Mužčyna pryjšoŭ u milicyju zabrać svoj bieł-čyrvona-bieły ściah — i jaho pasadzili na troje sutak
Raman Rašecki žyvie ŭ Breście. U hetyja vybary jon zapisvaŭsia ŭ niezaležnyja naziralniki. A paśla, jak i mnohija, staŭ chadzić na mirnyja pratesty.
Za marš na dzień naradžeńnia Łukašenki, na jaki Raman vyjšaŭ ź biełymi tapačkami, mužčyna atrymaŭ 15 sutak.
«My na płoščy Lenina pasiadzieli, patančyli. I ŭžo kali paśla mitynhu ja išoŭ dadomu sa ściaham, mianie zatrymali. Skrucili, kinuli ŭ mašynu. Pakłali tvaram u padłohu. Dumaŭ, buduć bić, ale nie čapali. Siadzieŭ u izalatary Leninskaha RAUS, a na apošnija čaćviora sutak nas pieravieźli ŭ Biarozu: vidać, vyzvalali miesca ŭ Breście pad chapun», — raskazvaje Raman.
Ściah zanieśli ŭ vopis kanfiskavanych rečaŭ. Skazali, što paśla vyzvaleńnia možna budzie zabrać.
17 vieraśnia mužčyna pajšoŭ pa jaho ŭ milicyju.
«Mnie adkazali: ściah addali vašym suajčyńnikam. I ničoha kankretnaha. Pryhrazili: kali budziecie prychodzić pa ściah, heta budzie rasceniena jak nadakučlivaje prystavańnie da supracoŭnikaŭ milicyi. Ja raśśmiajaŭsia tady z hetaj farmuloŭki», — uspaminaje Raman.
U toj ža dzień jon napisaŭ skarhu i adnios jaje ŭ dziažurnuju častku. Telefanavaŭ paśla, kab daviedacca vychodny numar dakumienta, ale trubku nichto nie ŭziaŭ. Tady 18 vieraśnia mužčyna znoŭ pajšoŭ u milicyju.
«Viadu siabie adekvatna, nijakich lišnich słovaŭ. Stukajusia ŭ bramku, kažu, što mnie treba daviedacca numar skarhi. Pastavy taki: dobra, pačakajcie. Praz čas vychodzić inšy ŭčastkovy i zaprašaje zajści u RAUS.
Rečy maje kładzie ŭ jačejku, zavodzić u pakoj dopytu i pačynaje składać pratakoł zatrymańnia — pa č. 1 art. 17, chulihanka.
U fabule pratakoła tak i napisali: nadakučliva prystavaŭ da supracoŭnika milicyi. Mianie zakryli na 72 hadziny.
U paniadziełak, 21 vieraśnia, byŭ sud. U spravie napisali, što ja barabaniŭ u bramku, na zaŭvahi nie reahavaŭ, pieraškadžaŭ pracy pastavoha. Kažu: zaprasicie na sud taho supracoŭnika, chto na mianie skardziŭsia, i pakažycie videa z kamier nazirańnia nad varotami RAUS. Milicyi dali dźvie hadziny, kab heta zrabić, — ničoha nie adbyłosia. U vyniku spravu adpravili na dapracoŭku, i mianie adpuścili», — apisvaje toj praces Raman.
Ściah jon pa-raniejšamu źbirajecca viarnuć.
«Ja jaho kuplaŭ aficyjna ŭ kramie «Kniaź Vitaŭt», płaciŭ 35 rubloŭ. Heta maja majomaść», — tłumačyć mužčyna.
Kamientary