Doktar: U reanimacyjach Minska ŭ krasaviku pamierli 117 čałaviek z karanavirusam. Minzdaroŭja: Žurnalist nie tak zrazumieŭ ličby

Raniej nieviadomyja ličby ahučyŭ zahadčyk adździeła anestezijałohii, reanimacyi i intensiŭnaj terapii Minskaha NPC chirurhii, transpłantałohii i hiematałohii Alaksandr Dziadźko. Kavałak jaho vystupu apublikavaŭ u fejsbuku biznesmien Kirył Vałošyn.

Pavialičyć

Z dyjahramy vidać, što na praciahu krasavika ŭ Minsku ŭ reanimacyju trapili 436 čałavieki z karanavirusnaj infiekcyjaj. Ź ich 265 čałaviek (61%) było pieraviedziena ŭ inšyja adździaleńni, 54 čałavieki (12%) na kaniec miesiaca praciahvali znachodzicca ŭ reanimacyi.

Astatnija 117 čałaviek (27%) pamierli.

«A što ŭ nas? Za krasavik padličyli danyja ŭ Minsku. U nas latalnaść skłała 27%, što supastaŭna z tymi ličbami, jakija pradastavili zamiežnyja śpiecyjalisty», — kaža Alaksandr Dziadźko.

Razam z tym, pavodle aficyjnych źviestak Minzdaroŭja na 1 maja, na ŭsioj terytoryi Biełarusi naličyli tolki 93 pamierłych pacyjentaŭ «z šeraham chraničnych zachvorvańniaŭ z vyjaŭlenaj karanavirusnaj infiekcyjaj».

Nasielnictva Minska składaje prykładna 22% ad nasielnictva Biełarusi. Pavodle aficyjnaj statystyki, kolkaść pamierłych ad COVID-19 u mai ŭ krainie pieravysiła ličby za sakavik-krasavik, razam uziatyja. Pa stanie na siońnia Minzdaroŭja zajaŭlaje pra 190 pamierłych ad COVID-19.

Dapoŭniena: u 21:04 u telehram-kanale Minzdaroŭja źjaviŭsia aficyjny adkaz, sa spasyłkaj na taho ž Dziadźko. Jon śćviardžaje, što žurnalisty jaho nie tak zrazumieli.

Maŭlaŭ, pa-pieršaje, ličba pamierłych uklučaje «nie tolki vypadki paćvierdžanaj infiekcyi COVID-19, ale i tyja vierahodnyja vypadki, kali ŭ pracesie ŭdakładniajučaj dyjahnostyki dyjahnaz karanavirus byŭ źniaty i byli vyjaŭleny pnieŭmanii inšaj etyjałohii».

Pa-druhoje, ličba nibyta ŭklučaje ŭ siabie ŭsich pamierłych ad sakavika i navat častkova śmierci ŭ mai (bo, maŭlaŭ, paśmiarotnaja dyjahnostyka zajmaje ad 7 da 14 dzion).

«Ličby byli pryviedzieny dla śpiecyjalistaŭ», — padsumoŭvaje Minzdaroŭja.

***

Čytajcie taksama: Novyja ličby ź Viciebska pralivajuć śviatło na «Vialikuju biełaruskuju karanavirusnuju statystyčnuju anamaliju»

Aficyjnaja biełaruskaja statystyka radykalna razychodzicca z danymi z krain Jeŭropy z vysokim uzroŭniem žyćcia i raźvitoj miedycynaj. Tak, u Šviecyi i Šviejcaryi, dzie kolkaść vyjaŭlenych chvorych prykładna supadaje ź biełaruskaj, kolkaść pamierłych dasiahnuła 3925 i 1923 adpaviedna (Šviejcaryja ŭvodziła strohija karancinnyja abmiežavańni, a Šviecyja — niastrohija).

Što datyčyć 27-pracentavaj śmiarotnaści, to varta patłumačyć, što havorka tolki pra pacyjentaŭ, jakija traplajuć u reanimacyju, a heta vielmi mały pracent ad ahulnaj kolkaści chvorych.

Poŭnuju viersiju zapisu vebinara možna było pabačyć tut, ale paśla našaj publikacyi dostup da jaho zakryli:

«Naša Niva» budzie dalej raźbiracca ŭ dadzienaj temie.

• 0
• 0
• 0
• 0
• 0
• 0
• 0
• 0