U Chocimskim rajonie dźvie fury, praryvajučysia da miažy, ledź nie źbili daišnikaŭ. Milicyja adkryła ahoń VIDEA
Jak paviedamlaje MUS, u Chocimskim rajonie fury sprabavali prarvacca praź miažu i ledź nie źbili daišnikaŭ.
12 červienia supracoŭniki DAI ŭ Chocimsku zaŭvažyli padazronuju kałonu z troch fur: Volvo, Scania i Iveco. Aŭtamabili ruchalisia ŭ bok miažy z Rasijaj. Pravieryć hruzaviki akazałasia nie tak prosta: kiroŭcy fur ihnaravali patrabavańni ab spynieńni, i supracoŭnikam DAI pryjšłosia ich pieraśledvać.
U vyniku 2 fury ŭdałosia spynić na 11-m kiłamietry trasy «Chocimsk-Lipaŭka-miaža RF», a voś treci padazrony aŭtamabil źjechaŭ. U kiroŭcaŭ, 29 hadovaha i 43-hadovaha žycharoŭ Minskaj vobłaści, nie było dakumientaŭ na hruz, a pryčepy byli apiačatanyja. Jak rastłumačyli sami zatrymanyja, što znachodzicca ŭ pryčepach, jany nie viedajuć.
Pakul supracoŭniki DAI apytvali kiroŭcaŭ, na miesca zdareńnia pryjechaŭ 49-hadovy minčanin, jaki śćviardžaŭ, što mienavita jon źjaŭlajecca ŭładalnikam hruzu. Zatrymanym jon zahadaŭ sadzicca ŭ fury i jechać pa maršrucie. Z takim rašeńniem «haspadara hruzu» pravaachoŭniki nie pahadzilisia i zastupili šlach dvum hruzavikam. Voś tolki dla kiroŭcaŭ zahad načalstva byŭ važniejšy, čym ryzyka zadušyć supracoŭnikaŭ DAI, i jany praciahnuli ruch.
Daišnikam pryjšłosia adstupić, ale, paśla niekalkich papieradžalnych strełaŭ u pavietra, jany rasstralali koły abiedźviuch fur. Niahledziačy na paškodžańni, abodva hruzavika zmahli pierasiačy miažu i schavalisia na terytoryi Rasii.
Ich znajšli praź niejki čas u Smalenskaj vobłaści rasijskija kalehi. Vyśvietlić, što ŭ ich pieravozili, pakul što nie ŭdałosia.
Na kiroŭcaŭ zaviali kryminalnyja spravy za hvałt u dačynieńni da supracoŭnikaŭ DAI, a taksama skłali administracyjnyja pratakoły, jak i na ŭładalnika hruzaŭ. Prakuror Chocimskaha rajona pryznačyŭ adnamu z padazravanych zakład 1000 bazavych, a inšamu — uziaćcie pad vartu.
Kamientary