Staŭbcoŭskaja rajonka vydaliła artykuł, u jakim śćviardžała, što ŭ horadzie nichto nie pamior ad pnieŭmanii

Z sajtu staŭpieckaj rajonnaj haziety «Pramień» źnik artykuł hałoŭnaj redaktarki «Što nasamreč adbyvajecca ŭ Stoŭbcach». U im Neli Astrejka tłumačyła situacyju z COVID-19 u rajonie, paviedamlaje «Radyjo Svaboda».

Artykuł źjaviŭsia na sajcie pramen-news.by 27 krasavika paśla šerahu publikacyj u niezaležnych ŚMI pra vybuch pnieŭmanij u Stoŭbcach i situacyju ŭ miascovym špitali ŭ suviazi z epidemijaj karanavirusa.

Jašče ŭčora artykuł adkryvaŭsia biez prablem. Siońnia pad tym ža adrasam źjaŭlajecca paviedamleńnie ab pamyłcy. Nie daje plonu i pošuk artykuła ŭ siecivie pavodle klučavych słoŭ i cytat. Adnak publikacyju možna chutka znajści na kešavanym sajcie haziety ŭ Google.

Pra što pisała rajonka

«Zahałoŭki niekatorych internet-resursaŭ nahadvajuć zvodki z paloŭ Vialikaj Ajčynnaj vajny. Na jakoj kanapie jany naradžajucca i jakich seryjałaŭ nahledzielisia ich aŭtary, zastajecca tolki zdahadvacca, — napisała Neli Astrejka. — …Ale ž dla taho, kab nie panikavać, treba šmat vučycca, a kab nie siejać čutak — analizavać, a heta ciažka…»

Razam z tym redaktarka «Pramienia» nie pryviała nivodnaj kankretnaj publikacyi, ź jakoju jana zavočna dyskutavała.

U svaim artykule jana pierakonvała, što ŭ miascovym špitali niama stałoŭki, jakuju b možna było abstalavać pad pałatu i raźmiaścić tam chvorych, pra što, pavodle jaje, pisali ŭ internecie.

«Siońnia pamiaškańnie dla prymańnia ježy ŭ staŭpieckich adździaleńniach lakarni — heta nievialikija pakoi, u jakija (mahčyma) i ŭlezie try łožki. Ale voś pytańnie — navošta? Kožny darosły, navučany hadami i dośviedam čałaviek vydatna razumieje, što ŭ Biełarusi niama takoha pieranasialeńnia, jak, naprykład, u Kitai», — napisała redaktarka.

Tym nia mienš dalej u artykule jana ž kaža, što kali pačali aktyŭna pastupać chvoryja ź ciažkimi pneŭmanijami, to pacyjentaŭ pačali pieravodzić u inšyja rajony — u Kapyl, Vałožyn, Marjinu Horku, Salihorsk, a taksama ŭ Miensk. Adnak, pavodle Astrejki, u staŭpieckaj lakarni nichto nie pamior ad pnieŭmanii, a ahulnaja śmiarotnaść u rajonie za studzień-sakavik sioleta navat mienšaja, čym letaś.

Krytyčnyja kamientary

Pad artykułam u toj ža dzień pačali źjaŭlacca krytyčnyja zaŭvahi. Usie jany nabrali pazityŭnyja acenki (plusy) ad dziasiatkaŭ karystalnikaŭ.

U kamientarach aŭtary abvinavačvali redaktarku ŭ manipulacyi infarmacyjaj i zamoŭlenym charaktary publikacyi. Adzin z karystalnikaŭ vyjaviŭ, što apublikavanyja na sajcie fotazdymki pustoha kalidora i stałoŭki ŭ lakarni zroblenyja jašče letaś i nie majuć dačynieńnia da pieryjadu epidemii.

Pavialičyć

Pytańni karystalnikaŭ tyčylisia i statystyki śmiarotnaści, jakuju padała Neli Astrejka. Hałoŭnuju redaktarku prasili pryvieści ličby śmiarotnaści ŭ špitali za krasavik, bo mienavita ŭ siaredzinie krasavika pačali źjaŭlacca paviedamleńni pra składanuju situacyju z COVID-19 u horadzie.

«Rekamenduju redaktaru nie zajmacca sprobami manipulavańnia statystyčnaj infarmacyjaj — u vas heta vielmi drenna atrymlivajecca. U Staŭpieckim rajonie ŭ 2019 hodzie pamierli z usich pryčyn śmierci 687 čałaviek, u tym liku ŭ Stoŭbcach — 151 čałaviek. Śmiarotnaść maje siezonnyja vahańni, i ŭ suviazi ź ciopłaj zimoj była mienšaja śmiarotnaść. Tut ničoha dziŭnaha niama. A voś karcina pa krasaviku budzie zusim inšaja. U krasaviku nazirajecca peŭny spad pa śmiarotnaści. Tamu paraŭnoŭvać treba krasavik 2019 i 2020. I voś tady my adrazu ŭbačym usie hetyja adchileńni. Kali što, źviarniciesia ŭ miascovy statkamitet pa źviestki — jany ŭ ich 29 dnia ŭžo buduć. Tady i pahavorym», — piša adzin z kamientataraŭ.

U kamientarach pad artykułam u sacyjalnych sietkach vydańnia čytačy prasili patłumačyć, navošta pacyjentaŭ razvozili ŭ inšyja špitali, kali ŭ samoj staŭpieckaj lakarni niama pierapoŭnienaści.

«Cikava, ad COVID-19 nichto nie pamior, ad pnieŭmanii nichto nie pamior, a ad čaho ž pamirajuć ludzi ŭ reanimacyi? U Italii pamirajuć, u Šviejcaryi pamirajuć, a ŭ nas niama… Tak, chaciełasia b statystyku za krasavik, choć u haziecie takoha ŭzroŭniu i na sajcie taksama napisać možna što zaŭhodna».

Pavialičyć

«Dla taho kab nie panikavać i nie siejać paniku, treba vykazvać narodu praŭdu i ŭ zaklučeńni ab śmierci pisać nie toje, što chočuć bačyć ułady, a realny dyjahnaz. Mahčyma, tady ludzi zrazumiejuć usiu pahrozu taho, što adbyvajecca, i buduć vykonvać choć niejkija rekamiendacyi, a nie chadzić pa kramach biez srodkaŭ zaściarohi».

• 0
• 0
• 0
• 0
• 0
• 0
• 0
• 0