Alaksandar Łukašenka siońnia staŭ čytačom №1

Paśla cełaha šerahu adterminovak siońnia ŭ Miensku adkryty novy budynak Nacyjanalnaj biblijateki. Rekordna ścisłyja terminy ŭźviadzieńnia abjektu spryčynilisia da taho, što navat na aficyjnym uzroŭni nie chavajecca: biblijateka zdajecca ź istotnymi niedapracoŭkami, jakija abiacajuć vypravić u časie ekspluatacyi. U cyrymonii adkryćcia braŭ udzieł Alaksandar Łukašenka, ź inicyjatyvy jakoha budoŭla nabyła status stratehičnaj dziaržaŭnaj budoŭli. Za asablivyja zasłuhi Łukašenku ŭručyli čytacki bilet pad №1.

Tak zvany VIP-dzień la Nacyjanalnaj biblijateki pačaŭsia ad 9-j ranicy. Na praktycy heta aznačała, što ačapleńnie słužby achovy prezydenta nikoha nie padpuskała da budynku ŭ radyjusie niekalki sotniaŭ metraŭ, a supracoŭniki biblijateki nia mieli prava zachodzić u budynak da atrymańnia specyjalnaha dazvołu.

Hałoŭny hość, Alaksandar Łukašenka, źjaviŭsia tolki apoŭdni. Prajšoŭšy ź inspekcyjaj pa terytoryi, zazirnuŭšy ŭsiaredzinu «ałmazu viedaŭ», Łukašenka zbolšaha zastaŭsia zadavoleny. Z ruk dyrektara biblijateki Ramana Matulskaha Alaksandar Łukašenka atrymaŭ čytacki bilet №1.

(Łukašenka: ) «Na hałoŭnym praspekcie stalicy zaźziaŭ kaštoŭny ałmaz viedaŭ, jaki ŭvasablaje vysokuju misiju Biełarusi - być kulturnickim centram słavianstva, krynicaj dabra i duchoŭnaści ŭ samym centry Eŭropy. Tam, dzie jadnajucca zachodniaja i ŭschodniaja cyvilizacyi».

Praktyčna adrazu ž paśla pačatku budaŭnictva ŭźnikli razmovy, što miesca pad biblijateku vybranaje niaŭdała: padziemnyja płasty pranizanyja tak zvanymi «tarfianymi linzami», što robić niaŭstojlivym padmurak. Pra heta i ciapier kaža akademik Radzim Harecki.

(Harecki: ) «Pa-sapraŭdnamu treba było, kaniešnie, vielmi hruntoŭnyja zrabić inžynerna-hiealahičnyja vyšukańni. A, nakolki ja viedaju,takich surjoznych pracaŭ zroblena nie było. Tym bolš što tam, jak viadoma, było bałota, a na hłybini - tarfianiki. A heta dla budaŭnictva vielmi kiepskaja hleba. Jana miakkaja, tamu i daje prasadku».

Hałoŭny inžyner budoŭli Ludmiła Šochina kaža, što istotnaja zatrymka ŭ pracesie była tolki adnojčy, kali daviałosia pierahledzieć prajektnuju dakumentacyju i ŭhłybicca ažno na 80 metraŭ zamiest planavanych 30-ci.

(Šochina: ) «My na ŭsie budynki ŭ Biełarusi śvidraviny pad padmurak hłybiej za 30 metraŭ nie rabili. Ale jość admysłovaja pastanova Ministerstva architektury, što superskładanyja zbudavańni treba ličyć pa dvuch prahramach. Z ulikam, što prahramy składajucca taksama žyvymi ludźmi, jany dali razychodžańnie pa ścisnutaj taŭščyni hruntu pad nahruzkaj. I my pieršy raz buryli śvidravinu 80 metraŭ hłybinioj. Dziela maralnaha supakoju svajho, navukoŭcaŭ i inšych. I kali my ŭhłybilisia, to na 40 metrach znajšli suchuju zatarfavanaść, jakuju hrunt spresavaŭ tak, što jana nie adroźnivałasia ad hliny. Čamu narod va ŭsim hetym korpajecca, mnie nie zrazumieła. Jość ludzi, jakija zajmajucca hetymi pytańniami prafesijna. I my ŭ tym liku».

Z maŭklivaj zhody bakoŭ biblijateka zdadzienaja sa šmatlikimi niedapracoŭkami. U pryvatnaści, paśla rašeńnia arhanizavać prezydent-centar z zalami dla samitaŭ unutranyja kanstrukcyi daviałosia całkam pierarablać. Adnak siońnia Alaksandar Łukašenka pastaviŭ zadaču zaviaršyć usie pracy da 23 červienia, kab pryniać tut samit kiraŭnikoŭ krainaŭ-udzielnicaŭ Eŭrazijskaj ekanamičnaj supolnaści i Arhanizacyi dahavoru kalektyŭnaj biaśpieki.

Ciaham bližejšaha miesiaca ŭ budynku biblijateki buduć ładzicca biaspłatnyja arhanizavanyja ekskursii. Jak raspaviali supracoŭniki biblijateki, robicca heta dziela taho, kab ludzi ŭbačyli, kudy pajšli ichnyja hrošy. U dalejšym turystaŭ siudy buduć vadzić za hrošy, u źviazku z čym stvorany admysłovy ekskursijny sektar. Darečy, ź pierajezdam u novy budynak pavysiŭsia i košt afarmleńnia čytackaha biletu - ad 2 da 5 tysiač rubloŭ.

Uźviadzieńnie Nacyjanalnaj biblijateki pačałosia ŭ listapadzie 2002 hodu. Zamiest 6,5 hadoŭ składanaj formy budynak uźviali za try ź nievialikim. Hałoŭnymi architektarami stali Viktar Kramarenka i Michaił Vinahradaŭ, jakija raspracavali prajekt jašče napačatku 1990-ch. Vyšynia budynku - bolš za 70 metraŭ, ahulnaja płošča - 112 tysiač kvadratnych metraŭ, u tym liku knihaschovišča - 55 tysiač. Na vyšyni 72 metry planujecca abstalavać ahladnuju placoŭku, na jakuju naviednikaŭ budzie dastaŭlać panaramny lift. Adnačasna biblijateku zmohuć naviedvać 2 tysiačy čytačoŭ. Štat biblijatekaraŭ i absłuhi składaje 1,5 tysiačy supracoŭnikaŭ. Čytackija bilety ŭžo atrymali kala 1800 čałaviek.

Radyjo Svaboda

• 0
• 0
• 0
• 0
• 0
• 0
• 0
• 0