Pieršaja sustreča prezidentaŭ Biełarusi i Ukrainy Alaksandra Łukašenki i Uładzimira Zialenskaha adbudziecca siońnia ŭ Žytomiry, dzie 3-4 kastryčnika prachodziać mierapryjemstvy druhoha forumu rehijonaŭ dźviuch krain, paviedamlaje BiełTA.
Čakajecca, što kiraŭnik biełaruskaj dziaržavy ŭ pieršaj pałovie dnia prybudzie ŭ Žytomir z rabočym vizitam. Spačatku zapłanavany pieramovy z ukrainskim lidaram. Zatym prezidentaŭ čakajuć na plenarnym pasiadžeńni II Forumu rehijonaŭ Biełarusi i Ukrainy, dzie zapłanavany vystupleńni Alaksandra Łukašenki i Uładzimira Zialenskaha.
Napiaredadni ŭ Žytomiry prajšoŭ vielmi nasyčany pieršy dzień forumu.
Centralnaj padziejaj dla biźnies-paradku dnia stała pasiadžeńnie kansultatyŭnaha savieta dziełavoha supracoŭnictva, paśla zaviaršeńnia jakoha biełaruskija i ŭkrainskija partniory padpisali čatyry dziasiatka damoŭlenaściej na ahulnuju sumu bolš za $ 540 młn.
Adbyłasia taksama aficyjnaja sustreča kiraŭnikoŭ rehijonaŭ Ukrainy i Biełarusi z kiraŭnikom Žytomirskaj abłasnoj dziaržaŭnaj administracyi. Asabliva na joj hučała tema adnaŭleńnia sudnachodstva pa Dniapry na terytoryi Ukrainy.
Pa prajekcie ŭ Biełarusi płanavałasia budaŭnictva porta «raka-mora» na hłybakavodnym učastku Dniapra kala vioski Nižnija Žary Brahinskaha rajona, praktyčna na miažy z Ukrainaj. Ideja prajekta składajecca ŭ tym, kab zahružać na terytoryi Biełarusi sudny źmiešanaha kłasu, jakija zmohuć dastaŭlać hruzy praz Čornaje mora ŭ krainy Jeŭropy, Azii i Afryki. Takomu sudnu nie spatrebiacca dadatkovyja pieravałki ŭ marskich partach, što istotna źnižaje canu dastaŭki.
Na sustrečy z pradstaŭnikami ŭkrainskich ŚMI Alaksandr Łukašenka taksama zajaŭlaŭ, što ŭ paradku dnia jaho pieramoŭ z Uładzimiram Zialenskim buduć pytańni ekanomiki i realizacyi sumiesnych prajektaŭ. «Naprykład (heta nie hałoŭnaje), rakietabudavańnie - dla nas heta važnaja tema. My sami ŭžo pačali budavać novuju rakietu, ale ŭ nas nie chapaje kampietencyj, daśviedčanych ludziej. Jany jość u vas. Nam ža nie treba mižkantynientalnuju rakietu budavać. Čamu nie abmierkavać hety prajekt i nie dać śpiecyjalistam daručeńnie na prapracoŭku, - skazaŭ kiraŭnik dziaržavy. - Vielmi važnaje dla vas i dla nas pytańnie vuhlevadarodaŭ».
Alaksandr Łukašenka pa čas razmovy z pradstaŭnikami ŚMI adznačaŭ, što hetaja sustreča z Uładzimiram Zialenski daść mahčymaść nie prosta paznajomicca asabista, ale i lepš zrazumieć i daviedacca pazicyju adzin adnaho pa tych ci inšych pytańniach.
Čakajecca, što ŭ zaviaršeńnie forumu rehijonaŭ taksama budzie padpisany šerah dvuchbakovych dakumientaŭ.
Ciapier čytajuć
Alimpijski čempijon Aramnaŭ: Nam vyhadnaja praciahłaja vajna, i Vova dy Saša ŭ joj pieramohuć24
Kamientary