TB: Zatrymanaha žychara «Płoščy pieramienaŭ» padazrajuć u namiery vykarystoŭvać atrutu suprać milicyi

«Ściapan Łatypaŭ zatrymany pa padazreńni ŭ arhanizacyi niezakonnaha kanała pastaŭki ŭ krainu niebiaśpiečnych chimikataŭ. Padčas pravierki vyjaviłasia, što jadachimikaty, jakija ŭvozilisia pad vyhladam tavaraŭ narodnaha spažyvańnia, — niebiaśpiečnyja atruty. Śledstva vyśviatlaje, navošta jany Łatypavu», — zajavili na ANT, piša Tut.by.

U siužecie paviedamlajuć, što Łatypaŭ 94 razy pryciahvaŭsia da administracyjnaj adkaznaści, siem hadoŭ tamu suprać jaho raspačynali spravu ab machlarstvie, a ciapier — za arhanizacyju masavych biesparadkaŭ. Pavodle źviestak kanała, padčas pieratrusaŭ vyjaŭlenyja «rečyvy, jakija ŭjaŭlajuć niebiaśpieku». U efiry pakazali jomistaści ź niejkimi rečyvami.

Nieviadomy apieratyŭny supracoŭnik HUBAZiK MUS, jaki staić śpinaj da kamiery, zajaviŭ, što Łatypaŭ — adzin z kaardynataraŭ i aktyŭnych udzielnikaŭ masavych biesparadkaŭ u Minsku.

— Akramia taho, praź internet-miesiendžary, sacyjalnyja sietki asabista jon zajmaŭsia zboram hrošaj na padryŭnuju dziejnaść pa dyskredytacyi ŭłady i orhanaŭ kiravańnia, supracoŭnikaŭ milicyi, arhanizoŭvaŭ niesankcyjanavanyja akcyi ŭ stalicy pa raźmiaščeńni na fasadach budynkaŭ zabaronienaj simvoliki i murałaŭ. Z dapamohaj śpiecyjalnych techničnych srodkaŭ zafiksavanyja źviestki ab namierach fihuranta prymianić preparaty pieršaha kłasa niebiaśpieki, jakija źmiaščajuć jad dyfaśfin, suprać supracoŭnikaŭ milicyi i inšych asob, infarmacyja pra jakija raźmieščana ŭ adnym z destruktyŭnych telehram-kanałaŭ, — kaža nieviadomy supracoŭnik.

— U pryvatnaści, vynošvaŭ płany apracavać atrutnymi rečyvami ich ziamielnyja ŭčastki i dačy, raźviejać hetyja rečyvy pablizu bajavych paradkaŭ AMAPa i ŭnutranych vojskaŭ padčas pratesnych akcyj, kab vyvieści tych z ładu, jak jon sam vykazaŭsia, kab «zašlisia blavocinaj», — praciahvaje apieratyŭnik.

Telekanały pryvodziać zapis telefonnaj razmovy, dzie, pa viersii apieratyŭnikaŭ, adzin z abanientaŭ Ściapan Łatypaŭ, jaki nibyta kaža pra hetyja namiery.

U siužecie pakazali i samoha Łatypava. Mužčyna kaža, što adčuvaje siabie pryhniečanym i hatovy da supracoŭnictva sa śledstvam.

Nahadajem, Łatypava zatrymali 15 vieraśnia ŭ viadomym dvary doma pa Smarhoŭskim trakcie. Zatrymańnie mužčyny trapiła na fota i videa. Jaho zatrymali paśla taho jak jon nastojliva patrabavaŭ pradstavicca ad asob biez apaznavalnych znakaŭ, jakija zafarboŭvali murał z «dydžejami pieramien».

Paźniej u kvatery mužčyny prajšoŭ pieratrus, a potym jaho pavieźli na Akreścina — jak paviedamiŭ advakat, pa padazreńni pa artykule 293 KK (Masavyja biesparadki).

Ściapanu Łatypavu 40 hadoŭ, raniej jon kazaŭ, što ŭ jaho jość IP, jakoje «zajmajecca pracami, źviazanymi z vysokaj ryzykaj».

• 0
• 0
• 0
• 0
• 0
• 0
• 0
• 0