7 lipienia spaŭniajecca 20 hadoŭ z momantu źniknieńnia pry niavyśvietlenych abstavinach žurnalista i apieratara Dźmitryja Zavadskaha, nahadvaje BAŽ.
U raniejšyja hady 7 lipienia kalehi prychodzili z partretami Dźmitryja da padjezda, adkul jon vyjšaŭ toj ranicaj. Siońnia harantavać biaśpieku padčas navat maŭklivaha stajańnia z partretam niemahčyma. Ale pamiać niemahčyma zabić. Skraści. Zatrymać, aštrafavać ci kinuć na sutki.
Tamu 7 lipienia a 12:00 BAŽ zaklikaje usich kaleh zhadać Dźmitryja Zavadskaha na svaim pracoŭnym miescy chvilinaj maŭčańnia.
Za hetyja hady pravaachoŭnyja orhany Biełarusi tak i nie adkazali na pytańni, chto byŭ arhanizataram i vykanaŭcam hetaha złačynstva i što nasamreč zdaryłasia ź Dźmitryjem.
Pa fakcie źniknieńnia Dźmitryja była zaviedziena kryminalnaja sprava pa artykule «zabojstva», adnak potym abvinavačańnie było pierakvalifikavana na «vykradańnie i niezakonnaje pazbaŭleńnie čałavieka voli».
14 sakavika 2002 h. Minski abłasny sud pryznaŭ vinavatymi ŭ vykradańni Zavadskaha aficeraŭ śpiecpadraździaleńnia MUS «Ałmaz» Valeryja Ihnatoviča i Maksima Malika (asudžanyja na pažyćciovaje źniavłoleńnie), byłoha kursanta Akademii MUS Alaksieja Huza (asudžany na 25 hadoŭ pazbaŭlenia voli), a taksama hramadzianina Siarhieja Savuškina (užo vyjšaŭ na volu).
Pavodle abvinavačańnia, matyvam złačynstva stałasia pomsta: maŭlaŭ, Zavadski publična abvinavaciŭ Ihnatoviča va ŭdziele ŭ vajnie na baku čačenskich bajcoŭ. Adnak nichto z asudžanych nie pryznaŭ svajoj viny ni pa adnym z epizodaŭ.
27 listapada 2003 h. sud Frunzienskaha rajona h. Minska pryznaŭ źnikłaha žurnalista pamierłym. Miž tym, cieła Dźmitryja Zavadskaha dahetul nie znojdziena.
Rasśledavańnie pa spravie ab źniknieńni Zavadskaha niekalki razoŭ adnaŭlałasia, adnak vyniku nie pryniesła.
Ciapier čytajuć
«Ja hatovaja stać ministram ekanomiki Biełarusi». Novy tvar u Kabiniecie Alisa Ryžyčenka — pra karupcyju na karyść Łukašenak, Zareckuju i reformy26
Kamientary