Abvieščany doŭhi śpis premii Natalli Arsieńnievaj — za najlepšuju paetyčnuju knihu

Žury premii Natalli Arsieńnievaj vyznačyłasia z doŭhim śpisam pretendentaŭ na ŭznaharodu. U jaho ŭvajšli:

Uładzimier Arłoŭ «Paručnik Piatrovič i praparščyk Zdań». Vydaviectva «Knihazbor», Minsk.

Nadzieja Artymovič «Krajavid ź nievidočnaj pamyłkaj». Vydaviectva «Prahramnaja rada tydniovika «Niva»», Biełastok.

Viera Burłak «Fantaziurki». Vydaviectva «Halijafy», Minsk.

Maryja Martysievič «Sarmatyja». Vydaviectva «Januškievič», Minsk.

Kaciaryna Mase «Biełanoč». Vydaviectva «Čatyry čverci», Minsk.

Aleh Minkin «Mianie tut nie było». Vydaviectva «Knihazbor», Minsk.

Ludka Silnova «Matylok na kary dreva». Vydaviectva «Januškievič», Minsk.

Halina Siŭčanka «Zoŭ zvyčaju». Vydaviectva «Miedysont», Minsk

Uładzimir Ściapan «Papiarovaja šapka». Vydaviectva «Knihazbor», Minsk.

Viktar Siamaška «Romb». Vydaviectva «Agencja Wydawnicza Ekopress», Biełastok.

U minułyja hady doŭhi śpis u premii za najlepšuju knihu paezii nie praduhledžvaŭsia, ale sioleta była rekordnaja kolkaść zajavak — 27 knih. Tamu arhakamitet premii i siabry žury vyrašyli dadatkova stvaryć doŭhi śpis, kab adznačyć usie vartyja paetyčnyja zborniki z poŭnaha śpisa.

Karotki śpis premii budzie viadomy naprykancy žniŭnia, a pieramožca budzie nazvany na cyrymonii ŭznaharodžańnia, jakaja adbudziecca 10 vieraśnia (čas i miesca ŭručeńnia premii ŭdakładniajucca).

U skład žury premii sioleta ŭvajšli paet i zahadčyk litaraturnaha muzieja Maksima Bahdanoviča Michaił Baranoŭski, paetka, pierakładčyca i litaraturaznaŭca Maryjana Kijanoŭskaja, litaraturaznaŭca i doktar fiłałahičnych navuk Anžeła Mielnikava, paetka i bard Lera Som, paet i arhanizatar litaraturnych mierapryjemstvaŭ Dźmitryj Strocaŭ.

«U doŭhi śpis premii patrapili nie ŭsie knihi, jakija siabry žury adznačyli dla siabie. Z adnaho boku, heta dobra, bo sapraŭdy było z kaho vybirać, ź inšaha — nie ŭsie vartyja ŭvahi paetyčnyja zborniki prajšli dalej. Ale heta premija, i jana vymušaje rabić vybar. Zaprašaju bližej paznajomicca z knihami-naminantami — upeŭnieny, što vy znojdziecie siarod ich svajho aŭtara», — dzielicca svaim mierkavańniem siabra žury Michaił Baranoŭski.

Arhanizatary premii — Biełaruski PEN-centr, HA «Sajuz biełaruskich piśmieńnikaŭ» i Zhurtavańnie biełarusaŭ śvietu «Baćkaŭščyna». Uznaharoda ŭručajecca pry padtrymcy Fonda kultury i adukacyi Orsa-Ramana i Charytatyŭnaha fonda Zhurtavańnia biełarusaŭ Vialikaj Brytanii.

Premija zasnavanaja ŭ honar biełaruskaj paetki Natalli Arsieńnievaj (1903—1997) u 2017 hodzie i ŭručajecca za najlepšuju paetyčnuju knihu na biełaruskaj movie. Pieršym łaŭreatam premii staŭ Uładzimir Niaklajeŭ za zbornik paezii «Tolki vieršy», druhim — Aleś Razanaŭ z knihaj «Pieravybranaje».

• 0
• 0
• 0
• 0
• 0
• 0
• 0
• 0