U Biełarusi novy hałoŭny złodziej u zakonie: raniejšy źbieh z krainy

«Ułada ŭ kryminalnym śviecie Biełarusi biez boju ŭstuplena «dubajcam», chrośnikam kłana Anijani-Džanhvieładze.

Były hałoŭny złodziej RB Saša Kušnier u dzień vyrašalnaj «strełki» z apanientam źbieh u Turcyju i da hetaha času nie adkazaŭ na kinuty vyklik. Za jaho hałavu abiacanaja zładziejskaja karona», — takija naviny paviedamlaje rasijskaje infarmacyjnaje ahienctva «Prajm Krajm».

Pavodle krynic ahienctva, novym «hałoŭnym» biełaruskim złodziejem ŭ zakonie staŭ žychar Słucka 45-hadovy Aleh Hierasimovič, viadomy ŭ kryminalnym śviecie pad mianuškami Mumu i Aleh Słucki. Hierasimovič byŭ «karanavany» ŭ śniežni 2012 hoda razam ź minčukom Paŭłam Alaksiejevičam, jon ža Paštet, žycharom Barysava Rusłanam Lebiedzievym, jon ža Lebiedź, i hamielčukom Alaksandram Miadźviedzievym pa mianušcy Miedźviedziania. Status złodziejaŭ u zakonie jany atrymali na schodcy ŭ Dubai, adsiul i vyraz «dubajskaja čaćviorka». Ich «chrosnymi baćkami» vystupili biełaruskija «zakońniki» sa stažam, što kanfliktavali z kłanam Dzieda Chasana, — uradženiec Homiela Alaksandr Cimašenka i Dźmitryj Halejeŭ, jany ž — Cimocha i Halej. Cimochu zastrelili ŭ mai 2013 hoda ŭ Padmaskoŭi, a Halej siadzić — u sakaviku 2014 jon atrymaŭ 10 hadoŭ strohaha režymu za vymahalnictva.

Dzied Chasan «karanavaŭ» Alaksandra Kušnierava viasnoj 2011 hoda, pryznačyŭšy jaho pry hetym «smatraščym» za Biełaruśsiu. Mižkłanavaje zładziejskaje supraćstajańnie, naturalna, adbiłasia na ŭzajemaadnosinach biełaruskich «zakońnikaŭ». Kožny z bakoŭ adzin adnaho nie pryznavaŭ i pryznačaŭ u rehijonach svaich «smatraščych». Da surjoznych razborak sprava nie dachodziła, było niekalki kanfliktnych situacyj, ale biez kryvi.

Baki źbirali schodki, prymali rašeńni ŭ dačynieńni da svaich vorahaŭ i nakiroŭvali kurjerskaj poštaj va ŭsie baki prahony. Aŭtarytetnyja padpisanty zajaŭlali ab niepryznańni zładziejskich paŭnamoctvaŭ svaich kankurentaŭ, maŭlaŭ, «jany nichto, i zvać ich nijak», i pahražali adzin adnamu karaj niabiesnaj i ziamnoj. Tak by mović, viali infarmacyjnuju vajnu.

Saša Kušnier padpisvaŭ kalektyŭnyja prahony suprać Cimochi, Haleja i «dubajskaj čaćviorki», jakija adkazvali tym ža. Pry hetym Kušnier i sam pisaŭ padobnyja prahony, adrasujučy ich biełaruskaj bratvie. U adnym ź ich jon usich šaściarych kankurentaŭ nazvaŭ «nieludźmi» i jašče vielmi drennym słovam, za jakoje ŭ kryminalnym śviecie mohuć i žyćcia pazbavić. Vosieńniu minułaha hoda Saša Kušnier «vydaŭ» čarhovaje pasłańnie sa zhadvańniem Haleja i «dubajskaj čaćviorki».

«Ale zahubiła Kušniera nie źniešniaja fronda, a ŭnutranyja zvady, — piša «Prajm Krajm». — Viasnoj z-za ŭźnikłych roznahałośsiaŭ nakont kasy ad Kušniera adyšli jaho bližejšyja «smatraščyja», na jakich arhanizacyjna zamykałasia ŭsia bratva, i pradjavili jamu pretenzii. 4 maja milicyja niejtralizavała adnaho z tych, chto adkałoŭsia — Sašu Šulca, byłoha «smatraščaha» za Biełaruśsiu, jaki jechaŭ na razborku da Kušniera. Paśla hetaha, znajšoŭšy spryjalny momant, da situacyi padklučylisia hruzinskija «chrosnyja baćki» źniasłaŭlenych «dubajcaŭ», i paklikali Kušniera ŭ Turcyju. 17 červienia, paśla taho, jak Kušnier ŭ čarhovy raz nie źjaviŭsia na sustreču, Koba Achvledzijani skazaŭ jamu pa telefonie, kab jon złodziejem nie nazyvaŭsia».

Vidavočna, što hetym vypadkam vyrašyŭ skarystacca Aleh Słucki, adziny biełaruski «zakońnik» na svabodzie. Pavodle «Prajm Krajm», jon na 5 lipienia pryznačyŭ Kušnieru sustreču, to-bok «zabiŭ strełku», kab spytać z taho za abrazy. Razborka pavinna była adbycca ŭ lesie, z boku Kušnierava ŭ joj mieli namier uziać udzieł 30-40 čałaviek, Mumu rychtavaŭsia padciahnuć bolš za sotniu bajcoŭ. Ale «strełka» nie adbyłasia, zdaryłasia niespadziavanaje, ale zbolšaha čakanaje.

Pavialičyć

Hatovych adpravicca na razborku «kušnieraŭskich» paviazała milicyja, ich tradycyjna zatrymali dla vyśviatleńnia asoby i ŭsich adpuścili. Adnak siarod zatrymanych nie akazałasia pravadyra — Saša Kušnier śpiešna palacieŭ u bok Turcyi.

«Prajm Krajm» śćviardžaje, što ŭsia jaho bryhada ŭspryniała hety ŭčynak jak zdradu i ŭ poŭnym składzie pierajšła na bok Aleha Słuckaha. Dzie Kušnier zaraz — nieviadoma, ale ŭ Biełarusi jaho niama. Nie vyklučana, što ŭ hetaj situacyi jon pasprabuje atrymać padtrymku złodzieja ŭ zakonie Łołu Huli, da kłana jakoha jon prybiŭsia niekalki hadoŭ tamu i, dziakujučy jakomu zmoh adnavić status złodzieja ŭ zakonie. Taksama ahienctva śćviardžaje, što złodziei kłana Anijani-Džanhvieładze, što znachodziacca ŭ Turcyi, navat pryznačyli za hałavu Sašy Kušniera ŭznaharodu — zładziejskuju «karonu».

• 0
• 0
• 0
• 0
• 0
• 0
• 1
• 0