Sud u Pskovie pryznaŭ vinavataj u apraŭdańni i prapahandzie teraryzmu žurnalistku «Radyjo Svaboda» (u Rasii heta ŚMI pryznana zamiežnym ahientam) Śviatłanu Prakopjevu. Kryminalnuju spravu suprać Prakopjevaj raspačali z-za aŭtarskaj kałonki ab mahčymych pryčynach vybuchu, ździejśnienaha 17-hadovym junakom u budynku Archanhielskaha ŭpraŭleńnia FSB, piša Bi-bi-si.
Druhi zachodni akruhovy vajenny sud na vyjaznym pasiadžeńni ŭ Pskovie pryznačyŭ Prakopjevaj pakarańnie ŭ vyhladzie štrafu ŭ 500 tysiač rubloŭ (7100 dalaraŭ). Abvinavačvańnie prasiła prysudzić žurnalistku da «tolki realnaha pazbaŭleńnia voli» na šeść hadoŭ i zabarony zajmacca žurnalisckaj dziejnaściu na čatyry hady.
U vyniku sud nie staŭ zabaraniać Prakopjevaj zajmacca žurnalistykaj, u prysudzie pra heta ničoha nie skazana. Ajfon i noŭtbuk žurnalistki sud pastanaviŭ kanfiskavać na karyść dziaržavy, a kanfiskavany pry pieratrusie dyktafon dazvoliŭ viarnuć. Prakopjeva zajaviła, što maje namier abskardzić prysud. «Ja nie raźličvała na toje, što mianie pryznajuć nievinavataj», — skazała jana.
Abvinavaŭčy prysud pavodle častki 2 artykuła 205.2 KK («Publičnaje apraŭdańnie i prapahanda teraryzmu») upieršyniu vyniesieny ŭ Rasii za tekst žurnalista, apublikavany ŭ ŚMI.
Kałonka, praź jakuju była raspačataja sprava, prahučała ŭ listapadzie 2018 hoda ŭ efiry Pskoŭskaha «Echa Maskvy», a zatym była apublikavanaja na sajcie afiliravanaha z radyjostancyjaj vydańnia «Pskoŭskaja stužka navinaŭ». Prakopjeva napisała jaje paśla vybuchu, ździejśnienaha ŭ budynku FSB u Archanhielsku 31 kastryčnika 2018 hoda. 17-hadovy Michaił Žłabicki prynios u budynak samarobnaje vybuchovaje prystasavańnie, pry vybuchu jakoha zahinuŭ. Troje supracoŭnikaŭ FSB byli paranienyja.
Žurnalistka ŭ tekście vykazała zdahadku, što dziejańni Žłobickaha mahli być spravakavanyja ŭ tym liku i dziaržaŭnaj palitykaj i što dziaržava moža nieści častku adkaznaści za źjaŭleńnie pakaleńnia hramadzian, jakija zmahajucca ź im.
Prakopjeva svaju vinu nie pryznaje i ličyć spravu palityčna matyvavanaj. U apošnim słovie jana nahadała sudu ab svabodzie słova i misii presy, padkreśliŭšy, što abjektam krytyki dla ŚMI «zaŭsiody była i budzie dziaržava — sistema ŭłady z aparatam prymusu, zdolnym stać instrumientam masavych represij». U kastryčniku 2019 hoda Prakopjeva apublikavała adkryty list, u jakim nazvała svaju spravu «zabojstvam svabody słova ŭ Rasii», zajaviŭšy, što ličyć jaho «banalnaj pomstaj pakryŭdžanych siłavikoŭ».
Prakuror Natalla Mielaščenia zajaviła ŭ sprečkach, što Prakopjeva, «źjaŭlajučysia žurnalistam, dziejničała z metaj farmiravańnia ŭ masavaj aŭdytoryi hramadskaha mierkavańnia ab pryznańni ideałohii i praktyki teraryzmu pravilnaj, što vymahaje padtrymki i pierajmańnia». Pavodle viersii abvinavačvańnia, žurnalistka źviarnułasia da hetaj temy, «pradbačačy mahčymaść nastupu hramadska niebiaśpiečnych nastupstvaŭ i žadajučy ich nastupu».
Pakolki ŭsie kałonki Prakopjevaj dla «Radyjo» publikavalisia ŭ drukavanaj viersii na sajcie, žurnalistcy pastaŭlena ŭ vinu, što jana «pieršapačatkova chacieła i žadała maksimalnaha achopu aŭdytoryi raspaŭsiudžvańniem materyjału».
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1212
Kamientary