Ministr ekanomiki: Publikacyja płana intehracyi Biełarusi i Rasii moža stvaryć hlebu dla manipulacyj
Deputat Pałaty pradstaŭnikoŭ Alena Anisim atrymała adkaz na svoj zapyt, skiravany da premjer-ministra Siarhieja Rumasa. U im jana prasiła nadrukavać dakumienty, što tyčać płana intehracyi ŭ ramkach Sajuznaj dziaržavy, i byli padpisanyja 6 vieraśnia ŭ Maskvie na sustrečy z rasijskim premjeram Dźmitryjem Miadźviedzievym.
«Toje, što praces abmierkavańnia intehracyjnych pracesaŭ na praciahu doŭhaha času adbyvajecca za «začynienymi dźviaryma», vyklikaje rost zaniepakojenaści ŭ hramadstvie», — adznačyła Alena Anisim.
Ad imia Siarhieja Rumasa adkazaŭ ministr ekanomiki Dźmitryj Kruty. U adkazie jon zaznačyŭ, što mierapryjemstvy pa pahłybleńni intehracyi pamiž Biełaruśsiu i Rasijaj ździajśniajucca na padstavie rašeńnia refieriendumu ŭ mai 1995 hoda i ŭ adpaviednaści ź mižnarodnymi abaviazacielstvami Biełarusi. Hetyja abaviazacielstvy źjaŭlajucca adkrytymi dla hramadskaści, jany ŭtrymlivajucca ŭ Damovie ab stvareńni Sajuznaj dziaržavy ad 8 śniežnia 1999 hoda i «dalej za ich intehracyja siahać nie moža».
Razam z tym prajekt Prahramy dziejańniaŭ Biełarusi i Rasii pa realizacyi pałažeńniaŭ Damovy maje status pracoŭnaha, bo maje być zaćvierdžany prezidentami ŭ śniežni 2019 hoda, razam z pakietam adpaviednych darožnych kart.
Dźmitryj Kruty adznačaje, što praca pa padrychtoŭcy hetych kart tolki pačałasia. Mienavita ŭ ich budzie ŭtrymlivacca detalizacyja ekanamičnych damoŭlenaściaŭ pamiž bakami.
«Tamu publikacyja prajekta Prahramy ŭ adsutnaści pakieta kart supiarečyła b ahulnapryniataj u śviecie praktycy arhanizacyi pieramovaŭ, a taksama mahła b stvaryć hlebu dla infarmacyjnych manipulacyj i farmavańnia ŭ hramadstvie skažonych ujaŭleńniaŭ adnosna intehracyjnaha pracesu», — padkreśliŭ ministr.
«Pa daručeńni premjer-ministra zapeŭnivaju Vas, što dakumienty, nad jakimi my pracujem, nie ŭtrymlivajuć nijakaha palityčnaha kampanientu i nie stvarajuć pahroz dla suvierenitetu i niezaležnaści našaj Radzimy — Respubliki Biełaruś», — reziumuje Dźmitryj Kruty.
Ciapier čytajuć
Mihrancki kryzis, arhanizavany Łukašenkam, — usio? Voś što pakazvajuć ličby1
Kamientary