierami, ale jość mižnarodnyja abaviazacielstvy Rasii — Kanviencyja ab pravach dziciaci, Piekinskija praviły, Kanviencyja ab pravach čałavieka i mnohija inšyja.

«Luboje pravasudździe dla niepaŭnaletnich pavinna budavacca z razumnaj stupieńniu tajamnicy», — kaža jon. Advakat śćviardžaje, što navat kali dzicia ździejśniła pravaparušeńnie, jaho pavinny karać pa peŭnych praviłach. Praviły hetyja, pa słovach jurysta, u tym, što kamiera nie pavinna prysutničać ni na kamisii pa spravach niepaŭnaletnich, ni ŭ sudzie.

Žaraŭ ličyć, što heta historyja nie pra administracyjna-pravavy składnik, a pra bulinh. «Heta vielmi padobna na toje, kali nastaŭnica prymušaje papierku ​​źjeści pierad usim kłasam. U XXI stahodździ heta zusim za miažoj dabra i zła», — adznačaje jon. Juryst ličyć, kiraŭnik rehijonu jak harant kanstytucyi, pavinien skazać, što takija rečy niedapuščalnyja.

Mahamied Achmataŭ — samy juny z usich, chto prasiŭ prabačeńnia za krytyku Kadyrava. Hierojami videa z vybačeńniami pierad kiraŭnikom Čačni ŭ rozny čas stanavilisia žychary Čačni, błohiery i deputaty.

• 0
• 0
• 0
• 0
• 0
• 0
• 0
• 0