Namieśnik dziaržsakratara ZŠA Devid Chiejł pozna ŭviečary 17 vieraśnia pravioŭ sustreču z pradstaŭnikami hramadzianskaj supolnaści i apazicyjnych palityčnych sił Biełarusi. «Kab vykazać ćviorduju prychilnaść Amieryki da abarony čałaviečaj hodnaści i fundamientalnych demakratyčnych pryncypaŭ», — havorycca ŭ aficyjnym paviedamleńni amierykanskaha pasolstva.
Na sustrečy prysutničali lidar BNK Mikałaj Statkievič, były kiraŭnik Biełarusi Stanisłaŭ Šuškievič, pradstaŭniki BCHD Pavieł Sieviaryniec i Vital Rymašeŭski, lidary Partyi BNF Ryhor Kastusioŭ i Alaksiej Janukievič, staršynia «Spraviadlivaha śvietu» Siarhiej Kalakin, deputatki Pałaty pradstaŭnikoŭ Alena Anisim i Hanna Kanapackaja, pradstaŭnik «Havary praŭdu» Andrej Dźmitryjeŭ, pravaabaroncy Aleś Bialacki i Valancin Stefanovič.
Mikałaj Statkievič i Stanisłaŭ Šuškievič mieli mahčymaść pravieści karotkuju razmovu sa spadarom Chiejłam. «Sustreča była karotkaj, nas adrazu papiaredzili, što času mała, tamu piersanalnaja razmova budzie tolki z dvuma pradstaŭnikami demakratyčnych siłaŭ — mnoj i Stanisłavam Šuškievičam», — raskazvaje Mikałaj Statkievič.
«Ja padziakavaŭ spadaru Chiejłu, što jon sustrakajecca nie tolki z Łukašenkam, ale i ź jahonymi praciŭnikami. Ja skazaŭ, što dla 80—90% biełarusaŭ, jakija ciapier suprać Łukašenki, vielmi važny fakt hetaj sustrečy. Važna, što Amieryka staić na svajoj pazicyi padtrymki demakratyi i svabody pa ŭsim śviecie.
Sam spadar Chiejł u svaim vystupie skazaŭ ab pazityŭnaści rašeńnia pra pasolstva. Maŭlaŭ, budzie bolš ludziej, jakija zmohuć pracavać i z hramadzianskaj supolnaściu. Jon paćvierdziŭ maralnuju pazicyju ZŠA ab tym, što kaštoŭnaści svabody zastajucca niaźmiennymi», — adznačyŭ lidar BNK.
Namieśnik dziaržasakratara ZŠA Devid Chiejł naviedvaŭ Biełaruś 17 vieraśnia. Jon pravioŭ sustreču z Alaksandram Łukašenka, a taksama naviedaŭ uročyšča Kurapaty, dzie ŭskłaŭ kvietki.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary