U Pinsku asudzili 80-hadovaha byłoha dyrektara škoły. Jaho vina — vystup na mitynhu
Ryhor Siamionavič Burvan u minułym nastaŭnik, dyrektar škoły. U žniŭni hetaha hoda jamu pajšoŭ 81-y hod, paviedamlaje Miedyja-Paleśsie.
16 žniŭnia jon vystupiŭ na płoščy Lenina pierad niekalkimi sotniami pinčukoŭ, jakija pratestujuć suprać falsifikacyi vybaraŭ i hvałtu z boku pravaachoŭnych orhanaŭ.
Praź niekatory čas Ryhora Siamionaviča naviedaŭ milicyjanier i skłaŭ administracyjny pratakoł ab udziele ŭ niesankcyjanavanym masavym mierapryjemstvie.
16 vieraśnia piensijaniera vyklikali ŭ sud.
Ad skazanaha na płoščy ŭ prysutnaści šmatlikich sotniaŭ ludziej i dziasiatka milicyjanieraŭ Ryhor Siamionavič nie admoviŭsia.
— Ja daviedaŭsia, što budzie mitynh u horadzie. Dumaju, pajdu i ja, pahladžu na ludziej, siabie pakažu. Pajšoŭ, pahladzieŭ, pasłuchaŭ što ludzi kažuć. Narmalnyja ludzi, vočy narmalnyja, ni adnaho narkamana ja tam nie ŭbačyŭ, nichto tam nikomu ničoha nie daje. Ludzi vystupajuć, płačuć. Siarod prysutnych na mitynhu šmat maich vučniaŭ. Padychodziać, vitajucca, ruki paciskajuć. Ja pasłuchaŭ, što jany havorać i vyrašyŭ vykazacca nakont taho, što adbyvajecca sa mnoj i z tymi, chto byŭ na płoščy. Paprasiŭ mikrafon i vystupiŭ. Syšoŭ z trybuny. Maje vučni padychodziać da mianie, ruku cisnuć, abdymajuć. Apładysmienty byli. A ja dumaju, a što ja takoha istotnaha skazaŭ? Byccam by ničoha istotnaha, prosta vykazaŭ svajo mierkavańnie. Ale paśla taho, jak ludzi stali padychodzić, abdymać, značyć, niešta ja istotnaje skazaŭ, čymści ja kranuŭ dušu ludziej…
— Mnie zrazumieła, što napisana ŭ pratakole, — praciahnuŭ Ryhor Burvan. — Ale mnie nie jasna toje, čamu mianie pryciahvajuć…
— Ja abaraniaŭ Kanstytucyju. Ja abaraniaŭ dziaržavu, radzimu. Ja abaraniaŭ jaje ad ŭzurpacyi i hvałtoŭnaha ŭtrymańnia ŭłady, što źjaŭlajecca najciažejšym złačynstvam…
Jak tolki Ryhor Siamionavič skončyŭ svaju pramovu sa spasyłkaj na artykuł kryminalnaha kodeksu, jaki praduhledžvaje pakarańnie za ŭzurpacyju ŭłady, sudździa Klimovič abviaściŭ rašeńnie suda — Ryhora Burvana pryznać vinavatym pa č.1 art. 23.34 KaAP «Udzieł u niesankcyjanavanym masavym mierapryjemstvie» i vynieści jamu papiaredžańnie.
Kancert Maksa Karža pačaŭsia z zatrymkaj na dźvie hadziny. «Biełaruś top!» — kryčać i jon, i fanaty3
Kamientary