Šachciory ŭ Lubanskim rajonie zastalisia biez dapłat i dadatkovaj piensii, bo farmalna ich najmali niemcy. Jak tak?
U Lubanskim rajonie ciapier budujecca Niežynski horna-abahačalny kambinat. Prachodku šachtnych stvałoŭ vykonvaje niamieckaja kampanija Deilmann-Haniel. Miascovyja žychary, zaniatyja ŭ padziemnych rabotach, nie atrymali ni dapłat, ni inšych ilhot, niahledziačy na niebiaśpiečnyja ŭmovy pracy.
Pra situacyju «Našaj Nivie» raskazaŭ staršynia Biełaruskaha niezaležnaha prafsajuza Maksim Paźniakoŭ.
«Usie padziemnyja pracy źjaŭlajucca škodnymi, tamu patrabujuć atestacyi. Pa jaje vynikach vydajecca kłas niebiaśpieki i vyznačajucca dadatkovyja harantyi i vypłaty. Ale niamieckaja kampanija atestacyju nie prachodziła», — paviedamiŭ Paźniakoŭ.
Tym ža prachodčykam pavinny davać dadatkovyja 42 dni adpačynku da minimalnaha (ahułam atrymlivajecca 66 dzion), skaročany pracoŭny dzień (siem hadzin, a nie vosiem), hrašovyja dapłaty. Plus rabotniki traplajuć pad dadatkovaje piensijnaje strachavańnie. Kampanija musić adličać 9% ad ich zarobku ŭ fond sacabarony nasielnictva, i čałaviek paśla abiraje — ci vyjści raniej na 10 hod na piensiju, ci zabrać hetyja hrošy.
Ničoha z hetaha šachciory ŭ Lubanskim rajonie nie atrymali.
«Jak heta mahčyma, kali kampanija pracuje na terytoryi Biełarusi? My adpravili skarhu ŭ prakuraturu. Sustrelisia z kiraŭnikom kampanii — jon nam skazaŭ, što jany nie abaviazany pravodzić atestacyju. Paśla sustrečy pačali vyklikać rabotnikaŭ, apytvać, chto ŭ składzie prafsajuza. Pačaŭsia cisk. Treba prymusić dziaržavu vykonvać svaju funkcyju».
Pa słovach Maksima Paźniakova, u kampanii pracuje kala 300 čałaviek (siarod ich i biełarusy, i zamiežniki). Praktyčna ŭsie — pad ziamloj.
U kamitecie pa pracy, zaniataści i sacabaronie Minskaha abłvykanvama pra situacyju viedajuć, ale pakul paŭpłyvać nie mohuć.
«Kampiensacyi raspaŭsiudžvajucca na rabotnikaŭ, jakija pryniaty na pracu arhanizacyjami, zarehistravanymi na terytoryi Biełarusi.
Heta kampanija nie zarehistravana. Jana ździajśniaje pryjom na pracu na padstavie davieranaści, jakaja ŭ ich jość. Voś u čym prablema»,
— patłumačyła kiraŭnica ŭpraŭleńnia dziaržaŭnaj ekśpiertyzy ŭmoŭ i achovy pracy kamiteta Aksana Kavalova.
Jana dadała, što, kab urehulavać prablemy, treba ŭnieści źmieny ŭ zakanadaŭstva, tamu ŭsie dakumienty nakiravali ŭ Ministerstva pracy i sacabarony. Tam paćvierdzili, što razhladajuć situacyju, ale prakamientavać zmohuć, tolki kali aznajomiacca z usimi niuansami.
Ciapier čytajuć
«Łukašenka na minimałkach». «Biełaruski kachanak usiaje Rusi» staŭ kumiram žanočaha tyktoka1
«Łukašenka na minimałkach». «Biełaruski kachanak usiaje Rusi» staŭ kumiram žanočaha tyktoka
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii1212
Kamientary